بۇۇ-نىڭ سىبايلاس جەمقورلىققا قارسى كونۆەنتسياسىن جۇزەگە اسىرۋدى شولۋ شەڭبەرىندە حالىقارالىق ساراپشىلار استانا قالاسىندا بولدى.
استاناعا قازاقستاننىڭ بۇۇ-نىڭ سىبايلاس جەمقورلىققا قارسى كونۆەنتسيا قاعيدالارىن جۇزەگە اسىرۋ بارىسىن شولۋ ماقساتىندا پاكىستان مەن كاتار ساراپشىلارى كەلىپ قايتتى.
شولۋ بارىسىندا ساراپشىلار بۇۇ-نىڭ سىبايلاس جەمقورلىققا قارسى كونۆەنتسيا قاعيدالارىن ءىس جۇزىندە قولدانۋدىڭ پراكتيكالىق مىسالدارىمەن تانىسىپ, قازاقستان پارلامەنتى سەناتى جانە ءماجىلىسى دەپۋتاتتارىمەن, جوعارعى سوت, ەكونوميكالىق قىلمىس جانە سىبايلاس جەمقورلىققا قارسى كۇرەس اگەنتتىگى, باس پروكۋراتۋرا, ىشكى ىستەر مينيسترلىگى, قارجى مينيسترلىگى, سىرتقى ىستەر مينيسترلىگى جانە مەملەكەتتىك قىزمەت ىستەرى جونىندەگى اگەنتتىك قىزمەتكەرلەرىمەن كەزدەسۋلەر وتكىزدى. سونداي-اق, ساراپشىلار قازاقستاننىڭ ۇكىمەتتىك ەمەس ۇيىمدارى وكىلدەرىمەن دە جۇزدەسىپ, ول كەزدەسۋلەر قورىتىندىلارى بويىنشا, پاكىستان مەن كاتار ساراپشىلارى ەلدىك ساپار ۇيىمداستىرىلۋىنىڭ جوعارى دەڭگەيىن اتاپ ءوتىپ, قازاقستاندىق تاراپتىڭ شولۋدى وتكىزۋگە دايىندىعىن وڭ باعالادى.
شولۋ تۋرالى ەلدىك باياندامانى دايىنداۋ ءۇشىن سول ەلگە ساپار ماڭىزدى شارت بولىپ تابىلادى. شولۋدىڭ تۇيىندەمەسىن بۇۇ-نىڭ ەسىرتكى جانە قىلمىس جونىندەگى باسقارماسى (بۇۇ ەقب) دايىنداپ, كونۆەنتسيانىڭ جۇزەگە اسىرىلۋ بارىسىن شولۋ جونىندەگى ۇكىمەتارالىق جۇمىس توبىنىڭ كەزەكتى 2014 جىلعى ماۋسىمدا وتەتىن ماجىلىسىنە ۇسىنادى دەپ كۇتىلىپ وتىر.
ايتا كەتەرلىگى, ەلىمىز كونۆەنتسياعا 2008 جىلى قوسىلعان بولاتىن. ال ساراپشى رەتىندە پاكىستان مەن كاتار ماماندارىنىڭ كەلۋى دە كەزدەيسوق ەمەس. 2011 جىلى كونۆەنتسيانىڭ جۇزەگە اسىرىلۋ بارىسىن شولۋ جونىندەگى ۇكىمەتارالىق جۇمىس توبى جەرەبە سالعاندا قازاقستاننىڭ زاڭنامالارىنا شولۋ جۇرگىزۋ ءۇشىن ەكى ەل – پاكىستان مەن كاتار انىقتالعان بولاتىن. قازىرگى تاڭدا شولۋدىڭ ءبىرىنشى – قازاقستاندىق تاراپتىڭ كەشەندى باقىلاۋ ساۋالداماسىنا جاۋابى مەن قازاقستاندىق ساراپشىلاردىڭ پاكىستان مەن كاتار ساراپشىلارىمەن بەينە جانە تەلەفوندىق كونفەرەنتسياسىمەن قوسا كابينەتتىك شولۋ جانە ەكىنشى – قازاقستاننىڭ مەملەكەتتىك ورگاندارى جانە ۇەۇ-مەن كەزدەسۋ ءۇشىن ەلدىك ساپار جاساۋ كەزەڭدەرى اياقتالدى.
شولۋدىڭ سوڭعى, ءۇشىنشى كەزەڭى بۇۇ ەقب شولۋدىڭ تۇيىندەمەسىن دايىنداپ, ونى كونۆەنتسيانىڭ جۇزەگە اسىرىلۋ بارىسىن شولۋ جونىندەگى ۇكىمەتارالىق جۇمىس توبى قابىلداعان كەزدە اياقتالادى.
«ەگەمەن-اقپارات».