نۇر-سۇلتان قالاسىنىڭ اكىمدىگى 8 قۇرىلىس نىسانى ورنالاسقان 75 جەر ۋچاسكەسىن ساتىپ الادى. بۇل تۋرالى قالالىق تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ ايتتى, دەپ حابارلايدى Egemen.kz.
«بۇگىن قالالىق ءماسليحاتتىڭ قاراۋىنا 8 نىسان بويىنشا 75 جەر ۋچاسكەسىن ساتىپ الۋ تۋرالى جوبانى ۇسىنامىز. جەر ۋچاسكەلەرىنىڭ جالپى اۋدانى - 3 گەكتار. جوبانىڭ قۇنى - 713 ملن تەڭگە», دەدى ءانۋار سايپوۆ قالالىق ءماسليحاتتىڭ 25-ءشى كەزەكتەن تىس سەسسياسىندا.
بۇدان سوڭ باسقارما باسشىسى ساتىپ الىناتىن نىسانداردى اتادى.
ء«بىرىنشى نىسان - تاۋەلسىزدىك داڭعىلى مەن شارل دە گولل كوشەسىنىڭ قيىلىسىنداعى تۇرعىن ءۇي كەشەنى, ەكىنشىسى - شارل دە گولل جانە توقپانوۆ كوشەسى قيىلىسىنداعى قۇرىلىس نىسانى, ءۇشىنشىسى - ش. ايتماتوۆ كوشەسى بويىنشا قۇرىلىس, كەلەسى جوبا - ەسىل وزەنىنىڭ ارناسىن قايتا جوندەۋ. سول سەكىلدى رەسپۋبليكا داڭعىلى مەن التىنەمەل, قۇتپانوۆ, گەتە كوشەلەرىنىڭ قيىلىسىنداعى كوپپاتەرلى تۇرعىن ءۇي كەشەنى جانە قوسشىعۇل ۇلى كوشەسىندەگى 8 تۇرعىن ءۇيدى اباتتاندىرۋ جۇمىسى بار. قابانباي باتىر داڭعىلى مەن حۋسەين بەن تالال كوشەسىندەگى اكىمشىلىك عيمارات قۇرىلىسى جانە تۇران داڭعىلى مەن №227 كوشەسىنىڭ قيىلىسىندا ورنالاسقان اكىمشىلىك عيماراتتىڭ قۇرىلىسى دا وسى تىزىمگە كىرەدى», دەيدى ول.