ادنان مەندەرەستىڭ اتىندا كوشە بار

قازاقستان مەن تۇركيا ەلدەرىنىڭ زيالى قاۋىم وكىلدەرى قاتىسقان سالتاناتتى جيىندا تۇركىستان وبلىسىنىڭ اكىمى ومىرزاق شوكەەۆ تاريحي تۇلعا تۋرالى بايانداپ, باۋىرلاس ەلدەر بايلانىسى تەرەڭدەپ كەلە جاتقانىن اتاپ ءوتتى. «وتكەن عاسىردىڭ 50-جىلدارى وتانداستارىمىزعا قامقورلىق تانىتىپ, تۇركياعا كوشۋىنە, ورنىعۋىنا ۇلەس قوسقان ادنان مەندەرەستىڭ ەسىمىن جاڭعىرتۋ قوس مەملەكەتكە ورتاق مۇددە دەپ بىلەمىن. مەملەكەت باسشىسى قاسىم-جومارت توقاەۆ تۇركىستان قالاسىنداعى كوشەلەردىڭ بىرىنە ادنان مەندەرەستىڭ ەسىمىن بەرۋ تۋرالى تاپسىرما بەرگەن بولاتىن. تاپسىرما اياسىندا زاڭعا سايكەس ءتيىستى جۇمىستار اتقارىلىپ, ءبىز بۇگىن سول كوشەنىڭ اشىلۋ سالتاناتىنا كۋا بولىپ وتىرمىز. وزدەرىڭىزگە بەلگىلى, تۇركىستان – ءبىر حالىقتىڭ عانا ەمەس, كۇللى تۇركى ەلدەرىنىڭ رۋحاني ۇستىنى رەتىندە اسپەتتەلەدى. سوندىقتان قوس ەلگە ورتاق تۇلعانىڭ اتىنداعى بۇل كوشەنىڭ تۇركىستان قالاسىنان اشىلۋى – زاڭدىلىق. سونداي-اق بۇل باستاما قازاق-تۇرىك اراسىنداعى دوستىقتىڭ ودان سايىن نىعايۋىنا جول اشادى دەپ سەنەمىن», دەدى ومىرزاق ەستاي ۇلى.

تۇركيا رەسپۋبليكاسى ءدىن ىستەرى باسقارماسىنىڭ باسشىسى, باس ءمۇفتي الي ەرباش تۇلعاعا قۇرمەت كورسەتكەن قازاق ەلىنە العىسىن ءبىلدىردى. قوس ەل اراسىنداعى باۋىرلاستىق قارىم-قاتىناس نىعايا تۇسكەنىن, تۇركىستان تورىندەگى ماڭىزدى ءىس-شارالار تۇركى الەمىن بىرىكتىرۋگە سەرپىن بەرەتىنىن مالىمدەدى.

ساياسي قايراتكەر, تۇركيا رەسپۋب­لي­كاسىنىڭ پرەمەر-ءمينيسترى قىز­مەتىن اتقارعان ادنان مەندەرەستىڭ قازاق حالقىنا سىڭىرگەن ەڭبەگى مول. ول وتكەن عاسىردىڭ 50-جىلدارى قازاق­تاردىڭ تۇركياعا قونىستانۋىنا سەبەپكەر بولىپ, 4 جىلعا جۋىق سو­زىل­عان قونىس اۋدارۋ پروتسەسىنە قول­داۋ كورسەتكەن. تاريحي تۇلعانىڭ 1952 جىلعى قاۋلىسىنان كەيىن قا­زاقتار پاكىستاننان تۇركياعا قو­نىس اۋدارا باستادى. پاكىستانداعى قازاقتاردىڭ العاشقى لەگى 1952 جىل­دىڭ قىركۇيەك ايىندا كەلسە, سوڭعى لەگى 1956 جىلى تۇرىك جەرىنە جەتكەن.

تۇركىستان وبلىسى