ءاليحان سمايىلوۆ جۇمىس ساپارىمەن قاراعاندى وبلىسىنا باردى

ءاليحان سمايىلوۆ وڭىردە بىرقاتار ونەركاسىپتىك, ينفراقۇرىلىمدىق جانە الەۋمەتتىك نىسانداردى ارالاپ, تەمىرتاۋ جانە ساران قالالارىندا جاڭا جوبالاردىڭ ىسكە اسىرىلۋ بارىسىمەن تانىسادى. سونداي-اق قاراعاندى وبلىسىنىڭ كەشەندى الەۋمەتتىك-ەكونوميكالىق دامۋى جونىندە كەڭەس وتكىزۋ جوسپارلانعان. 

ۇكىمەت باسشىسى وڭىردە ءبىرىنشى كەزەكتە نۇر-سۇلتان جانە الماتى قالالارىن بايلانىستىراتىن «ورتالىق-وڭتۇستىك» حالىقارالىق ترانزيتتىك ءدالىزىنىڭ ءبىر بولىگى «قاراعاندى-بالقاش-سارىشاعان» اۆتوجولىن (1492,4-2005 كم ۋچاسكەسى) رەكونسترۋكتسيالاۋ بارىسىمەن تانىستى. 

«قازاۆتوجول» ۇك» اق باسقارما توراعاسى مەيىرحات قاسىمباەۆتىڭ دەرەكتەرى بويىنشا, جوبا 2023 جىلدىڭ جەلتوقسانىندا تولىق اياقتالادى. 

ونىڭ ايتۋىنشا, بيىل جول جامىلعىسىنىڭ قۇرىلىمدىق قاباتتارىن توسەۋ, جاساندى قۇرىلىستاردى مونتاجداۋ جانە جول-قۇرىلىس ماتەريالدارىن دايىنداۋ جۇمىستارى جالعاسادى. ماسەلەن, رەسپۋبليكالىق ماڭىزى بار «قاراعاندى-بالقاش» جانە «بالقاش-بۋرىلبايتال» اۆتوجولدارىندا كەڭ اۋقىمدى جول-قۇرىلىس جۇمىستارى جۇرگىزىلۋدە. جۇمىستار بارلىق 8 ۋچاسكەدە قايتا باستالدى. 

سونىمەن قاتار كولىك قوزعالىسى اينالما جانە توپىراق توسەلگەن جولدارمەن جۇزەگە اسىرىلاتىن ۋچاسكەلەردىڭ سانىن قىسقارتۋعا باسا نازار اۋدارىلادى. رەكونسترۋكتسيالاۋ جۇمىستارى اياقتالعاننان كەيىن بۇل تراسسالار ءتورت جولاقتى ءى تەحنيكالىق ساناتقا سايكەس كەلەدى.

«جوبا جول ءجۇرۋ ۋاقىتىن ايتارلىقتاي قىسقارتىپ, قاۋىپسىز جانە جايلى قوزعالىستى قامتاماسىز ەتەدى. جاڭارتىلعان اۆتوجول بالقاش كولىنىڭ تۋريستىك كلاستەرىن دامىتۋدىڭ درايۆەرىنە اينالادى جانە جاڭا جۇمىس ورىندارىن قۇرۋعا ىنتالاندىرادى», دەدى ءاليحان سمايىلوۆ. 

قاراعاندى وبلىسىنىڭ اكىمى جەڭىس قاسىمبەك ۇكىمەتتىك دەلەگاتسيا مۇشەلەرىن ءوڭىردىڭ جول-كولىك ينفراقۇرىلىمىن دامىتۋ بارىسى تۋرالى حاباردار ەتتى.

ۇكىمەت باسشىسى باياندامامەن تانىسىپ, وبلىس باسشىلىعىنا بىرقاتار ءتيىستى تاپسىرما بەردى.