مەملەكەتتىك قىزمەتشى قاراپايىم بولىپ, جالپىعا بىردەي قابىلدانعان مورالدىق-ادەپتىك نورمالاردى ساقتاۋعا, شىندىققا سايكەس كەلمەيتىن مالىمەتتەردى تاراتپاۋعا, ازاماتتارمەن قارىم-قاتىناستا ادەپتىلىك تانىتۋعا, دورەكىلىك, قادىر-قاسيەتىن كەمسىتۋ, ادەپسىزدىك جانە بەيادەپ مىنەز-ق ۇلىق فاكتىلەرىنە جول بەرمەۋگە, وزدەرىنىڭ ارەكەتتەرىمەن جانە مىنەز-قۇلقىمەن ولاردىڭ تاراپىنان سىنعا سەبەپكەر بولماۋعا ءتيىس. مەملەكەتتىك قىزمەتشىلەرگە قاتىستى زاڭ تالابىندا وسىلاي جازىلعان.
الايدا ءوزىنىڭ تەرىس ارەكەتى ارقىلى سىنعا ۇشىراۋى بىلاي تۇرسىن, ماسەلەسى ادەپ كەڭەسىندە, سوتتاردا قارالىپ جاتقان شەنەۋنىكتەر قانشاما؟! تۇركىستان وبلىسىنداعى ادەپ جونىندەگى كەڭەس وتىرىسىندا مەملەكەتتىك قىزمەتشىگە قويىلاتىن ەتيكا تالاپتارىن ساقتاماعان, جەر تەلىمىن بەرۋ زاڭدىلىعىن بۇزعان شەنەۋنىكتەردىڭ تارتىپتىك ءىسى قارالدى. سارىاعاش اۋدانى اكىمىنىڭ ورىنباسارى نۇرپولات تاليپوۆ كوپشىلىك الدىندا اۋداننىڭ سۋ شارۋاشىلىعى مەكەمەسىنىڭ باستىعىنا دورەكى, بالاعات سوزدەردى ايتقان. بۇل سارىاعاش اۋدانى اكىمى اپپاراتىنىڭ جوسپاردان تىس تەكسەرۋى كەزىندە دالەلىن تاپقان. جينالىس بارىسىندا قاجەتتى اقپاراتتى بەرە الماعان مەكەمە باسشىسىنا ەموتسيامەن اشۋ ۇستىندە دورەكىلىككە جول بەرىپ قويعانىن ن.ءتاليپوۆتىڭ ءوزى دە مويىنداعان. ال جوعارىداعى باسشىدان بالاعات ءسوز ەستىپ قالعان شەنەۋنىك تاليپوۆقا قويار ەشقانداي كىناسىنىڭ جوقتىعىن ءمالىم ەتكەن. دەگەنمەن كەلەڭسىز وقيعا ادەپ جونىندەگى كەڭەستە قارالىپ, ءتيىستى شەشىم قابىلداندى.
«جۇمىس بارىسىندا ادامنىڭ كەيدە اشۋعا بەرىلەتىنىن جوققا شىعارۋعا بولمايدى. بىراق مەملەكەتتىك قىزمەت جۇيكەنىڭ جۇقالىعىن كوتەرمەيتىنىن ەستە ۇستاعان ابزال», دەدى مەملەكەتتىك قىزمەت ىستەرى اگەنتتىگىنىڭ تۇركىستان وبلىسى بويىنشا دەپارتامەنت باسشىسى, ادەپ جونىندەگى كەڭەس توراعاسى ايبەك ءشىلمانوۆ. كەڭەس مۇشەلەرىنىڭ شەشىمىمەن, سارىاعاش اۋدانى اكىمىنىڭ ورىنباسارى نۇرپولات تاليپوۆكە «سوگىس» جازاسىن بەرۋ تۋرالى ۇسىنىس اۋدان اكىمىنە جولداندى.
سوڭعى ۋاقىتتا اۋىل اكىمدەرىنە قاتىستى ىستەردىڭ دەنى جەرمەن بايلانىستى بولىپ وتىر. پارامەن ۇستالىپ, سوتتالعان دا, قىزمەتتەن كەتۋگە نەگىز بولعان جايتتار دا جەر ماسەلەسىنە بارىپ تىرەلەدى. بۇل جولى ادەپ كەڭەسىندە جەرگە قاتىستى ءتورت شەنەۋنىكتىڭ ءىسى تالقىلاندى. جەتىساي اۋدانى جىلى سۋ اۋىلدىق وكرۋگىنىڭ اكىمى ەرمەك داۋىلباەۆ پەن اتالعان اۋىلدىق وكرۋگ اكىمى اپپاراتىنىڭ باس مامان-زاڭگەرى ساپارعالي ابدۋللاەۆ جەرگە قاتىستى ءبىراز كەلەڭسىزدىكتەرگە جول بەرگەن. ناقتىراق ايتقاندا, شەنەۋنىكتەر جەر تەلىمىن ساتىپ بەرۋ تۋرالى وتىنىشتەر بويىنشا ۇسىنىلۋى ءتيىس قۇجاتتار پاكەتىن تولىق تاپسىرماعان, جەر پايدالانۋشىلاردىڭ وتىنىشتەرىن قاناعاتتاندىرۋ جانە ول بويىنشا شەشىمدەردى ۋاقتىلى قابىلداماۋ فاكتىلەرىنە جول بەرگەن. تەكسەرۋ بارىسىندا سونداي-اق قۇرىلىسى اياقتالماعان نىساندار بويىنشا پايدالانۋعا قابىلداۋ اكتىسىن ەسەپكە الۋ, جەر تەلىمىن جەكەمەنشىك قۇقىعىمەن بەكىتىپ بەرۋ تۋرالى شەشىمدەر قابىلداۋ, جەكە جانە زاڭدى تۇلعالارعا قۇقىقتارى مەن زاڭدى مۇددەلەرىن ىسكە اسىرۋىنا اشىق كەدەرگى جاساۋ جايتتارى انىقتالعان. وسىعان ۇقساس فاكتىلەرگە جەتىساي اۋدانى قاراقاي اۋىلدىق وكرۋگىنىڭ اكىمى بايدىبەك يمانبەرديەۆ, اتالعان اۋىلدىق وكرۋگ اكىمى اپپاراتىنىڭ باس مامان-زاڭگەرى ساپارعالي بيشوراەۆ تا جول بەرگەن. ءتورت شەنەۋنىك قىزمەتىنە تولىق سايكەس ەمەستىگى تۋرالى ەسكەرتۋ جازاسىنا ۇسىنىلدى.
تۇركىستان وبلىسى