اعزا الماستىرۋعا مۇقتاجدار سانى ارتقان

دەنساۋلىق ساقتاۋ مينيسترلىگىنىڭ مالىمەتىنشە, 2023 جىلى قازاقستاندا 236 اعزا ترانسپلانتاتتاۋ وتاسى جاسالعان. 2024 جىلى بۇل كورسەتكىش 260-قا جەتسە, 2025 جىلى 310 وپەراتسيا جۇرگىزىلگەن. بۇل – سوڭعى جىلدارداعى ەڭ جوعارى ناتيجە.

ال 2026 جىلدىڭ ءى توقسانىندا ەلىمىزدە 77 ترانسپلانتاتتاۋ جاسالدى. ونىڭ ىشىندە: – 55 وپەراتسيا ءتىرى دونورلاردان; – 22 وپەراتسيا قايتىس بولعان دونورلاردان جۇزەگە اسقان.

ترانسپلانتاتتاۋ قۇرىلىمىندا بۇيرەك, باۋىر, جۇرەك, وكپە جانە كوزدىڭ ءمولدىر قابىعىن الماستىرۋ وتالارى بار.

سالادا بالالار ترانسپلانتولوگياسىن دامىتۋعا دا ەرەكشە نازار اۋدارىلىپ وتىر. 2025 جىلى بالالارعا 16 اعزا ترانسپلانتاتتاۋ وتاسى جاسالعان.

سوعان قاراماستان, ترانسپلانتاتتاۋدى قاجەت ەتەتىن پاتسيەنتتەر سانى ازايماي تۇر. قازىرگى ۋاقىتتا كۇتۋ تىزىمىندە 4 600-دەن استام ادام, ونىڭ ىشىندە 119 بالا بار.

ەڭ جوعارى سۇرانىس بۇيرەك ترانسپلانتاتتاۋىنا تيەسىلى. قازىر بۇيرەك الماستىرۋدى 4 102 پاتسيەنت كۇتىپ وتىر. سونىمەن قاتار: – باۋىر ترانسپلانتاتتاۋىن – 267 ادام; – جۇرەك ترانسپلانتاتتاۋىن – 198 ادام; – وكپە ترانسپلانتاتتاۋىن 33 پاتسيەنت كۇتىپ وتىر.

2023 جىلمەن سالىستىرعاندا كۇتۋ پاراعىنداعى پاتسيەنتتەر سانى 3,9 مىڭنان 4,6 مىڭ ادامعا دەيىن وسكەن.

مامانداردىڭ ايتۋىنشا, ترانسپلانتولوگيانى دامىتۋدىڭ نەگىزگى تەتىكتەرىنىڭ ءبىرى – قايتىس بولعاننان كەيىنگى دونورلىق جۇيەسىن جەتىلدىرۋ جانە قوعامدا اعزا دونورلىعى مادەنيەتىن قالىپتاستىرۋ.

سوڭعى جىلدارى الەۋەتتى قايتىس بولعان دونورلار سانى دا ارتقان. ماسەلەن, 2023 جىلى ولاردىڭ سانى 49 بولسا, 2025 جىلى 186-عا جەتكەن. ال 2026 جىلدىڭ ءى توقسانىندا تاعى 55 الەۋەتتى دونور انىقتالعان.

سونىمەن قاتار ەل تۇرعىندارىنىڭ قايتىس بولعاننان كەيىنگى دونورلىققا قاتىستى ۇستانىمى eGov پورتالى ارقىلى ءجيى تىركەلە باستاعان. ەگەر 2023 جىلى جۇيەدە 38,7 مىڭ ەرىك ءبىلدىرۋ تىركەلسە, 2026 جىلدىڭ ساۋىرىندەگى جاعداي بويىنشا بۇل كورسەتكىش 156 مىڭنان اسقان.

الايدا قايتىس بولعاننان كەيىنگى دونورلىققا كەلىسىم بەرگەندەر سانى ازىرگە تومەن دەڭگەيدە قالىپ وتىر. قازىرگە دەيىن 15,1 مىڭ ازامات كەلىسىمىن تىركەسە, 140,8 مىڭ ادام دونورلىقتان باس تارتقان.

ەلىمىزدە العاش رەت 15 جاستاعى بالاعا جۇرەك ترانسپلانتاتسياسى جاسالدى