تۇركىستان وبلىسىنىڭ سايرام, سوزاق اۋداندارىنىڭ تۇرعىندارىن تاماشا ونەرىمەن ءتانتى ەتكەن قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ «تۇران دالاسىنا كۇي شاشۋ» اتتى گاسترولدىك كونتسەرتى وبلىس ورتالىعىندا جالعاسىن تاپتى.
كيەلى تۇركىستانعا ارنايى كەلگەن تاريحي وركەستر «كونگرەسس حولل» كوپسالالى كەشەنىندە قازاق حالقىنىڭ داۋلەسكەر كۇيشىلەرىنىڭ كۇيلەرى مەن ۇلى كومپوزيتورلارىنىڭ اندەرىنەن شاشۋ شاشتى. سونىمەن بىرگە الەم مۋزىكانتتارىنىڭ كلاسسيكالىق تۋىندىلارىن تارتۋ ەتتى.
كونتسەرتتە قازاقستاننىڭ ەڭبەك سىڭىرگەن ءارتىسى – مايرا مۇحامەدقىزى, قازاقستاننىڭ ەڭبەك سىڭىرگەن قايراتكەرلەرى – جۇبانىش جەكسەن ۇلى, جەڭىس ىسقاقوۆا, مادەنيەت سالاسىنىڭ ۇزدىگى اينۇر ابىلداەۆا ءان شىرقاپ جۇرتشىلىقتىڭ ىقىلاسىنا بولەندى.
وركەستردىڭ باس ديريجەرى – «دارىن» جاستار سىيلىعىنىڭ لاۋرەاتى ابىلاي تىلەپبەرگەن مەن ديريجەر, مادەنيەت قايراتكەرى جەكسەن ايسىن دا وركەستردى شابىتتاندىرىپ, مۋزىكا الەمىنە جەتەلەي ءبىلدى. مازمۇندى دا اسەرلى كەش سىيلاعان وركەستر ۇجىمىنا تۇركىستاندىقتار ريزاشىلىقتارىن ءبىلدىرىپ, قۇرمەت كورسەتتى. وركەستردىڭ وبلىستاعى ونەر ساپارى ورداباسى اۋدانىندا تۇيىندەلمەك.