استانا. 24 ءساۋىر. بۇگىن بولگاريانىڭ استاناسى – سوفيا قالاسىندا بوكستان جاستار اراسىنداعى الەم چەمپيوناتى مارەگە جەتتى. وندا فينالدا ونەر كورسەتكەن 4 قازاقستاندىقتىڭ ەكەۋى التىن, ەكەۋى كۇمىس جۇلدەگەر اتاندى. بۇل تۋرالى egemen.kz حابارلادى.
وسى جۇلدەلەرىنىڭ ارقاسىندا قازاقستاننىڭ جىگىتتەر اراسىنداعى جاستار قۇراماسى كوماندالىق ەسەپتە ءبىرىنشى ورىندى جەڭىپ الدى. بۇلاردان بولەك, ءبىر قىزىمىز – الۋا بالقىبەكوۆا (51 كگ) قولا مەدالگە قول جەتكىزدى.
فينالدىق شايقاستى 49 كيلوعا دەيىنگى سالماقتاعى ءبىزدىڭ شالقار ايقىنباي (2-سۋرەتتە) مەن وزبەك سۋلەيمان لاتيپوۆ باستادى. ۇرىس قازاقستاندىق بوكسشىنىڭ باسىمدىلىعىمەن ءوتتى. ناتيجەسىندە ول 3:0 ەسەبىمەن جەڭىسكە جەتتى. وسىلايشا شالقار چەمپيوناتتىڭ العاشقى التىن جۇلدەگەرى اتاندى.
وكىنىشتىسى, قازاقستاندىقتار ساپىنان شىققان كەلەسى بوكسشىمىز – سۇلتان زاۋىربەك كۋبالىق جاۆەر يبانەسكە 0:3 ەسەبىمەن ەسە جىبەرىپ قويدى. سوندىقتان وعان بۇيىرعانى كۇمىس مەدال بولدى.
جاسىراتىنى جوق, جانكۇيەرلەر 60 كيلوعا دەيىنگى سالماقتاعى ابىلايحان جۇسىپوۆتەن (3-سۋرەتتە) وسى بىرىنشىلىك باستالعالى التىن مەدال كۇتكەن ەدى. ولاردىڭ ۇمىتىنە ساي بوكسشىمىز تۋرنيردە شايقاستان شايقاسقا جاقسى قارقىن قوسا بەردى. ول فينالدا دا جاقسى ايقاستى. بۇعان ونىڭ رۋمىنيالىق ارسەن مۋستافامەن جەكپە-جەكتى 3:0 ەتىپ اياقتاعانى دا دالەل. ءسويتىپ, كومانداعى ەكىنشى التىن جۇلدەنى ابىلايحان اكەلدى. وسى كەزگە دەيىن ول الەمنىڭ 2013 جىلعى جاسوسپىرىمدەر اراسىنداعى, ازيانىڭ 2014 جىلعى جاستار اراسىنداعى چەمپيونى اتانىپ ۇلگەرگەن بولاتىن.
بۇدان كەيىن 81 كيلوعا دەيىنگە سالماقتاعى قازاقستاندىق ۆاديم كازاكوۆ بولگار بلاگوي نايدەنوۆتان 0:3 بولىپ ۇتىلىپ قالدى. قۇراماداعى ەكىنشى كۇمىس مەدال وسىلاي كەلدى.
دامير قوجامقۇل.
دەرەككوز: egemen.kz,
فوتو: ۆكونتاكتە.