ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اسكەري كافەدراسىندا قازاقستان رەسپۋبليكاسى قارۋلى كۇشتەرىنىڭ 30 جىلدىعى, وتان قورعاۋشىلار كۇنىنە جانە ەكىنشى دۇنيەجۇزىلىك سوعىستاعى ۇلى جەڭىس كۇنىنىڭ 77 جىلدىعىنا ارنالعان سالتاناتتى ءىس-شارا ءوتتى.
ۋنيۆەرسيتەت رەكتورى ەرلان سىدىقوۆ جاستارعا ارناعان سوزىندە كافەدرانىڭ قازىرگى ستۋدەنتتەرى وتانعا ادال قىزمەت ەتىپ, وسى سالادا بەلگىلى ءبىر بيىكتەرگە جەتەتىنىنە سەنىم ءبىلدىردى.
«جولداۋدا مەملەكەت باسشىسى قارۋلى كۇشتەردى قولداۋعا ەرەكشە نازار اۋداردى. سىزدەر تۇتاس ستراتەگيالىق سالانىڭ دامۋىنا ءوز ۇلەستەرىڭىزدى قوساتىندارىڭىزعا سەنەمىن», دەپ اتاپ ءوتتى ەرلان باتتاش ۇلى.
اسكەري كافەدرا مەڭگەرۋشىسى, گەنەرال-مايور ەدىل ورازوۆ قاتىسۋشىلاردى كەلە جاتقان مەرەكەلەرمەن قۇتتىقتاپ, ەكىنشى دۇنيەجۇزىلىك سوعىستاعى مايدانگەر اتا-اپالارىمىزدىڭ ەرلىگى ۇمىت قالمايتىنىن اتاپ ءوتتى. «ولاردىڭ سوعىس كەزىندە جاساعان ەرلىكتەرى, جاس ۇرپاققا ماڭگىلىك ەستەلىك جانە ۇلگى», دەدى گەنەرال-مايور.
سونداي-اق كافەدرا مەڭگەرۋشىسى ەۋرازيا ۇلتتىق ۋنيۆەرسيتەتى اسكەري كافەدراسىنىڭ دامۋى تۋرالى ايتىپ بەردى. ء«بىزدىڭ كافەدرادا ەل الدىنداعى بورىشىن ابىرويمەن اتقارىپ كەلە جاتقان جانە الدىڭعى ۇرپاقتىڭ ءىسىن جالعاستىرىپ جاتقان ۇرپاق از ەمەس. كافەدرا قىزمەتكەرلەرى ستۋدەنتتەرگە جوعارى ينتەللەكتۋالدىق جانە كاسىبي دەڭگەيدە ءدارىس وقيدى. باي كاسىبي تاجىريبەسىنىڭ ارقاسىندا ولار ءبىلىم الۋشىلارعا اسكەري-پاتريوتتىق تاربيە بەرۋدە», دەپ اتاپ ءوتتى ول.
بۇرىن ەۋرازيا ۇلتتىق ۋنيۆەرسيتەتىنىڭ اسكەري كافەدراسىن باسقارعان گەنەرال-مايور ءۋالي ەلامانوۆ تا سالتاناتتى ءىس-شاراعا قاتىسۋشىلارعا ءوز تىلەگىن ارنادى. «مەن ەۋرازيا ۇلتتىق ۋنيۆەرسيتەتىنىڭ اسكەري كافەدراسى ستۋدەنتتەردى جوعارى ساپالى دايارلايتىنىن بىلەمىن. ولاردىڭ ىشكى رۋحى, دايىندىقتارى اسكەري ىستەرگە قاتىستى اسكەري مەكتەپتەردىڭ كۋرسانتتارىنان ەش كەم تۇسپەيتىنىن ايتا كەتۋ كەرەك», دەدى ول.
ساحنا تورىنەن اسكەري كافەدرا تاربيەلەنۋشىلەرىنە ل.ن.گۋميلەۆ اتىنداعى ەۇۋ ارداگەرلەر كەڭەسىنىڭ توراعاسى كۇلزيرا ىسقاقوۆا, نۇر-سۇلتان قالاسىنىڭ «جاس سارباز» قوزعالىسىنىڭ وكىلى ءادىلحان ماحانبەت جانە باسقالار ءسوز سويلەدى.
سالتاناتتى جيىن اياسىندا كافەدرا قىزمەتكەرلەرى مەن ستۋدەنتتەردى قورعانىس ءمينيسترى مەن ل.ن.گۋميلەۆ اتىنداعى ەۇۋ رەكتورىنىڭ گراموتالارىمەن ماراپاتتاۋ ءراسىمى ءوتىپ, ءىس-شارا مەرەكەلىك كونتسەرتپەن اياقتالدى.
ايتا كەتۋ كەرەك, جيىرما جىل ىشىندە اسكەري كافەدرا بەس مىڭنان استام مامان دايارلاسا, ولاردىڭ 400-ءى قارۋلى كۇشتەر قاتارىنا شاقىرىلعان. بۇگىنگى تاڭدا 45 ادامنان تۇراتىن كافەدرانىڭ پروفەسسورلىق-وقىتۋشىلىق قۇرامى مىڭعا جۋىق ستۋدەنتتى وقىتادى.