قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتى الماتى قالاسىندا ءوز بولىمشەسىن اشتى. اتالمىش قىزمەت ءوزىنىڭ العاشقى ءباسپاسوز بريفينگىن قازاقستان حالقى اسسامبلەياسى الماتى قالالىق جانە وبلىستىق وكىلدىكتەرىنىڭ الداعى قازاقستان حالقى اسسامبلەياسى ءححى سەسسياسىنىڭ ازىرلىك جۇمىستارى بارىسىنا ارنادى.
قازاقستانداعى تۇرىك ەتنومادەني بىرلەستىگى باسشىسىنىڭ ورىنباسارى قازاقباي قاسىموۆ, گرەك ۇلتتىق ەتنومادەني بىرلەستىگىنىڭ باسشىسى گەورگي يوردانيدي, كارىس ۇلتتىق ەتنومادەني بىرلەستىگى باسشىسىنىڭ ورىنباسارى گەورگي كان, ۇيعىر ەتنومادەني بىرلەستىگىنىڭ مۇشەسى راحيليام ماحپيروۆا قاتىسقان بريفينگتە 18 ساۋىردە وتەتىن قازاقستان حالقى اسسامبلەياسىنىڭ ءححى سەسسياسىنا دايىندىق جايى مەن وسى كۇنگە دەيىن قالا مەن وبلىس كولەمىندە اتقارىلعان ىستەر قارالدى.
جۋرناليستەرمەن كەزدەسكەن توپ قازاقستان حالقى اسسامبلەياسىنىڭ تاريحىنا قىسقاشا توقتالا كەلىپ, جاڭا ءارى بالاماسىز وسى قۇرىلىمدى ىسكە اسىرۋ جۇمىستارى ايماقتاردا كىشى اسسامبلەيالار قۇرۋدان باستالعانىن, قازاقستان حالقى اسسامبلەياسى قوعامدى توپتاستىرۋشى تەتىكتەردىڭ بىرىنە اينالىپ, ول شىن مانىندە ۇلتارالىق كەلىسىمنىڭ قازاقستاندىق مودەلىن جۇزەگە اسىرۋدىڭ ماڭىزدى تەتىگى بولعانىن ەرەكشە اتادى.
«1995 جىلى 16 اقپاندا پرەزيدەنت نۇرسۇلتان نازارباەۆ ەلىمىزدەگى ۇلتتىق مادەني ورتالىقتاردىڭ جەتەكشىلەرىمەن كەزدەسۋ وتكىزدى. سوندا, ەلباسى رەسپۋبليكاداعى ۇلتارالىق كەلىسىمدى ساقتاۋ جانە ونى ودان ءارى نىعايتۋ ءۇشىن ەلىمىزدە جاڭا قوعامدىق ينستيتۋت – پرەزيدەنت جانىنداعى كونسۋلتاتيۆتى-كەڭەسشى ورگان رەتىندە قازاقستان حالقىن ورتاق مۇددەگە بىرىكتىرەتىن اسسامبلەيا قۇرۋ قاجەتتىلىگى تۋىنداپ وتىرعاندىعىن ەرەكشە اتاپ وتكەن ەدى», دەدى گەورگي كان.
بۇگىنگى كۇنى قازاقستان حالقى اسسامبلەياسى ەلىمىزدەگى – ءاربىر ەتنوستىڭ مۇددەسىن قورعايتىن قوعامدىق بىرلەستىك. اسسامبلەيا كوپۇلتتى قازاقستان حالقىن توپتاستىرۋشى ينستيتۋت رەتىندە قالىپتاسىپ بولدى دەپ ەسەپتەۋگە تولىق نەگىز بار. اسسامبلەيا قازاقستان ازاماتتارىن وتانسۇيگىشتىك رۋحتا تاربيەلەۋگە, ەتنوستار اراسىنداعى دوستىق پەن بىرلىكتى نىعايتۋ ىسىنە ولشەۋسىز ۇلەسىن قوسىپ كەلەدى.
«قازاقستان حالقى اسامبلەياسى ءار الۋان ەتنوستاردى ازاماتتىق تۇرعىدا توپتاستىرۋدىڭ قۋاتتى قۇرالىنىڭ بىرىنە اينالدى. جالپى العاندا, ءوز قىزمەتىنىڭ العاشقى كۇندەرىنەن باستاپ اسسامبلەيا ەلىمىزدەگى ەتنوستاردىڭ مادەنيەتىنىڭ قايتا جاڭعىرۋى مەن دامۋىنا ەلەۋلى ۇلەس قوسىپ كەلەدى. ناۋرىز مەيرامى, كورەي, نەمىس مادەنيەتىنىڭ فەستيۆالدەرى, تاتارلار مەن باشقۇرتتاردىڭ سابانتويى جالپىحالىقتىق سيپاتقا يە بولدى. دۇنگەندەر, كۇردتەر سياقتى, ت.ب. ەتنوستاردىڭ مەيرامدارى مەن ءتۇرلى فورۋمدارى رەسپۋبليكالىق دەڭگەيدە ءداستۇرلى تۇردە وتكىزىلىپ وتىرادى», دەدى تۇرىك ەتنومادەني بىرلەستىگىنىڭ وكىلى قازاقباي قاسىموۆ.
اسسامبلەيانىڭ بەلسەندى قىزمەتىنىڭ ناتيجەسىندە قازاقستانداعى ەتنوستاردىڭ مادەني ءومىرى جاندانا ءتۇستى. ويتكەنى, اسسامبلەيا ەتنوستىق توپتار اراسىنداعى ۇيىمداستىرۋ جۇمىستارىنىڭ ورتالىعىنا اينالدى. اسسامبلەيا ورگاندارىنا مەملەكەتتىك مارتەبە بەرىلۋىنە بايلانىستى ەتنومادەني بىرلەستىكتەردىڭ ماسەلەلەرى جەدەل شەشىمىن تاۋىپ, كەيبىر وزەكتى ماسەلەلەر بويىنشا ۇكىمەت دەڭگەيىندەگى شەشىمدەر قابىلدانىپ كەلەدى. اسسامبلەيا كەڭەسىنىڭ شەشىمىمەن ەتنومادەني بىرلەستىكتەرگە قارجىلاي جانە ۇيىمداستىرۋ جۇمىستارى بويىنشا كومەك كورسەتۋ ماقساتىندا رەسپۋبليكالىق قور قۇرىلعان.
الماتى قالالىق ەتنومادەني بىرلەستىكتەرىنىڭ كەڭسەلەرى دەموكراتيا ۇيىندە جانە رەسپۋبليكالىق دوستىق ۇيىندە ورنالاسقان.
قانات ەسكەندىر,
«ەگەمەن قازاقستان».
الماتى.