ۇكىمەت باسشىسى «ارسەلورميتتال تەمىرتاۋ» اق-نىڭ 3-دومنا پەشىنىڭ جۇمىسىمەن تانىستى, سونداي-اق وبلىس جانە كاسىپورىن باسشىلىعىمەن ونەركاسىپ قاۋىپسىزدىگىن قامتاماسىز ەتۋ ماسەلەلەرىن تالقىلادى, دەپ حابارلايدى Egemen.kz.
ءاليحان سمايىلوۆ مەتاللۋرگيا قاۋىپتىلىگى اسا جوعارى ءوندىرىس سالاسى ەكەنىن اتاپ ءوتتى. بۇل رەتتە «ارسەلورميتتال تەمىرتاۋدا» اتالعان پروبلەما وتكىر بولىپ تۇر, ال كاسىپورىندا جۇرگىزىلىپ جاتقان قاۋىپسىز ەڭبەك جاعدايلارىن قامتاماسىز ەتۋ شارالارى جاعدايدى تۇبەگەيلى جاقسارتۋعا مۇمكىندىك بەرىپ وتىرعان جوق.
ۇكىمەت باسشىسىنىڭ پىكىرىنشە, تەحنولوگيالىق پروتسەستەردى جاڭعىرتۋعا, ونىڭ ىشىندە مورالدىق تۇرعىدا ابدەن توزىعى جەتكەن جابدىقتاردى جاڭارتۋعا بولىنگەن ينۆەستيتسيالار جەتكىلىكسىز. بۇل – وندىرىستەگى اپاتتىق جاعدايلاردىڭ تۋىنداۋىنا اكەلەتىن باستى سەبەپتەردىڭ ءبىرى.
«جىل سايىن وندىرىستە 10-12 ادام مەرت بولادى. ءبىز بۇل جاعدايعا كونە المايمىز. جابدىقاردىڭ ابدەن توزىعى جەتكەن, جاڭعىرتۋعا سالىناتىن ينۆەستيتسيالار دەڭگەيى باسقا كاسىپورىندارمەن سالىستىرعاندا 2-3 ەسە تومەن. مۇنى تۇزەتۋ كەرەك. ينۆەستيتسيا كولەمىن كەزەڭ-كەزەڭمەن ارتتىرىپ, ەڭ الدىمەن, قىزمەتكەرلەردىڭ قاۋىپسىزدىگىن قامتاماسىز ەتۋ كەرەك», دەدى ءا. سمايىلوۆ كومپانيا باسشىلىعىنا.
سونىمەن قاتار پرەمەر-مينيستر ەكولوگيالىق قاۋىپسىزدىكتى قامتاماسىز ەتۋ ماسەلەلەرىنە نازار اۋداردى.
«كۇن تاربىندەگى ەكولوگيالىق ماسەلەلەر وتكىر تۇر. مەملەكەت باسشىسى ءبىزدىڭ الدىمىزعا ءتيىستى مىندەتتەر قويىپ وتىر. سوندىقتان بۇل ماسەلە بويىنشا بىرلەسىپ جۇمىس ىستەۋىمىز كەرەك», دەدى ول.
وسىعان بايلانىستى ۇكىمەت باسشىسى كاسىپورىن باسشىلىعىن وندىرىستەگى جازاتايىم وقيعالاردىڭ الدىن الۋ جانە ەكولوگيالىق مىندەتتەمەلەردى ساقتاۋ بويىنشا پارمەندى شارالار ازىرلەۋگە شاقىردى.
بۇدان كەيىن ءاليحان سمايىلوۆ «ليندە گاز قازاقستان» جشس ونەركاسىپتىك گاز ءوندىرۋ زاۋىتىنىڭ قىزمەتىمەن تانىستى. زاۋىت مەملەكەت باسشىسىنىڭ گەرمانياعا ساپارى كەزىندە ىنتىماقتاستىق تۋرالى مەموراندۋمعا قول قويىلعاننان كەيىن ىسكە قوسىلعان.
«بۇل ورايدا ەكى ەل اراسىنداعى ۋاعدالاستىقتار تابىستى ىسكە اسىرىلىپ جاتقانىن كورۋگە بولادى. بۇل ءبىزدىڭ ەلگە ينۆەستيتسيا سالۋدى قاراستىراتىن باسقا شەتەلدىك كومپانيالار ءۇشىن جاقسى ىنتالاندىرۋ بولماق», دەدى پرەمەر-مينيستر.
ءاليحان سمايىلوۆ كومپانيانىڭ كومىرقىشقىل گازى شىعارىندىلارىن ازايتۋ جونىندەگى شەشىمدەرى ەلىمىزدىڭ باسقا وڭىرلەرىندەگى مەتاللۋرگيا جانە حيميا زاۋىتتارىندا, مۇناي-گاز جانە ەنەرگەتيكا سالالارىنىڭ كاسىپورىندارىندا ءساتتى قولدانىلۋى مۇمكىن ەكەنىن ايتتى.
سونداي-اق ۇكىمەت باسشىسى تەمىرتاۋدا بالالاردى تاربيەلەۋ مەن دامىتۋدىڭ جاقسارتىلعان باعدارلاماسىن ىسكە اسىراتىن «جاس تالانتتار اكادەمياسى» بالاباقشاسىنا باردى.
بيىل رەسپۋبليكا بويىنشا 322 جاڭا بالاباقشانى ىسكە قوسۋ جوسپارلانعان, ونىڭ ىشىندە 14 بالاباقشا قاراعاندى وبلىسىندا ورنالاسقان.
پرەمەر-مينيستر ءاربىر بالاعا مەكتەپكە دەيىنگى ساپالى ءبىلىم بەرىپ, تاربيەلەۋ ءۇشىن مەملەكەتتىك-جەكەشەلىك ارىپتەستىكتى دامىتۋ جانە بيزنەستى ىنتالاندىرۋ بويىنشا جۇيەلى جۇمىس جالعاساتىنىن اتاپ ءوتتى.
ايانا توعانبەك