استانا. 28 ءساۋىر. قازاقستان حالقىنىڭ بىرلىگى كۇنى مەرەكەسىنە وراي استانادا كوپشىلىكتىڭ كوڭىلىن كوتەرىپ, جان سارايىن اشار مادەني ءىس-شارالار مولىنان ازىرلەنۋدە. بۇل تۋرالى astana.gov.kz سايتى حابارلادى.
تاراتا ايتار بولساق, 1 مامىردا الدىمەن «قازاق ەلى» مونۋمەنتىنىڭ الدىندا حالىقتىق سەرۋەن ۇيىمداستىرىلادى. بۇدان كەيىن وسى مونۋمەنتتىڭ الدىنداعى الاڭدا ءتۇرلى سپورتتىق سايىستار, كورمەلەر مەن جارمەڭكەلەر, قويىلىمدار, فەستيۆالدار مەن كونتسەرتتەر قالا تۇرعىندارى مەن قوناقتارىنىڭ نازارىنا ۇسىنىلماق.
اstana.gov.kz سايتىنىڭ حابارلاعانىنداي, الاڭعا 3 ساحنا ورناتىلادى. 1 مامىر كۇنى ساعات 11.00-14-00 ارالىعىندا نەگىزگى ساحنادا شىعارماشىلىق ۇجىمداردىڭ 700-دەن استام ءارتىسى ونەر كورسەتپەك.
جالپى, بۇل مەرەكەلىك ششارانىڭ ەڭ باستى 5 ءنومىرى بولادى. ولار: «قازاقستان حالقىنىڭ بىرلىگى كۇنى-2014» ءانۇرانى», «وتان داۋسى وسىنداي», «قازاقستان بولاشاعى» جانە «قازاقستان حالقىنىڭ ءبيى».
ايتۋلى دۋماندا ەلىمىزدىڭ جانە وزگە مەملەكەتتەردىڭ الدىڭعى قاتارلى بي ۇجىمدارى ونەرلەرىن جۇرتشىلىق نازارىنا ۇسىنباق. بۇلاردى اتاپ وتەر بولساق, وسكەمەننىڭ «فلەش» شوۋ-بالەتى, قاراعاندى قالاسىنىڭ «ۇشقىن» بي ءانسامبلى, شىمكەنتتىڭ «شامسينۋر» جانە «ايگولەك» بي انسامبلدەرى, سونىمەن قاتار, رەسەي فەدەراتسياسى شەشەنستان رەسپۋبليكاسىنىڭ «ۆايناح» بي ءانسامبلى مەن ومبى قالالىق (رەسەي) مەملەكەتتىك بي جانە ءان ءانسامبلى.
سونداي-اق, تبيليسي قالاسىنىڭ گرۋزين ۇلتتىق حورى مەن انكارانىڭ تۇرىك ۇلتتىق قورى كورەرمەنگە مەرەكەلىك كوڭىل-كۇي سىيلاماق.
بۇدان بولەك, شەتەلدىك جانە ەلىمىزدىڭ جەك اسپاپتا ورىنداۋشىلارى دا ءوز ونەرلەرىن ورتاعا سالادى دەپ جوسپارلانۋدا. ولار: زيتحەر (گەرمانيا), چجۋ (قىتاي), مادان واك ء(ۇندىستان) جانە قورلان كارتەنباەۆ (قازاقستان).
ارينە, ەسترادا ونەرپازدارىنسىز مەرەكەنىڭ ءسانى كەلمەسى انىق.سوندىقتان, كونتسەرتتىك باعدارلامانى وتاندىق ەسترادا جۇلدىزدارى جالعاستىرادى. ولاردىڭ قاتارىندا ارداق بالاجان, ينديرا راسىلحان, «الاش ۇلى» توبى, قازاق قورى جانە قازاق ۇلتتىق ونەر ۋنيۆەرسيتەتىنىڭ جەكە ورىنداۋشىلارى بار. سونداي-اق, بۇلارمەن بىرگە وزبەكستاننىڭ «ياللا» توبى دا ساحناعا شىعادى دەپ كۇتىلۋدە.
ال الاڭداعى شاعىن ساحنادا ساعات 10.00-17-00 ارالىعىندا استانالىق 23 ەتنومادەني بىرلەستىكتىڭ كونتسەرتتىك باعدارلامالارى كورەرمەننىڭ كوزايىمىنا اينالماق.
تاعى ءبىر ەرەكشە توقتالا كەتەر ءجايت, جوعارىدا ايتىپ وتكەنىمىزدەي, مەرەكەلىك شارا بارىسىندا سپورتتىق سايىستاردى وتكىزۋ ۇمىت قالمايدى. ماسەلەن, ارقان تارتۋ, ارمرەستلينگ, گىر كوتەرۋ, توعىزقۇمالاق جانە تاعى باسقا دا سپورت تۇرلەرىنە باسەكەلەر ۇيىمداستىرىلادى.
سونىمەن بىرگە, 15 ساۋدا نۇكتەسىندە ازىق-ت ۇلىك ساۋداسى جۇرگىزىلەدى.
بۇل ايتۋلى شاراعا 100 مىڭنان استام ادام قاتىسادى دەپ كۇتىلۋدە.
جولدىباي بازار.
دەرەككوز: astana.gov.kz.
فوتو: Alashainasy.kz.