شىعىس قازاقستان وبلىسى اۋماعىنداعى تارباعاتاي تاۋىنىڭ تابانىندا 30 ملن. تونناعا جۋىق مۇناي قورى بار ەكەنى ايعاقتالدى. بۇل تۋرالى كەشە جۋرناليستەرگە گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباەۆ مالىمدەدى.
«بۇگىندە قازاقستان قورىندا 76 ميلليارد تونناعا جۋىق مۇناي بار. ونىڭ ىشىندە يگەرىلگەنى, يگەرىلمەگەنى بار. وسى تۇرعىدا بىزگە زەرتتەۋ جۇمىستارىن قولعا الىپ, گەولوگيالىق-بارلاۋ جۇمىستارىن جان-جاقتى جۇرگىزۋ كەرەك», - دەدى ول.
كوميتەت توراعاسىنىڭ ايتۋىنشا, سولتۇستىك قازاقستان جانە قوستاناي وبلىستارى اۋماقتارى مەن تارباعاتاي تاۋىنىڭ قويناۋى مۇناي قورىنا باي. سونىڭ ىشىندە تارباعاتايداعى مۇنايدىڭ كولەمى 30 ملن. توننا ەكەنى بەلگىلى بولدى.
ب.نۇراباەۆ سونىمەن قاتار, شىعىستاعى مۇنايدىڭ ساپاسى اۋىر ەكەنىن دە العا تارتتى. سول سەبەپتى ونى ءوندىرۋ وڭاي بولمايدى. بۇعان قوسا, بۇل ماڭايدىڭ اۋا رايى دا قولايسىز. كەن ورنىن يگەرۋدە مۇنى دا ەسكەرۋ قاجەت.
كوميتەت توراعاسى ءوزىنىڭ سوزىندە قازاقستاندا مۇناي-گاز قورىن زەرتتەۋدى «قازمۇنايگاز» كومپانياسى موينىنا الاتىنىن جەتكىزىپ, بارلاۋ جۇمىستارىنا اتالمىش كومپانيا 797 ملرد. قارجى بولۋگە ءازىر ەكەنىن دە ايتىپ ءوتتى.
رۋسلان يگىلىك.