توقسان جىلدان بەرى ورتا جانە كىشى بۋىن مەديتسينا قىزمەتكەرلەرىن دايىنداپ كەلە جاتقان مانشۇك مامەتوۆا اتىنداعى اقتوبە جوعارى مەديتسينالىق كوللەدجىندە «گيپپوكرات», «دوبرومەد», «مەيىرىم» ۆولونتەرلىك توپتارى بەلسەندى جۇمىس ىستەيدى. العاشقى ەكەۋى ءپاللياتيۆتى كومەككە مۇقتاج, توسەككە تاڭىلعان ناۋقاستارعا كۇتىم جاساۋ, سالاماتتى ءومىر سالتىن قالىپتاستىرۋ, العاشقى مەديتسينالىق كومەكتى ۇيرەتۋ باعىتىندا جۇمىس اتقارسا, سوڭعىسى قايىرىمدىلىق شارالار وتكىزۋمەن اينالىسادى.
«گيپپوكرات» توبى 2024 جىلى وبلىس كولەمىندە «ەڭ ۇزدىك ۆولونتەرلىك توپ» اتالىمىن الدى. وسى وقۋ ورنىنداعى ەرىكتىلەردىڭ جۇمىسى پاندەميا باستالعان جىلى جانداندى. 2020 جىلى ناۋرىزدىڭ سوڭىندا شەتەلدەن ۇشىپ كەلگەندەر اراسىندا العاشقى ناۋقاستار تىركەلىپ, دەرت كۇرت تارالىپ جاتقاندا العاشقى سىناق دارىگەرلەر مەن ورتا بۋىن مەديتسينا قىزمەتكەرلەرىنە تۇسكەن-ءدى. ماماندار جەتىسپەي جاتقاندا, دارىگەرلىك بىلىمنەن حاباردار ەرىكتىلەر اۋرۋحاناداعى ناۋقاستارعا وتتەگى باللوندارىن, قاجەتتى زاتتار مەن قۇرالدار جەتكىزدى, دارىگەرلەرگە سىرتتان تاماق تاسىدى, ناۋقاستاردى بولىمشەلەرگە تاسىمالداۋعا كومەكتەستى. 2020 جىلدىڭ ساۋىرىندە «گيپپوكرات» توبىنىڭ جەتەكشىلەرى ب.دابىلدينا, ۆ.تىلەۋلەسوۆا مەديتسينا ماماندىعىنا وقىپ جاتقان ستۋدەنتتەردى ەرىكتىلەر قاتارىنا قوسىلۋعا شاقىردى. وسى كۇندەرى بالالار پاندەميا ۋاقىتىندا جاندارىن شۇبەرەككە ءتۇيىپ جۇرگەن دارىگەرلەر جۇمىسىنىڭ قيىندىعىن كوردى. پاندەميا ەلىمىزدە ۆولونتەرلىك جۇمىستىڭ جاندانۋىنا جول اشتى. ءبىر جاعىنان بولاشاق ماماندىعىن مەڭگەرۋگە سەبى تيسە, ەكىنشى جاعىنان قايىرىم كۇتكەن جانداردىڭ ريزاشىلىعىن الۋ بالالاردىڭ كوڭىلىنە قانات ءبىتىردى. ويتكەنى جۇرەكتەگى مەيىرىم قايىرىمدى ىستەرگە جول اشادى.
ەرىكتىلەر ساپىندا جۇرگەن ستۋدەنتتەر وقۋلارىن ءبىتىرىپ, جان-جاققا كەتسە دە, بۇگىندە وقۋ ورنىمەن بايلانىسىن ۇزگەن ەمەس. گيپپوكراتتىقتاردىڭ پاندەميا كەزىندەگى جۇمىسى ەرەكشە دارالانىپ, «Birgemiz» ۇلتتىق جوباسىنىڭ «Saulyq» اتالىمى بويىنشا رەسپۋبليكادا ۇزدىك توپتاردىڭ قاتارىنا ەنىپ, ءوڭىر باسشىسى وڭداسىن ءورازاليننىڭ قولىنان توسبەلگى الدى. وسى كەزدەن «گيپپوكرات» ەرىكتىلەرى №1 «الەۋمەتتىك قىزمەت كورسەتۋ ورتالىعى», «ايالا» وڭالتۋ ورتالىعى, جەدەل جاردەم اۋرۋحاناسى, ء«ۇمىت» سابيلەر ءۇيى, جيتس الدىن الۋ جانە وعان قارسى كۇرەس جونىندەگى وبلىستىق ورتالىقتا قامقورلىققا ءزارۋ جاندارعا كومەكتەسە باستادى. ودان وزگە قالاداعى جالعىزىلىكتى قاريالارعا ازىق-ت ۇلىك, ءدارى-دارمەك جەتكىزىپ, ۇيلەرىن جيناستىرۋعا قولعابىس ەتتى. بولاشاق فەلدشەرلەر مەن ورتا مەدبيكەلەر, ءتىس تەحنيكتەرى ۇستازدارىمەن بىرگە قارتتار ۇيىندەگى قامكوڭىل جاندارعا كۇتىم جاسادى, قان قىسىمدارىن ولشەپ, ءتىپتى كەيبىرىنە ءتىس پروتەزدەرىن سالىپ بەردى. قاريالاردىڭ العىسىن العان جاستار قيىن كەزدە قولداۋ كورسەتۋدىڭ ماڭىزىن ءتۇسىندى. قولدارى بوس كەزدە وقىتۋشىلارىمەن بىرگە مەكەمەدە تۇراتىن قارتتاردى ءسان سالونىنا, ت.احتانوۆ اتىنداعى وبلىستىق دراما تەاترىنا قويىلىمدارعا اپارىپ, ءماز قىلدى. ءتورت قابىرعادا قامالىپ وتىرعان قاريالارعا ءوز بالا-نەمەرەلەرى ەمەس, بوگدە بالالار مەيىرىم توكتى. وسى توپتىڭ مۇشەلەرى «مەديتسينا جاستارى» رەسپۋبليكالىق قوعامدىق بىرلەستىگى گرانتىن جەڭىپ الىپ, ءجۇرىپ-تۇرۋى قيىن, ءپاللياتيۆتى كومەككە مۇقتاج, توسەككە تاڭىلعان ناۋقاستارعا كومەكتەستى. «گيپپوكرات» توبىنىڭ جەتەكشىسى ەركەناز بيسەنالىقىزىنىڭ ايتۋىنشا, توپتىڭ نەگىزگى باعىتى – مەديتسينالىق الەۋمەتتىك كومەك كورسەتۋ. بولاشاق ماماندار جەدەل جاردەم اۋرۋحاناسىندا, ەمحانالارداعى مەدبيكەلىك كۇتىم بولىمدەرىندە جاتىپ قالعان ناۋقاستاردىڭ دەنەسىندە ويىلۋدىڭ بولماۋىن قاداعالاپ, كۇتىم جاسايدى.
«وسى وقۋ ورنىنداعى ۆولونتەرلىك توپ بۇرىننان بەرى جۇمىس ىستەيدى. ونى ۇيىمداستىرعان وقىتۋشى – بالنۇر دابىلدينوۆا. مەن 2013 جىلى قوسىلدىم. 2019 جىلى «وزەكتى جانعا ءبىر ءۇمىت» جوباسىمەن گرانت كونكۋرسىنا قاتىسىپ, ونىڭ قارجىسىنا ءپاللياتيۆتى ناۋقاستارعا قاجەتتى كۇتىم زاتتارىن الىپ, تاراتتىق. كوۆيد كەزىندە قاراۋىمىزعا العان بىرقاتار جالعىزىلىكتى زەينەتكەرگە ازىق-ت ۇلىك اپارىپ, كەزەكپەن ۇيلەرىن جيناستىردىق. 2023 جىلى «Birgemiz» جوباسىمەن گرانتقا قول جەتكىزىپ, ىشەك جولدارىنىڭ اۋىر ناۋقاسىنا شالدىققان جاندارعا قالاداعى №3 ەمحانا ارقىلى قاجەتتى تاۋارلاردى جەتكىزىپ بەردىك. قارتتار ۇيلەرىنە بارىپ, قارتتار مەن مۇگەدەكتىگى بار جاندارعا ءجيى كومەكتەسەمىز. بەيىمدەۋ ورتالىعىنداعى ەرەسەكتەردى مەديتسينالىق تەكسەرىستەن وتكىزۋگە قولعابىس جاسادىق. مۇقتاج جاندارعا كورسەتكەن كومەگىمىز ەلەنىپ, 2023 جىلى «گيپپوكرات» كلۋبى ەلىمىزدەگى «ەڭ ۇزدىك ۆولونتەرلىك توپ» جۇلدەسىن يەلەندى», دەيدى ەرىكتىلەر توبىن ۇيىمداستىرۋشىلاردىڭ ءبىرى, كوللەدج وقىتۋشىسى ۆەنەرا تىلەۋلەسوۆا.
وسى وقۋ ورنىنداعى تاعى ءبىر ۆولونتەرلىك توپ «دوبرومەد» قۇرامىندا 85 ەرىكتى توپ جەتەكشىسى ن.دەمەنتيەۆسكايانىڭ جەتەكشىلىگىمەن ينسۋلت العان ناۋقاستارعا وڭالتۋ جۇمىسىن جۇرگىزەدى, مۇگەدەك بالالاردى قىدىرتىپ, ساباقتارىن وقىتادى. ء«ۇمىت» بالالار ۇيىنە بارىپ, سابيلەرگە انيماتسيالىق شوۋلار كورسەتىپ, ويىندار ۇيىمداستىرىپ, الەۋمەتتەندىرۋگە كومەكتەسەدى. «دوبرومەد» ەرىكتىلەرى مەديتسينالىق جاستار قوزعالىسىنان رەسپۋبليكالىق شاعىن گرانتتاردى بىرنەشە رەت ۇتىپ الدى. سونىڭ ىشىندە 2024 جىلى توپ مۇشەلەرى ازىرلەگەن ينسۋلتكە قارسى جوباسى ەلىمىزدىڭ ۇزدىك ساۋىقتىرۋ جوباسى قاتارىنا ەندى. كومەك پەن قولداۋعا مۇقتاج جاندارعا بار ىنتا-جىگەرلەرىمەن كومەكتەسىپ جۇرگەن ستۋدەنتتەر كوپ تاجىريبە جيناقتادى.
وڭىردەگى سانى از مەديتسينالىق باعىتتاعى ەرىكتىلەردىڭ ءداستۇر جالعاستىعى ۇزىلمەي كەلەدى. الدىڭعىلارىنىڭ ءىسى – كەيىنگىلەرگە ۇلگى. ەرىكتى جاستاردىڭ ومىرلىك باعدارى ايقىن, قايىرىمدىلىق پەن ىزگىلىك, مەيىرىمدىلىك – ولارعا قۇر ءسوز عانا ەمەس, ناتيجەسى كورىنەتىن ناقتى ءىس. ۆولونتەرلىك توپتاعى جاستاردىڭ باستى قاعيدالارى – ادامي قۇندىلىقتاردى ساقتاۋ, مۇقتاج جانعا قارايلاسۋ, قوعامدى ىزگىلەندىرۋگە ۇلەس قوسۋ.
اقتوبە وبلىسى