پرەمەر-مينيستر ءاليحان سمايىلوۆ شۆەيتساريا ەلشىسى داۆيد گريفتينگپەن كەزدەسىپ, تەمىرجول سالاسىنداعى ستراتەگيالىق ىنتىماقتاستىق ماسەلەلەرىن تالقىلادى, دەپ حابارلايدى Egemen.kz primeminister.kz سايتىنا سىلتەمە جاساپ.
سونىمەن قاتار كەزدەسۋگە قازاقستاننىڭ مەملەكەتتىك ورگاندارىنىڭ, «قتج» ۇك» اق-نىڭ وكىلدەرى جانە شۆەيتساريالىق Stadler Bussnang AG كومپانياسىنىڭ باسشىلارى قاتىستى.
ەسكە سالا كەتەيىك, 2021 جىلعى 29 قاراشادا جەنەۆادا وتكەن ينۆەستيتسيالىق دوڭگەلەك ۇستەل وتىرىسى اياسىندا قازاقستان مەن شۆەيتساريا پرەزيدەنتتەرىنىڭ قاتىسۋىمەن ءارتۇرلى سالالاردا بىرقاتار كوممەرتسيالىق كەلىسىمگە قول قويىلدى.
بۇگىنگى كەزدەسۋ بارىسىندا پرەمەر-مينيستر ءاليحان سمايىلوۆ قازىرگى قۇبىلمالى احۋالعا قاراماستان, قازاقستاننىڭ ترانزيتتىك مۇمكىندىكتەرىنە ۇلتتىق, جاھاندىق دەڭگەيلەردە قىزىعۋشىلىق بايقالىپ وتىرعانىن, كولىك-لوگيستيكا قىزمەتتەرىنە دەگەن سۇرانىستىڭ ارتىپ كەلە جاتقانىن اتاپ ءوتتى.
ءاليحان سمايىلوۆ قازاقستاندىق ماشينا جاساۋ سالاسى ۇلتتىق ەكونوميكانىڭ الەۋەتى زور سالالارىنىڭ ءبىرى ەكەنىن جانە ونى جەرگىلىكتى دەڭگەيدە دامىتۋ ءۇشىن ءتيىستى مۇمكىندىكتەردىڭ بار ەكەنىن جەتكىزدى.
«قتج» ۇك» اق جىلجىمالى قۇرامدى جاڭارتۋ بويىنشا جوسپارلى جۇمىس جۇرگىزىپ جاتىر. ولاردىڭ توزۋى شامامەن 60 پايىزدى قۇرايدى, سوندىقتان ولاردى بىرتىندەپ جاڭارتۋىمىز كەرەك. بۇل جوبا ءبىز ءۇشىن, اسىرەسە قازاقستانداعى جەرگىلىكتى ءوندىرىستى كەڭەيتۋ تۇرعىسىنان وتە ماڭىزدى», دەدى پرەمەر-مينيستر.
شۆەيتساريا تاراپىنىڭ وكىلدەرى «مade in Kazakhstan» زاماناۋي جىلجىمالى تەمىرجول قۇرامىنىڭ الەمدىك ساپا ستاندارتتارىنا سايكەس كەلەتىن ءوندىرىسىن جولعا قويۋعا, پەرسونالدى وقىتۋدى قامتاماسىز ەتۋگە, جەرگىلىكتەندىرۋ جونىندەگى تالاپتاردى ساقتاۋ بويىنشا مىندەتتەمەلەردى ورىنداۋعا دايىن ەكەندىكتەرىن جانە قازاقستاندى وسى ايماقتاعى نەگىزگى الاڭ رەتىندە كورگىسى كەلەتىندەرىن ايتتى.
كەزدەسۋ قورىتىندىسى بويىنشا پرەمەر-مينيستر ءاليحان سمايىلوۆ قازاقستان رەسپۋبليكاسىنىڭ تەمىرجول سالاسىنداعى جانە باسقا دا سالالارداعى ستراتەگيالىق ىنتىماقتاستىقتى دامىتۋعا مۇددەلىلىگىن راستادى.