ماڭعىستاۋعا تۋريستەردىڭ قىزىعۋشىلىعى جوعارى. وبلىستىق تۋريزم باسقارماسىنىڭ باسشىسى دانيار ۋتەشوۆتىڭ ايتۋىنشا, بۇل جاققا جىل باسىنان بەرى 55 مىڭعا جۋىق تۋريست كەلگەن.
ناقتىراق ايتساق, وڭىرگە جىل باسىنان بەرى 54 575 ادام كەلگەن جانە بۇل وتكەن جىلمەن سالىستىرعاندا 2 مىڭ ادامعا ارتىق.
– وڭىردە تۋريستەر توقتايتىن ورىندار سانى 98-گە جەتتى, نومىرلەر سانى – 3 810. جالپى, جىل باسىنان بەرى 1,2 ملرد تەڭگەگە قىزمەت كورسەتىلگەن. كورسەتكىش 1,2 ەسەگە ءوستى. سونىمەن قاتار سالاعا تارتىلعان ينۆەستيتسيالار دا ارتقان. ماسەلەن, ويىن-ساۋىق, تاماقتانۋ سىندى قىزمەت تۇرلەرىنەن 2021 جىلدىڭ قورىتىندىسى بويىنشا 43,8 ملرد تەڭگەنى, 2022 جىلدىڭ قاڭتار-ءساۋىر ايلارىندا 3,97 ملرد تەڭگەنى قۇرادى, دەدى د.ۋتەشوۆ.
بيىل تۋريزم سالاسىنا قاتىستى قۇنى 40 ملرد تەڭگەدەن استام 6 جوبانى ىسكە قوسۋ جوسپارلانعان.
– 2022-2025 جىلدارى مىڭنان استام جۇمىس ورىندارىن قۇرا وتىرىپ, جالپى سوماسى 100 ملرد تەڭگەگە 16 جوبانى جۇزەگە اسىرۋ جوسپارلانعان. وسىلايشا, تۋريزم سالاسىنداعى جوبالاردى ىسكە اسىرۋ وڭىرگە قوسىمشا ينۆەستيتسيالار تارتۋعا, جاڭا تۋريستەر اعىنىنىڭ وسۋىنە مۇمكىندىك بەرەدى. جاڭا جۇمىس ورىندارىن اشۋدى, سالىق اۋدارىمدارىنىڭ ءتۇسۋىن قامتاماسىز ەتەدى. ءتۋريزمنىڭ ءبىر سالاسىن عانا ەمەس, ەكونوميكانىڭ باسقا دا ارالاس سالالارىن دامىتۋعا سەرپىن بەرەدى. سايىپ كەلگەندە, ماڭعىستاۋ وبلىسىنىڭ الەۋمەتتىك-ەكونوميكالىق دامۋىنا وڭ سەرپىن بەرەدى, – دەدى دانيار ۋتەشوۆ.
ماڭعىستاۋدا ءتۋريزمدى دامىتۋ كۇن تارتىبىندەگى ماسەلە, سوندىقتان بۇل باعىتتاعى جۇمىستاردى جانداندىرا جۇرگىزۋ ماڭىزدى.
ماڭعىستاۋ وبلىسى