شىمكەنت قالاسى بويىنشا بىلتىر 10 611 قىلمىستىق قۇقىق بۇزۋشىلىق تىركەلگەن, بۇل الدىڭعى جىلمەن سالىستىرعاندا 2,5 پايىزعا از, دەپ حابارلايدى Egemen.kz.
قالا اۋماعىندا تىركەلگەن ۇرلىقتاردىڭ جالپى سانى 12,0 پايىزعا تومەندەپ, اشىلىمى 15,8 پايىزعا ارتقان. ونىڭ ىشىندە, پاتەر ۇرلىعى قىلمىستارىنىڭ سانى 6,3 پايىزعا ازايدى. ينتەرنەت الاياقتىق بويىنشا 281 قىلمىستىق ءىس تىركەلىپ, ونىڭ 34-ءى سوتقا جولدانعان, 181 ءىس تەرگەۋدە.
وتكەن جىلعى جۇمىس قورىتىندىسى بويىنشا حالىققا ەسەپ بەرۋ كەزدەسۋىندە شىمكەنت قالاسى پوليتسيا دەپارتامەنتىنىڭ باستىعى پوليتسيا گەنەرال-مايورى قايرات دالبەكوۆ وسىنداي دەرەكتەر كەلتىردى. قالا تۇرعىندارى, ارداگەرلەر مەن قوعام بەلسەندەرى قاتىسقان كەزدەسۋ بارىسىندا, اتقارىلعان جۇمىستار مەن ءىىم نۇسقاۋىمەن جاڭادان قولدانىسقا ەنگىزىلگەن «قورعاۋ» باعدارلاماسى جايىندا فيلم كورسەتىلدى. سونداي-اق, پوليتسيا گەنەرال-مايورى ءۇشىنشى مەگاپوليستەگى جالپى كريمينالدىق جاعداي مەن اعىمداعى جىلدىڭ جەدەل-قىزمەتتىك جۇمىس ناتيجەلەرى تۋرالى باياندادى. پرەزيدەنت قاسىم-جومارت توقاەۆتىڭ قىلمىسقا قارسى كۇرەستە بىرقاتار ينديكاتورلاردى تاپسىرعانىن اتاپ ءوتتى. ياعني مال ۇرلىعى, ەسىرتكى بيزنەسىنە قارسى كۇرەس, جول-كولىك وقيعالارى مەن اۋىر جانە اسا اۋىر قىلمىستاردىڭ اشىلۋ دەڭگەيىنە توقتالدى. اتقارىلعان جۇمىستاردىڭ ناتيجەسىندە, پوليتسيا قىزمەتكەرلەرى ينتەرنەت الاياقتىقپەن اينالىسقان 5 ادامنان تۇراتىن قىلمىستىق توپتى قۇرىقتادى. قوعام دەرتىنە اينالعان ەسىرتكى قىلمىسى بويىنشا وتكەن جىلى 350 قۇقىق بۇزۋشىلىق جايتى انىقتالىپ, جەدەل-ىزدەستىرۋ ءىس-شارالارى ناتيجەسىندە 24 كۇدىكتىدەن قۇرالعان 5 قىلمىستىق توپ ۇستالدى. وسىعان بايلانىستى بىلتىر زاڭسىز اينالىمنان 90 كەلىگە جۋىق ەسىرتكى زاتتارى تاركىلەنگەن. سونداي-اق, وتكەن جىلدىڭ وزىندە قالا اۋماعىندا 435 ءجول-كولىك وقيعاسى تىركەلىپ, سالدارىنان 76 ادام قازا تاپتى. اۋىر دەنە جاراقاتىمەن 400-گە جۋىق ازامات ەمحاناعا جەتكىزىلگەن. جالپى جول-كولىك وقيعالارىنىڭ ءجيى ورىن الۋىنا جۇرگىزۋشىلەردىڭ جىلدامدىقتى شامان تىس ارتتىرىپ, قارسى جولاققا شىعۋى, قاۋىپسىزدىك بەلدەۋىن تاقپاي, ماس كۇيىندە تىزگىنگە وتىرۋى سەبەپ. وسى ورايدا, ءىىم-ءنىڭ نۇسقاۋىمەن 20-ساۋىردەن باستاپ مەگاپوليس اۋماعىندا «قورعاۋ» ارنايى باعدارلاماسى ىسكە قوسىلدى.
گەنەرالدىڭ ەسەبىنەن سوڭ, قالا تۇرعىندارى مەن قوعام بەلسەندىلەرى اشىق ميكروفون الدىندا وزەكتى ماسەلەلەرىن جەتكىزىپ, شەشىمىن تىڭدادى. قاراتاۋ اۋدانىنىڭ تۇرعىندارى مەكتەپ كوشەلەرىنە جول بەلگىلەرى مەن «سەرگەك» جۇيەسىنە قوسىلعان بەينەكامەرالاردى ورناتۋدى سۇرادى. بۇل ورايدا قايرات دالبەكوۆ مينيسترلىك تاپسىرماسىمەن الداعى ۋاقىتتا قالا اۋماعىنا تاعى 800 جاڭا بەينەكامەرا ورناتىلاتىنىن, اتالعان اۋدان تۇرعىندارىنىڭ ءوتىنىشى ەسكەرىلەتىنىن ايتتى. سونداي-اق, ء«نۇرسات», «كۇنشىعىس» شاعىن اۋدانىنىڭ ازاماتشالارى اۆتوتۇراق ماسەلەسى جايىندا ساۋالدارىنا جاۋاپ الدى. جانە جەكە سۇراقپەن كەلگەن ازاماتتاردىڭ وتىنىشتەرى قاناعاتتاندىرىلىپ, بىرقاتار ماسەلەلەر باستى نازارعا الىندى.