اتىراۋدا تەپولوۆوز قاعىپ كەتكەن 17 جاستاعى ءجاسوسپىرىم جەدەل جاردەم كولىگىندە كوز جۇمدى, دەپ حابارلايدى Egemen.kz.
اتىراۋ تەمىر جول ستانتسياسىنداعى جەلىلىك پوليتسيا ءبولىمىنىڭ حابارلاۋىنشا, قايعىلى وقيعا كەشە, 6 شىلدەدە ساعات 17:00 شاماسىندا بولعان. جەرگىلىكتى كوللەدجدىڭ ستۋدەنتى جولدى قىسقارتۋ ءۇشىن «قارا دەپو» شاعىن اۋدانىنداعى تەمىرجولدى كەسىپ وتپەك بولعان. ءجاسوسپىرىمدى «اقجايىق-تەڭدىك» تەمىرجول وتكەلىندە تەپلوۆوز قاعىپ كەتتى.
ءماشينيستىڭ ايتۋىنشا, تەمىرجول بويىندا كەلە جاتقان ادامدى بايقاعان. الايدا, تەجەگىشتى باسقانىمەن, تەپلوۆوزدى توقتاتۋعا ۇلگەرمەگەن.
«قازىر اتالعان دەرەككە بايلانىستى قر قىلمىستىق كودەكسى 344-بابىنىڭ 2-بولىگىمەن (ابايسىزدا ادام ولىمىنە اكەپ سوققان تەمىر جول كولىگى قوزعالىسى نەمەسە ونى پايدالانۋ قاۋىپسىزدىگى قاعيدالارىن بۇزۋ) سوتقا دەيىنگى تەرگەۋ جۇرگىزىلىپ جاتىر. وزگە اقپارات قر قىلمىستىق-پروتسەستىك كودەكسىنىڭ 201-بابىنىڭ تالاپتارىنا سايكەس تەرگەۋ مۇددەسىنە وراي جاريا ەتۋگە جاتپايدى», دەپ حابارلادى كولىكتەگى پوليتسيا دەپارتامەنتىنىڭ ءباسپاسوز قىزمەتى.
«قارا دەپو» – اتىراۋ قالاسىنداعى شاعىن اۋدانداردىڭ ءبىرى. تۇرعىندار بىرنەشە جىلدان بەرى تەمىرجول ۇستىنەن وتكەل سالۋ ماسەلەسىن قوزعاپ كەلەدى. جەرگىلىكتى اكىمدىك 3 جىل بۇرىن «قارا دەپو» مەن «حيميكتەر» كەنتى ارالىعىندا جاياۋ جۇرگىنشىلەر كوپىرىن سالۋ جوباسى قولعا الىناتىنىن حابارلاعان ەدى. الايدا, جوبا ىسكە اسىرىلعان جوق.