«ازاماتتارعا ارنالعان ۇكىمەت» مەملەكەتتىك كورپوراتسياسى حقو وپەراتورلارىن BI Group جانە G-Park قۇرىلىس كومپانيالارىنىڭ كەڭسەلەرىنە ورنالاستىردى.
بۇل جوبا ازىرگە نۇر-سۇلتان, الماتى جانە شىمكەنت قالالارىندا ەنگىزىلدى. ەلەكتروندى تسيفرلى قولتاڭباسى نەمەسە ينتەرنەتكە قولجەتىمدىلىگى جوق كليەنت سول جەردە وفلاين رەجىمدە جىلجىمايتىن م ۇلىك بويىنشا مامىلە جاساي الادى. بۇل جاڭا جوبا ازاماتتاردىڭ ۋاقىتىن عانا ەمەس, قارجىسىن دا ۇنەمدەيدى. سەبەبى حقو ارقىلى كورسەتىلەتىن قىزمەت قۇنى 7 100 تەڭگەنى قۇرايدى, ال نوتاريۋستاردا بۇل 6 ەسە قىمبات.
2022 جىلدىڭ سوڭىنا دەيىن بۇل جوبانى ەنگىزەتىن قۇرىلىس كومپانيالارىنىڭ ءتىزىمىن كەڭەيتۋ جوسپارلانىپ وتىر. ەستەرىڭىزگە سالا كەتەيىك, وسىدان ءبىر اپتا بۇرىن «ازاماتتارعا ارنالعان ۇكىمەت» مەملەكەتتىك كورپوراتسياسى «وتباسى بانك» اق-مەن («بايتەرەك» حولدينگىنىڭ ەنشىلەس ۇيىمى) بىرلەسىپ, Blockchain تەحنولوگياسى ارقىلى تۇرعىن ءۇيدى جالعا بەرۋ شارتىن ونلاين رەسىمدەۋ جوباسىن ىسكە قوسقان بولاتىن.
ەگەر بۇرىن كليەنتتەر تىزىمدەگى قۇجاتتاردى جيناپ, ونى اكىمدىككە وتكىزگەن سوڭ تاعى 15 جۇمىس كۇنىندە كۇتەتىن. ال جاڭا قىزمەتتىڭ ناتيجەسىندە بۇكىل پروتسەسس 2 ساعاتتاي عانا ۋاقىت الادى. «ازاماتتارعا ارنالعان ۇكىمەت» مەملەكەتتىك كورپوراتسياسى مەملەكەتتىك قىزمەت كورسەتۋ بويىنشا بىرىڭعاي پروۆايدەر بولىپ تابىلادى. ول ءتورت نەگىزگى باعىت بويىنشا – حالىققا قىزمەت كورسەتۋ, الەۋمەتتىك قامسىزداندىرۋ, جەر كاداسترى, جىلجىمايتىن م ۇلىك بويىنشا بارلىق مەملەكەتتىك قىزمەتتەردىڭ 95,9% كورسەتەدى.