سەناتور دانا نۇرجىگىت جۇمىس ساپارى اياسىندا قىزىلوردا وبلىسىنىڭ بىرقاتار ءوڭىرىن ارالاپ, جەرگىلىكتى حالىقپەن كەزدەسىپ, پالاتا قابىرعاسىنداعى جۇمىستار باعىتى تۋرالى باياندادى. ول قازالى اۋدانىنا قاراستى لاقالى اۋىلىندا بولىپ, ونىڭ جاي-كۇيىمەن تانىستى.
دەپۋتات اۋىل ورتالىعىندا ورناتىلعان «قۇرمەت الاڭىنىڭ» اشىلۋىندا بولىپ, مۇنداعى جاڭادان سالىنعالى جاتقان مەشىتتىڭ العاشقى ىرگەتاسىن قالاۋ راسىمىنە قاتىستى. سونداي-اق سەناتور اۋىل تۇرعىندارىمەن ەركىن فورماتتاعى كەزدەسۋ وتكىزدى, دەپ حابارلادى سەناتتىڭ ءباسپاسوز قىزمەتى.
سەناتور رىسقالي ابدىكەروۆ قاراعاندى وبلىسىنا جۇمىس ساپارى اياسىندا نۇرا جانە شەت اۋداندارىنىڭ تۇرعىندارىمەن كەزدەستى. سونىمەن قاتار قاراعاندى, ساران جانە تەمىرتاۋ قالالارىنداعى الەۋمەتتىك ماڭىزى بار نىسانداردى ارالادى. كەزدەسۋ بارىسىندا دەپۋتات جەرلەستەرىنە پالاتانىڭ زاڭ شىعارۋ جۇمىستارى تۋرالى جان-جاقتى ايتىپ بەردى. اۋدان تۇرعىندارى ءوز كەزەگىندە سەناتورعا بايلانىس پەن ينتەرنەتكە قولجەتىمدىلىك ماسەلەلەرىن كوتەردى. دەپۋتات ازاماتتاردى تولعاندىر- عان بارلىق سۇراققا جاۋاپ بەرىپ, كوتەرىلگەن ماسەلەلەر مەن ۇسىنىستار جەكە باقىلاۋعا الىناتىنىن جەتكىزدى. قالالاردىڭ الەۋمەتتىك ماڭىزى بار نىساندارىنىڭ قىزمەتكەرلەرىمەن كەزدەسۋدە سەناتور كونستيتۋتسيالىق رەفورمالار مەن مەملەكەت باسشىسىنىڭ رەفورمالارىن جۇزەگە اسىرۋعا باعىتتالعان پارلامەنتتىڭ الداعى زاڭ شىعارۋ جۇمىستارى تۋرالى دا ايتتى.
سەنات دەپۋتاتى بەكبولات ورىنبەكوۆ تاراز قالاسىندا ساپاردا بولىپ, بىرقاتار نىساننىڭ جۇمىسىمەن تانىستى. سەناتور «اراي-2» شاعىن اۋدانىنداعى الەۋمەتتىك دۇكەندە, «اراي» جانە «بارىسحان» تۇرعىن القاپتارىنداعى مەكتەپتەردە, اۋداندىق جىلىتۋ قازاندىعىندا (رك-4), 200 ورىندى ونكولوگيالىق اۋرۋحانادا, 150 ورىندى وڭالتۋ ورتالىعىندا, 15 شاعىن اۋدانىندا جانە تالاس وزەنىنىڭ جاعالاۋىندا بولىپ, نىسانداردىڭ جاعدايىمەن تانىستى. دەپۋتات مەكتەپ, وڭالتۋ ورتالىعى قۇرىلىستارىن جانە وزەن جاعالاۋىن بەكىتۋ جۇمىستارىن مەرزىمىندە ءارى ساپالى اياقتاۋعا نازار اۋداردى. «تارازەنەرگوورتالىعى» اق-نىڭ اپاتتى جاعدايداعى مۇرجاسىن جوندەۋ, اۋداندىق قازاندىق ماڭىنان قوسالقى قازاندىق سالۋ ماسەلەلەرىن قاراستىرۋ كەرەك ەكەنىن ايتتى.
سەنات دەپۋتاتى ولگا بۋلاۆكينا جۇمىس ساپارى بارىسىندا شىعىس قازاقستان وبلىسىنىڭ شەمونايحا اۋدانىندا بولدى. دەپۋتات رۋليحا اۋىلىنداعى تاۋارلى-ءسۇت فەرماسى مەن پرۋگگەروۆو اۋىلىنداعى سۋ قۇبىرى جەلىلەرىنىڭ قۇرىلىسىمەن تانىستى. پرۋگگەروۆو اۋىلىندا بولعان كەزدە سەناتور جالپى قۇنى 464 ميلليون تەڭگەدەن اساتىن سۋ قۇبىرى قۇرىلىسىنىڭ بارىسىن كوردى. قازىر قۇبىردىڭ قۇرىلىسى اياقتالۋعا جاقىن. وبلىسقا ساپارى بارىسىندا كوتەرىلگەن تۇيتكىلدى ماسەلەلەردىڭ بارلىعىن دەپۋتات باقىلاۋدا ۇستاۋعا ۋادە بەردى.
سەنات دەپۋتاتى ناريمان تورەعاليەۆ جۇمىس ساپارى اياسىندا باتىس قازاقستان وبلىسى قازتالوۆ اۋدانىنىڭ بىرقاتار ەلدى مەكەنىن ارالاپ, جەرگىلىكتى تۇرعىندارمەن كەزدەستى. جيىنعا قاتىسۋشىلار تۇرعىنداردىڭ تۇيتكىلدى ماسەلەلەرىن, سونداي-اق قابىلدانعان بىرقاتار زاڭدى تالقىلادى. سەناتور قازتالوۆ اۋدانىنداعى سارىقۇدىق, جالپاقتال, قاراوزەن, جۇلدىز, قازتالوۆكا اۋىلدارىنداعى ءبىلىم بەرۋ نىساندارىنىڭ قۇرىلىس بارىسىمەن جانە جولداردىڭ جاعدايىمەن تانىستى.
سەنات دەپۋتاتى مۇرات باقتيار ۇلى جۇمىس ساپارىمەن قىزىلوردا وبلىسىنىڭ جاڭاقورعان اۋدانىندا بولدى. سەناتور باقشا داقىلدارىن ءوندىرۋ بارىسىمەن تانىسىپ, جايىلما اۋىلىنىڭ ديقاندارىمەن كەزدەستى. قاربىز ءوندىرىسى – اۋىل تۇرعىندارىنىڭ جىل سايىنعى نەگىزگى تابىس كوزى. دەپۋتات بۇل ماسەلەلەردى وبلىس ديقاندارىمەن تالقىلادى. ول سونداي-اق سۇتتىقۇدىق اۋىلدىق وكرۋگىندەگى 800 گەكتار جاڭا سۋارمالى جەردى اينالىمعا ەنگىزۋگە ارنالعان ينفراقۇرىلىم قۇرىلىسىمەن تانىستى. جۇمىس ساپارىنىڭ سوڭىندا جەرگىلىكتى اتقارۋشى ورگاندارمەن كەزدەسۋ بارىسىندا وبلىستىڭ تۇيتكىلدى ماسەلەلەرى تالقىلاندى.