وتكەن اپتادا قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ شەشىم قابىلداپ, رەسەيلىك مامان ماگومەد اديەۆتى قازاقستان قۇراماسىنىڭ باس باپكەرى ەتىپ تاعايىندادى.
ەلورداداعى فۋتبول ۇيىندە وتكەن جيىندا قفف پرەزيدەنتى قازاقستاندىق باق وكىلدەرىمەن كەزدەسىپ, رەسمي تۇردە قازاقستان ۇلتتىق قۇراماسىنىڭ جاڭا باس باپكەرىن تانىستىردى. ادىلەت بارمەنقۇلوۆ ماگومەد مۋساەۆيچتىڭ ۇلتتىق قۇرامانىڭ باس باپكەرى لاۋازىمىنا تاعايىندالۋىنا بايلانىستى پىكىر ءبىلدىردى.
«حالىقارالىق كۇنتىزبەنىڭ ەرەكشەلىگىن جاقسى بىلەسىزدەر. ون ءبىر كۇندە ءتورت ماتچ وتكىزۋ قيىن بولادى. ءبىز جەتكىلىكتى تۇردە كۇيزەلىسكە, ياعني سترەستىك جاعدايعا تۇسەتىنىمىز انىق. سوندىقتان نەگە مۇنداي شەشىم قابىلداعانىمىزدى تۇسىندىرگىم كەلەدى. قازىر بىزگە جاتتىقتىرۋشىلىقتان بولەك, باسقارۋشىلىق قۇزىرەت تە وتە ماڭىزدى بولىپ تۇر. مەن بۇل قيىن جاعدايدان ابىرويمەن شىعۋ كەرەك ەكەنىن تۇسىنەمىن. اديەۆتىڭ الدىنداعى ءبىرىنشى مىندەت – فۋتبول ويناۋعا قولايلى جاعداي جاساۋ. تاڭداۋ نەگە ءدال ماگومەد مۋساەۆيچكە ءتۇستى دەگەن سۇراققا جاۋاپ بەرەر بولسام, بىزدە اديەۆتەن بولەك, تاعى بىرنەشە كانديدات توبە كورسەتتى. ولاردىڭ ىشىندە رەسەيلىك تسسكا كلۋبىنىڭ باپكەرلەر قۇرامىنداعى وتانداسىمىز گريگوري بابايان دا بار بولاتىن. ونىمەن دە سويلەسىپ كوردىك. بىراق جاسىراتىنى جوق, مەن كەيىنگى ەكى جىلدا ماگومەد مۋساەۆيچپەن بىرگە جۇمىس ىستەدىم, ونىڭ باسقارۋشىلىق قۇزىرەتكە يە ەكەنىن جاقسى بىلەمىن. تاعى دا قايتالاپ ايتامىن, قازىرگى سترەستىك جاعدايدا ءدال وسى تاڭداۋدى جاساۋ كەرەك بولدى», دەدى بارمەنقۇلوۆ.
44 جاستاعى ماگومەد اديەۆ ۇلتتىق قۇراما تىزگىنىن ۇستاعانعا دەيىن قاراعاندىنىڭ «شاحتەرىن» باپتاعان ەدى. ال فەدەراتسيا باسشىسى قفف پرەزيدەنتتىگىنە سايلانعانعا دەيىن «شاحتەر» كلۋبىندا ديرەكتورلار كەڭەسىنىڭ توراعاسى بولعان. ال اديەۆ بىلتىردان بەرى «كەنشىلەر» كلۋبىن جاتتىقتىرىپ كەلدى. سوندىقتان ەكەۋى جاقسى تانىس. ونىڭ ۇستىنە, ماگومەدتىڭ قاراعاندى كلۋبىندا جۇمىس ىستەۋىنە ادىلەت بارمەنقۇلوۆتىڭ تىكەلەي قاتىسى بار ەكەنىن ۇمىتپاۋىمىز قاجەت.
سونداي-اق فەدەراتسيا باسشىسى جيىن بارىسىندا ناۋرىز ايىندا ۇلتتىق قۇرامانىڭ باس باپكەرى مىندەتىن اتقارعان اندرەي كارپوۆيچكە جۇمىسى ءۇشىن العىسىن ءبىلدىرىپ, قفف ونىڭ كاسىبي دامۋىنا جان-جاقتى قولداۋ كورسەتەتىنىن اتاپ ءوتتى. ال ءوز كەزەگىندە ماگومەد اديەۆ ۇلتتىق قۇراما جانكۇيەرلەرگە قانداي فۋتبول ۇسىناتىنى تۋرالى ويىن ورتاعا سالدى.
«الدىمەن قازاقستان فۋتبول فەدەراتسياسىنا سەنىم ارتقانى ءۇشىن العىس ايتقىم كەلەدى. جاۋاپكەرشىلىگى مول, قىرۋار جۇمىس كۇتىپ تۇرعانىن جاقسى تۇسىنەمىن. قىسقا مەرزىم ىشىندە بىرنەشە ويىن وتكىزەمىز. سول سەبەپتى بارلىق ويىنعا كەشەندى دايىندىق جۇرگىزۋ كەرەك. ماسەلەن, ازەربايجانعا دايىندالىپ, سلوۆاكيانى دا ۇمىتپاعان ابزال. سوندىقتان ناقتى قۇرىلىمدى انىقتاپ, ءتورت ويىنعا تياناقتى دايىندىق جۇرگىزەمىز. ۋاقىت از. ويىنشىلاردى الماستىرىپ وتىرۋعا تۋرا كەلەدى. ون ءبىر كۇننىڭ ىشىندە ءتورت ماتچ وتەدى. باپكەرلەرمەن سويلەسىپ, اقىل-كەڭەس الىپ, بارلىق ماسەلەنى تالقىلاپ وتىرامىز. جاڭا تاجىريبەنىڭ جاقسى جاڭالىق ەكەنىن دە ايتا كەتكەن ءجون. فەدەراتسيا تاراپىنان ماعان قانداي مىندەتتەر ايتىلدى؟ ەڭ باستىسى – قۇراماعا تەك دايىن جىگىتتەردى عانا شاقىرىپ قويماي, جاس فۋتبولشىلاردى دا تارتىپ, ولاردى ەرەسەكتەر ويىنىنا بەيىمدەۋ. سودان كەيىن كوماندانىڭ ىشىندە دۇرىس قارىم-قاتىناس ورناتۋ. بولاشاقتىڭ نەگىزىن بۇگىننەن باستاۋ شارت. كوماندانىڭ قاتارىنا جاڭا ويىنشىلار شاقىرىلۋى ىقتيمال. قىسقا مەرزىم ىشىندە قارالاتىن بىرنەشە ۇمىتكەر بار. سودان سوڭ ولاردى شاقىرۋ تۋرالى شەشىم قابىلدايمىز», دەدى ماگومەد مۋساەۆيچ.
وسى ورايدا وقىرمانداردىڭ «ماگومەد اديەۆ كىم؟ ۇلتتىق قۇراماعا جەتەكشىلىك ەتەتىندەي قانداي جەتىستىگى بار؟» دەگەن سۇراقتارىنا از-كەم جاۋاپ بەرىپ كورەيىك. 1978 جىلى چەشەنستان استاناسى – گروزنىيدا دۇنيەگە كەلگەن ماگومەد اديەۆ 16 جاسىندا العاش رەت «ينگۋشەتيا» كلۋبىمەن كاسىبي كەلىسىمشارت جاساسىپ, ۇلكەن فۋتبولعا قادام باستى. كەيىننەن رەسەيدىڭ تومەنگى ليگالارىندا ونەر كورسەتەتىن «انجي», «سپارتاك-2», «سوكول», «تەرەك», «نيجني نوۆگورود» جانە ۋكراينانىڭ «كريۆباسس» كلۋبتارىندا دوپ تەپتى. ءتىپتى ول 2003 جىلى ەلوردالىق «جەڭىس» ساپىندا دا ءبىر جىل ويناپ, 11 ويىندا 5 گول سوقتى. فۋتبولشى كارەراسىندا ايتارلىقتاي جەتىستىككە قول جەتكىزە الماعان م.اديەۆ 2009 جىلى فۋتبولشى رەتىندە كاسىبىن دوعارىپ, باپكەرلىك جۇمىسقا بەت بۇردى.
ويىنشى رەتىندە بيىك بەلەستەردى باعىندىرا الماعان فۋتبولشىلاردىڭ باپكەرلىك ونەردە باعى جانىپ جاتاتىن جايتتاردى ءجيى كەزدەستىرەمىز. بىراق 2010 جىلدان باستاپ باپكەرلىككە بەت بۇرعان اديەۆكە ازىرگە مۇنداي باق قونا قويعان جوق. رەسەيدىڭ «نيجني نوۆگورود», «ۆولگا», «انجي», «احمات» سەكىلدى كلۋبتارىندا قىزمەت ەتكەن ول بىلتىر قاراعاندىنىڭ «شاحتەر» كلۋبىنىڭ تىزگىنىن ۇستاپ, «كەنشىلەر» كومانداسىن ءبىر جىلدىڭ ىشىندە جوعارى ورىندارعا جەتەلەدى. ياعني كونفەرەنتسيا ليگاسىنىڭ پلەي-وفف كەزەڭىنە دەيىن الىپ شىقتى. ەندى ۇلتتار ليگاسىندا ونەر كورسەتەتىن قازاقستان ۇلتتىق قۇراماسىن قانداي بيىكتەرگە جەتكىزە الار ەكەن؟