16 ماۋسىم كۇنى نۇر-سۇلتان قالاسىنداعى «جاستار» سارايىندا مەديتسينا قىزمەتكەرلەرى كۇنىنە وراي اقحالاتتى ابزال جانداردى سالتاناتتى تۇردە ماراپاتتاۋ ءراسىمى ءوتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
مەديتسينا قىزمەتكەرلەرى كۇنىنە ورايلاستىرىلعان ءىس-شارا «التىن جۇرەك» ۇرانىمەن ءوتتى. «التىن جۇرەك» اتاۋى كوروناۆيرۋس ينفەكتسياسىمەن توقتاۋسىز كۇرەس كەزەڭىندە اقحالاتتى مامانداردىڭ كورسەتكەن ەرلىگى مەن ەڭبەگىنە ارنالعان. سول سياقتى بۇل تاقىرىپ ەلدىڭ دەنساۋلىعىن نىعايتۋ ءۇشىن موينىنداعى بورىشىن وتەۋ جولىنداعى ابزال جانداردىڭ جاناشىرلىعىن, قامقورلىعىن بىلدىرەدى. سەبەبى سوڭعى 2 جىلدا مەديتسينا قىزمەتكەرلەرى COVID-19 ينفەكتسياسىمەن الدىڭعى شەپتە كۇرەستى.
سالتاناتتى ءىس-شاراعا قالا اكىمى التاي كولگىنوۆ, دەنساۋلىق ساقتاۋ ءمينيسترى اجار عينيات, پارلامەنت ءماجىلىسىنىڭ دەپۋتاتتارى, ۇلتتىق جانە رەسپۋبليكالىق ۇيىمداردىڭ, قالا ءماسليحاتىنىڭ وكىلدەرى قاتىستى.
قالا اكىمى التاي كولگىنوۆ ەلوردانىڭ دەنساۋلىق ساقتاۋ جۇيەسىن دامىتۋ جانە جاقسارتۋ جولىندا ءاربىر ماماننىڭ قوسقان ۇلەسىنە توقتالا كەلە ولاردىڭ كوروناۆيرۋس ينفەكتسياسىمەن كۇرەس كەزەڭىندەگى جۇمىسىن ەرەكشە اتاپ ءوتتى.
دەنساۋلىق ساقتاۋ جۇيەسىنىڭ 30-دان استام مامانى ديپلوم مەن توسبەلگىلەرمەن ماراپاتتالدى, سونداي-اق 8 نوميناتسيا بويىنشا جەڭىمپازدار انىقتالدى. ولاردىڭ ارقايسىسىنا 1 ملن تەڭگەدەن اقشالاي سەرتيفيكات جانە bestdoctor.kz مەديتسينالىق اقپاراتتىق پورتالىنىڭ ليميتتەلگەن اتاۋلى بەلگىلەرى تابىستالدى.
وتاندىق مەديتسينا جۇيەسىنىڭ دامۋىنا ەلەۋلى ۇلەس قوسقان اقحالاتتى ماماندار, قوعام قايراتكەرلەرى «ەڭبەك ارداگەرى», «قر دەنساۋلىق ساقتاۋ سالاسىنىڭ دامۋىنا قوسقان ۇلەسى ءۇشىن» جانە «قر دەنساۋلىق ساقتاۋ ءىسىنىڭ ۇزدىگى» مەدالدارىمەن ماراپاتتالدى.
سونداي-اق نۇر-سۇلتان قالاسى اكىمىنىڭ جانە دەنساۋلىق ساقتاۋ ءمينيسترىنىڭ اتىنان قۇرمەت گراموتالارى مەن العىس حاتتار تابىس ەتىلدى.
ءىس-شارا باستالعانعا دەيىن «جاستار» سارايىنىڭ ءبىرىنشى جانە ەكىنشى قاباتىندا «مەن جانە مەنىڭ دارىگەرىم» تاقىرىبىندا فوتوكورمە ۇيىمداستىرىلىپ, وندا ابزال جانداردىڭ جۇمىس ىستەپ جۇرگەن ساتتەرى, بالالار دارىگەرلەرىنىڭ فوتوسۋرەتتەرى جانە بالالار ستاتسيونارلارىندا ەمدەلىپ جاتقان كىشكەنتاي پاتسيەنتتەردىڭ سۋرەتتەرى كورىنىس تاپتى. سول سياقتى پەرفومانس (ونەر نىساندارى) ويلاپ شىعارىلىپ, وندا مەديتسينا قىزمەتكەرلەرىنىڭ ناۋقاستاردى ەمدەۋ بارىسى كورسەتىلدى.
سالتاناتتى جيىندا مەديتسينا قىزمەتكەرلەرى ماراپاتتالعان سوڭ كەش باعدارلاماسى بويىنشا ەلوردا مەديتسيناسىنىڭ تاۋەلسىزدىك جىلدارىنداعى تاريحى مەن دامۋى تۋرالى بەينەروليك كورسەتىلدى, سونىمەن قاتار COVID-19 پاندەمياسى كۇشەيىپ تۇرعان شاقتا قايتىس بولعان دارىگەرلەردى ەسكە الۋعا ارنالعان فيلم قويىلىپ, جينالعان قاۋىمنىڭ كوزىنە ەرىكسىز جاس كەلدى.