جاقىندا قازاقستان رەسپۋبليكاسىنىڭ برازيليا فەدەراتيۆتىك رەسپۋبليكاسىنداعى توتەنشە جانە وكىلەتتى ەلشىسى, ارگەنتينا رەسپۋبليكاسى مەن چيلي رەسپۋبليكاسىندا ەلشى قىزمەتىن قوسا اتقارۋشى باقىتجان ورداباەۆ ۋرۋگۆاي شىعىس رەسپۋبليكاسىنىڭ سىرتقى بايلانىستار ءمينيسترى لۋيس الماگرو لەمەسپەن ارنايى كەزدەسۋ وتكىزدى, دەپ حابارلادى قر ءسىم-ءىنىڭ ءباسپاسوز قىزمەتى.
كەزدەسۋ بارىسىندا ساياسي, ەكونوميكالىق جانە مادەني سالالارداعى ەكىجاقتى قاتىناستاردى دامىتۋ, سونداي-اق, حالىقارالىق ۇيىمدارداعى ءوزارا ىقپالداستىق ماسەلەلەرى تالقىلاندى.
كەزدەسۋ اياسىندا ب.ورداباەۆ ۋرۋگۆايلىق ءسىم باسشىسىن قازاقستان پرەزيدەنتى ن.نازارباەۆتىڭ 2014 جىلعى ناۋرىز ايىنداعى گااگادا وتكەن يادرولىق قاۋىپسىزدىك سامميتىندەگى سوزىمەن جانە قازاقستاننىڭ يادرولىق قارۋدان باس تارتۋ جانە ونى تاراتپاۋ سالاسىنداعى باستامالارىمەن تانىستىردى.
مينيستر ل.الماگرو ءوز كەزەگىندە ۋرۋگۆاي يادروسىز مەملەكەت بولىپ تابىلاتىنىن جەتكىزە وتىرىپ, قازاقستاننىڭ بۇل باعىتتاعى دايەكتى ارەكەتتەرىن جوعارى باعالايتىنىن مالىمدەدى.
سونداي-اق, كەزدەسۋدە قازاقستاندىق ديپلومات ۋرۋگۆايلىق تاراپتىڭ بۇۇ قك-ءنىڭ تۇراقتى ەمەس مۇشەسى بولۋىنا قازاقستاننىڭ ۇمىتكەرلىگىن قولداعانىنا العىسىن بىلدىرە وتىرىپ, وسى ماسەلەگە قاتىستى ۋرۋگۆاي ءمينيسترىنىڭ اتىنا جولدانعان قازاقستان سىرتقى ىستەر ءمينيسترى ە.ىدىرىسوۆتىڭ العىس حاتىن تابىس ەتتى.
كەلىسسوزدەر ناتيجەسىندە تاراپتار ەكىجاقتى ۇنقاتىسۋدا 2014 جىلعى ماۋسىمدا پاراگۆايدا وتەتىن امەريكا مەملەكەتتەرى ۇيىمى باس اسسامبلەياسىنىڭ 44-ءشى وتىرىسى الاڭىندا جالعاستىرۋعا ۋاعدالاستى.
* * *
قازاقستان رەسپۋبليكاسىنىڭ تاجىكستان رەسپۋبليكاسىنداعى توتەنشە جانە وكىلەتتى ەلشىسى اعىباي سماعۇلوۆ تاجىكستان رەسپۋبليكاسىنىڭ سىرتقى ىستەر ءمينيسترى سيرودجيددين اسلوۆپەن كەزدەستى.
قازاقستان ەلشىسى تاجىكستاندىق ءسىم باسشىسىنا 2017-2018 جىلدار كەزەڭىندەگى بۇۇ قاۋىپسىزدىگى كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن قولداعانى ءۇشىن تاجىكستانعا ريزاشىلىق بىلدىرگەن قازاقستان سىرتقى ىستەر ءمينيسترى ەرلان ىدىرىسوۆتىڭ جەكە جولداۋىن تاپسىردى.
دوستىق سيپاتتاعى سۇحبات بارىسىندا تاراپتار ءوزارا ءىس-قيمىلدارداعى ساياسي دەڭگەيدىڭ جوعارىلىعىن, دوستاس ەكى ەل باسشىلارىنىڭ وڭىرلىك جانە حالىقارالىق باستامالارىن ءوزارا قولداپ وتىرۋدىڭ داستۇرگە اينالعاندىعىن ەرەكشە اتاپ ءوتىستى.
سونداي-اق, ەكىجاقتى ساياسي, ساۋدا-ەكونوميكالىق, ينۆەستيتسيالىق, مادەني-گۋمانيتارلىق ىنتىماقتاستىقتىڭ وزەكتى ماسەلەلەرى تالقىلاندى. تاراپتار تاجىكستان سىرتقى ىستەر ءمينيسترىنىڭ قازاقستانعا جاسايتىن الداعى رەسمي ساپارىنىڭ قازاق-تاجىك قاتىناستارىنىڭ دامۋىنا قارقىن بەرىپ, ەكىجاقتى جانە كوپجاقتى پىشىندەگى ىنتىماقتاستىقتىڭ كەلەشەگىن تالقىلاۋعا جول اشاتىنىنا سەنىم ءبىلدىردى.