ماڭعىستاۋدا تۇرعىندار سانى تابيعي ءوسىم جانە كوشىپ كەلۋشىلەر ەسەبىنەن جىلدام ءوسىپ كەلەدى. بيىل كوكتەمدە وبلىستا حالىق سانى 748 471 ادامعا جەتىپ, بىلتىرمەن سالىستىرعاندا 22 مىڭعا ءوستى. ارينە, وبلىستا جۇمىسسىزدىق, اۋىز سۋدىڭ جەتىسپەۋى سىندى كۇردەلى ماسەلەلەر تۋىنداپ تۇرعاننىڭ وزىندە حالىق سانىنىڭ ارتۋى ۇلكەن قۋانىش.
ماڭعىستاۋدا اۋىل تۇرعىندارىنىڭ قالاعا قونىس اۋدارۋىندا بەلسەندىلىك بايقالعانمەن, ازىرگە قالا تۇرعىندارىنىڭ سانى اۋىلدىقتاردان از ەكەن. ياعني 700 مىڭنان استام تۇرعىننىڭ 302 697-ءى قالادا, 445 774-ءى اۋىلدىق جەرلەردە تۇرادى. «اۋىل – التىن بەسىك» دەيتىن قازاق ءۇشىن اۋىلدى جوعالتپاۋدىڭ ماڭىزى زور. بۇل تۇرعىدان كەلگەندە ستاتيستيكالىق دەرەكتەر وڭىردە حالىق سانى جاعىنان اۋىلدىڭ ءالى دە باسىمدىققا يە ەكەنىن بايقاتتى. بىراق تۇرعىندار سانىنىڭ اقتاۋ جانە جاڭاوزەن قالالارىندا, سونداي-اق اقتاۋ توڭىرەگىندەگى تۇپقاراعان اۋدانىنا قاراستى اۋىلداردا كوبىرەك وسكەندىگىنە قاراپ, بۇل باعىتتا ءبارىبىر قالالارعا كوشۋ ءۇردىسىنىڭ بار ەكەنىن جوققا شىعارا المايمىز.
– جىل باسىنان بەرى وبلىستىڭ بارلىق اۋداندارىندا حالىق سانى ارتتى. بىراق تۇرعىندار سانىنىڭ ەڭ ەلەۋلى ءوسۋى اقتاۋ قالاسىندا – 218 197 ادامعا, تۇپقاراعان اۋدانىندا – 342 ادامعا, جاڭاوزەن قالاسىندا حالىق سانى – 1 445 ادامعا, بەينەۋ اۋدانىندا – 295 ادامعا, ماڭعىستاۋ اۋدانىندا – 56 ادامعا, قاراقيا اۋدانىندا 13 ادامعا كوبەيگەنى بايقالدى, دەدى ماڭعىستاۋ وبلىستىق ستاتيستيكا دەپارتامەنتىنىڭ باسشىسى ريمما ۋتيۋشەۆا.
تابيعي ءوسىم بويىنشا ماڭعىستاۋ وبلىسى بىرنەشە جىل بويى رەسپۋبليكادا الدىڭعى ورىندا كەلەدى. بيىل جىل باسىنان بەرى 3 719 ۇل, 3 484 قىز بالا, بارلىعى 7 203 نارەستە دۇنيەگە كەلگەن. ارينە, حالقىنىڭ سانى كوپ اقتاۋ قالاسى بۇل تۇرعىدا باسىمدىققا يە, دۇنيە ەسىگىن اشقان بارلىق نارەستەنىڭ 2 349-ى اقتاۋ قالاسىنىڭ ەنشىسىندە.
حالىق سانىنىڭ ارتقانى – جاڭالىق, جاقسىلىق. بۇل ءوز كەزەگىندە جەرگىلىكتى باسشىلىققا وڭىردە تۋىنداپ تۇرعان ماسەلەلەردى جىلدارعا جۇك ەتپەي تەزىرەك شەشۋ قاجەتىن العا تارتارى انىق.
ماڭعىستاۋ وبلىسى