ەلىمىزدە شاعىن جانە ورتا بيزنەستىڭ 40 پايىزى ىسكەر ايەلدەرگە تيەسىلى. ال كوپبالالى انالار سانى بويىنشا ەلىمىزدە كوش باستاپ تۇرعان تۇركىستان وبلىسىندا شامامەن 145 مىڭنان استام كاسىپكەر بولسا, 45 مىڭعا جۋىق شاعىن جانە ورتا بيزنەسكە ايەلدەر باسشىلىق جاسايدى. اسىرەسە قىز-كەلىنشەكتەردىڭ باسىم بولىگى ءبىلىم بەرۋ جانە دەنساۋلىق سالاسىندا جۇمىس اتقارادى.
ءۇي شارۋاسىندا, جۇمىستا, مەملەكەتتىك قىزمەتتەردە دە وزدەرىن تابىسكەر, ەڭبەكقور رەتىندە كورسەتىپ كەلە جاتقان ىسكەر ايەلدەر 5 ماۋسىمدا وتەتىن رەفەرەندۋمعا بەلسەنە اتسالىسىپ, ازاماتتىق پوزيتسياسىن بىلدىرمەك. شيرەك عاسىردان استام ۋاقىتتان كەيىن وتكەلى وتىرعان ساياسي ناۋقاننان تىس قالۋ كەلەشەككە قيانات جاساعانمەن تەڭ سانايتىنىن بىلدىرگەن ىسكەر ايەلدەر اتا زاڭداعى ەلەۋلى وزگەرىسكە دە ءوز ۇلەسىن قوسپاقشى. بۇل جونىندە تۇركىستان قالاسىندا كونستيتۋتسياعا ەنگىزىلەتىن وزگەرىستەردى ءتۇسىندىرۋ جانە رەفەرەندۋمدى قولداۋ ماقساتىندا وتكەن وبلىس اكىمدىگىنىڭ قولداۋىمەن, قازاقستاننىڭ ىسكەر ايەلدەر قاۋىمداستىعى ۇيىمداستىرعان «ەڭبەگى جانعان ارۋلار» ىسكەر ايەلدەر فورۋمىندا ايتىلدى.
مەملەكەتتىك مەكەمەلەر, شىمكەنت قالاسى جانە تۇركىستان وبلىسى بيزنەس-قاۋىمداستىعىنىڭ وكىلدەرى, وبلىستىق جانە قالالىق ءماسليحات دەپۋتاتتارى قاتىسقان فورۋم ۇلتتىق كيىمدەر مەن ىسكەر ايەلدەردىڭ فوتوكورمەسىنەن باستالدى. جيىندا قازاقستان ىسكەر ايەلدەر قاۋىمداستىعىنىڭ پرەزيدەنتى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى راۋشان سارسەمباەۆا فورۋمنىڭ ماقساتى جونىندە ايتىپ ءوتتى. «قاۋىمداستىق 27 جىل ىشىندە ايەلدەردى جۇمىسقا ورنالاستىرۋعا جانە ولاردىڭ ءبىلىمىن, الەۋمەتتىك مارتەبەسىن ارتتىرۋعا, سونداي-اق سالاماتتى ءومىر سالتىن ناسيحاتتاۋعا جانە ولاردى كاسىپكەرلىك پەن ساياسي قىزمەتتە ىلگەرىلەتۋگە باعىتتالعان 100-دەن استام جوبانى ىسكە اسىردى. ەلىمىزدە ىسكەر قىز-كەلىنشەكتەر ءوز كاسىبىمەن ەكونوميكامىزعا ۇلكەن ۇلەس قوسىپ كەلەدى. فورۋمنىڭ ماقساتى دا سول, جۇمىس ىستەيتىن ايەلدەردىڭ مارتەبەسىن كوتەرۋ, ولاردى جۇمىسپەن قامتۋ جانە كاسىپكەرلىك سالاسىن دامىتۋ ساياساتىن ىسكە اسىرۋ سەكىلدى مىندەتتەردى كوزدەيدى», دەدى ر.سارسەمباەۆا. ال تۇركىستان وبلىستىق ىسكەر ايەلدەر قاۋىمداستىعىنىڭ توراعاسى ينارا نامازباەۆا فورۋم ارقىلى ىسكەر حانىمداردىڭ جەتىستىكتەرىن كەيىنگى جاستارعا ۇلگى ەتۋ, جاس كاسىپكەرلەرگە باعىت-باعدار بەرۋ ماڭىزدى ەكەنىن اتاپ ءوتتى. «قىز-كەلىنشەكتەر وتە بەلسەندى. ولار دا ويلارىن ايتىپ, مەملەكەتتىك ماڭىزى بار ىستەرگە ۇلەس قوسا الادى. رەفەرەندۋم ءاربىر ىسكەر ايەل ءۇشىن اسا ماڭىزدى. نازىك جانداردىڭ ءال-اۋقاتىنىڭ ارتۋى تەك وتباسى ءۇشىن ەمەس, تۇتاس قوعام ءۇشىن پايدالى», دەيدى فورۋم دەلەگاتتارى.
فورۋم اياسىندا «كاسىپكەر ايەلدەردىڭ قازاقستاننىڭ تۇراقتى دامۋىن قالىپتاستىرۋداعى ءرولى» مەن «قوعامدى ترانسفورماتسيالاۋداعى ازاماتتىق سەكتوردىڭ ءرولى جانە رەفەرەندۋمعا بايلانىستى», «تۇركىستان وبلىسى جانە شىمكەنت قالاسى دامۋىنداعى ىسكەر ايەلدەر قاۋىمداستىعىنىڭ ءرولى» تاقىرىپتارىندا سەسسيا وتىرىستارى ءوتتى. ءىس-شارا سوڭىندا ىسكەر ايەلدەر Enbegi jangan arylar مەدالىمەن جانە العىسحاتپەن ماراپاتتالدى.
ايتا كەتەلىك, فورۋم قارساڭىندا شىمكەنت قالاسىنىڭ اكىمى مۇرات ايتەنوۆ قازاقستان ىسكەر ايەلدەر قاۋىمداستىعىنىڭ توراعاسى ر.سارسەمباەۆامەن كەزدەسىپ, شاھارداعى ايەلدەردىڭ كوشباسشىلىعىن دامىتۋ ماسەلەسىن تالقىلادى. ءۇشىنشى مەگاپوليستە بۇعان دەيىن كاسىپكەر ايەلدەردىڭ باسىن بىرىكتىرەتىن «ىسكەر ايەلدەر قاۋىمداستىعىنىڭ» فيليالى جۇمىس ىستەپ كەلگەن. ال جاڭادان جۇمىسىن باستاعان اليانس ايەلدەر مەن بالالاردىڭ قۇقىقتارى مەن دەنساۋلىعى جانە الەۋمەتتىك باعىتتاعى ءبىلىمىن جەتىلدىرۋدى كوزدەيدى. ايەلدەردىڭ جاعدايىن جاقسارتۋعا ارنالعان ۇيىم 2022-2023 جىلدارعا ارنالعان جول كارتاسىن بەكىتىپ, 10 باعىت بويىنشا جۇمىس جۇرگىزبەك.
تۇركىستان