ەڭ ۇزدىك مىڭ بالا انىقتالدى

ەلباسى اكادەمياسى وليمپيادانىڭ قورىتىندىسىنا قاتىستى ءباسپاسوز جيى­نىن وتكىزدى. بريفينگتە ءسوز العان ءبىلىم جانە عىلىم مينيسترلىگى جانىنداعى مەكتەپكە دەيىنگى جانە ورتا ءبىلىم بەرۋ كوميتەتىنىڭ باس ساراپشىسى مارات سۇلەيمەنوۆ:

– ءبىزدىڭ ۆەدومستۆو ەلباسى اكادەمياسىمەن بىرلەسە وتىرىپ, 3 جىل قاتارىنان اۋىل بالالارىنىڭ اراسىندا «مىڭ بالا» ۇلتتىق زياتكەرلىك وليمپياداسىن وتكىزىپ وتىر. بيىلعى ءبىلىم بايگەسى ءساتتى, ناتيجەلى ۇيىمداستىرىلدى. سايىس نەگىزىنەن اۋىلدىق جەرلەردەگى دارىندى بالالاردى انىقتاپ, ولارعا قولداۋ كورسەتۋدى كوزدەيدى. بيىلعى جارىستىڭ ەرەكشەلىگى – وتە كوپ وقۋشى قاتىسقانىندا. «مىڭ بالا» وليمپياداسى ەكى كەزەڭنەن تۇرادى. ءبىرىنشى كەزەڭ لوگيكالىق ويلاۋدى باعالاۋعا ارنالعان تاپسىرمالاردى قامتىدى. ەڭ جوعارى قورىتىندى بالل جيناعان 5 مىڭ وقۋشى وليمپيادانىڭ ەكىنشى كەزەڭىنە جولداما الدى. سونىڭ ىشىنەن ىرىكتەلگەن 1 مىڭ دارىندى بالا ۇزدىك دەپ تانىلدى. ونىڭ 500-ءى – 5-سىنىپتىڭ, 500-ءى – 6-سىنىپتىڭ وقۋشىلارى. 6-سىنىپتى بىتىرگەن جەڭىمپازدار مامانداندىرىلعان ءبىلىم بەرۋ ۇيىمدارىنا كونكۋرسسىز تۇسۋگە جولداما الدى, – دەدى.

مينيسترلىك وكىلىنىڭ ايتۋىنشا, جىلدان-جىلعا وڭىرلەردىڭ بەلسەندىلىگى ارتىپ كەلەدى. بيىلعى ناتيجەلەر بويىنشا قىزىلوردا, الماتى, باتىس قازاقستان وبلىستارىنان قاتىسۋ دەڭگەيى وتە جوعارى.

«ەلباسى اكادەمياسى» كورپوراتيۆتىك قورىنىڭ باسقارۋشى ديرەكتورى الينا حاماتدينوۆا ينتەرنەتتىڭ ساپاسىنا قاتىستى شاعىمدار, وتىنىشتەر كوپ تۇسكەنىن جەتكىزدى.

– تەستىلەۋ قاتىسۋشىنىڭ وقىتۋ تىلىن­دە, ياعني قازاق جانە ورىس تىلدەرىندە بول­دى. وليمپيادانىڭ ءبىرىنشى كەزەڭى وڭىرلەردەگى كەستەگە سايكەس ونلاين رەجىم­دە ءوتتى. وڭىرلەردىڭ 40 پايىزى ينتەرنەتپەن قامتىلماعانىن بىلەمىز, ينتەرنەت بولعان كۇننىڭ وزىندە ساپاسى ناشار. سوندىقتان ءبىر كۇندە 10 بالا عانا تاپسىرا الاتىنداي ارنايى كەستە جاسادىق. ويتكەنى بىلتىر بارلىق وڭىردەن ءبىر ۋاقىتتا جۇيەگە كىرگەندە, قاتىسۋشىلار جىلدامدىعى باياۋ ينتەرنەتتىڭ كەسىرىنەن ونلاين تاپسىرمادان وتە الماي قينالدى. تاۋلىك بويى جۇمىس ىستەيتىن سall-ورتالى­عىمىزعا الماتى, ماڭعىستاۋ, تۇركىستان وبلىستارىنداعى ينتەرنەتتىڭ ساپاسىنا قاتىستى شاعىمدار ءجيى ءتۇستى. بۇل اقپاراتتى ءتيىستى مينيسترلىككە بەرەمىز, – دەدى ا.حاماتدينوۆا.

قور ديرەكتورىنىڭ مالىمدەۋىنشە, جام­بىل وبلىسىنىڭ وقۋشىسى ۇپاي سانى بويىنشا ەڭ جاقسى ناتيجە كورسەتتى. ەكىنشى ورىندا قاراعاندى وبلىسىنىڭ بالاسى جانە ءۇشىنشى ورىندا سولتۇستىك قازاقستان وبلىسىنىڭ قاتىسۋشىسى تۇر. جەڭىمپازداردىڭ ءبىرى – ەلنار قوجاح­مەت اقمولا وبلىسىنداعى №2 قوسشى ور­تا مەكتەبىنىڭ 6-سىنىبىندا وقيدى. ول اتالعان بايقاۋعا 5-سىنىپتا دا قاتىسىپتى.

– ءار جىلى جاس ەرەكشەلىگىمىزگە, دەڭگەيىمىزگە قاراي تاپسىرما بەرىلدى. پاندەردىڭ ىشىندە ماتەماتيكا قيىنداۋ, وندا لوگيكالىق ەسەپتەر ءبىراز ويلانۋدى قاجەت ەتەدى. دەگەنمەن جاۋاپ تابۋعا بولادى. بولاشاقتا سانگەر بولعىم كەلەدى. وعان دا ماتەماتيكا كەرەك, سەبەبى كيىمدى پىشكەندە ولشەۋگە, تابىستى سا­ناۋعا, قاجەتتى ۋاقىتتى ەسەپتەۋگە ماتە­ما­تي­كا­­لىق داعدى عانا كومەكتەسە الا­دى. «مىڭ بالا» وليمپياداسىندا اعىل­شىن تىلى­نەن دە تەست تاپسىرامىز. مەنىڭ­شە, اعىل­شىن ءتىلى – بارلىق مامانعا كە­رەك­تى ءپان. مىسالى, ماعان شەتەلدەگى سانگەر­لەردىڭ جۇمىسىن كورىپ, تانىسۋعا, سايا­حات­­تاۋعا قاجەت بولادى. 130 مىڭنان اسا ادام­نىڭ ىشىنەن جەڭىپ شىعۋ ءۇشىن قاتى­سۋشىعا ارمان, ماقسات, تاباندىلىق كەرەك. مەن, مىسالى, وسى وليمپياداعا مىقتى مەكتەپتەردىڭ بىرىنە ءتۇسۋ ءۇشىن قاتىستىم, – دەيدى ە.قوجاحمەت.