ەلىمىزگە كونتراباندا ارقىلى زياندى ويىنشىقتار جەتكىزىلۋى مۇمكىن

بۇگىن سەناتتىڭ جالپى وتىرىسىندا دەپۋتاتتار بالالاردىڭ ويىنشىقتارىنا قاتىستى رادياتسيالىق باقىلاۋ قالاي جۇزەگە اسىرىلاتىنىن سۇرادى.

«كەدەن قىزمەتكەرلەرى ەلىمىزگە جەتكىزىلىپ جاتقان كەز كەلگەن تاۋار مەن قوندىرعىنى رادياتسيالىق باقىلاۋدان وتكىزەدى. بۇل تۇرعىدا ويىنشىقتار دا نازاردان تىس قالمايدى. ەگەر وسىنداي تاۋارلاردىڭ رادياتسيالىق كورسەتكىشى جوعارى بولسا, تاۋارلار قايتادان تەكسەرىلەدى. وسى ورايدا بۇل كورسەتكىشتەر ناقتىلانسا, يونداۋشى ساۋلەلەنۋ دەڭگەيى انىقتالسا, تاۋارلار سول ەلگە قايتادان قايتارىلادى», دەدى ەرۇلان جاماۋباەۆ.

ونىڭ پايىمىنشا, ەگەر زياندى ويىنشىقتار نارىققا ءوتىپ كەتسە, بۇل ونىمدەر كونتراباندالىق جولمەن وتكىزىلۋى مۇمكىن.

«ەاەو اياسىندا بەس مەملەكەت اراسىندا كەدەندىك باقىلاۋ جۇرگىزىلمەيدى. وسى ورايدا باسقا مەملەكەت ارقىلى ءوتىپ كەتىپ جاتسا, مۇنداي فاكتىلەر بولۋى مۇمكىن ەكەنىن جاسىرمايمىز. بىرنەشە جىل بۇرىن سونداي فاكتىلەر بولعان. بۇل تۇرعىدا ءتيىستى مەملەكەتتىك ورگاندارمەن بىرلەسە باقىلاۋ كۇشەيتىلگەن, ءتيىستى تەكسەرۋلەر ەسكەرىلگەن. قارجى مينيسترلىگى تاراپىنان قوندىرعىلاردى ءجيى اۋىستىرىپ وتىرامىز, سەبەبى ولاردىڭ رەسۋرستارىن ەسكەرۋ كەرەك. الداعى ۋاقىتتا وتكىزۋ بەكەتتەرىن جاڭعىرتىپ, ارنايى قوندىرعىلاردى جاڭارتامىز», دەدى ە. جاماۋباەۆ.

 ايانا توعانبەك