تۇركىستان قالاسىنداعى نازارباەۆ زياتكەرلىك مەكتەبىندە ءداستۇرلى عىلىمي جوبالار بايقاۋى ءوتتى. وعان ەلىمىزدىڭ ءار وڭىرىندەگى نازارباەۆ زياتكەرلىك مەكتەبىنىڭ شاكىرتتەرى قاتىستى. جاساندى ينتەللەكت جانە مەحاترونيكا تاقىرىبىنا ارنالعان سايىستا وقۋشىلار مەديتسينا, ەكولوگيا, ماتەماتيكا, حيميا, بيولوگيا, فيزيكا باعىتىنداعى جوبالارىن ۇسىندى.
بۇعان دەيىن نزم وقۋشىلارىنا جاساندى ينتەللەكت, تسيفرلى تەحنولوگيالار, روبوتتەحنيكا, ينجەنەريا, ساۋلەت ونەرى, ەكولوگيا سالاسىنداعى تانىمال وتاندىق جانە شەتەلدىك سپيكەرلەر ونلاين-فورماتتا قازاق, اعىلشىن جانە ورىس تىلدەرىندە ۆەبينارلار وتكىزگەن. ولاردىڭ قاتارىندا ەۋروپالىق فۋتۋريست گەرد لەونحارد (شۆەيتساريا), سۋتەكتى كولىك تۇرلەرى بويىنشا اۋستراليالىق ساراپشى برەندان نورمان, رەسەيلىك «R:ED» كومپانياسىنىڭ ءبىلىم بەرۋ جوبالارىن دامىتۋ ءبولىمىنىڭ باسشىسى اليسا بولشاكوۆا, نازارباەۆ ۋنيۆەرسيتەتىنىڭ عىلىمي قىزمەتكەرى جانات ماحاتاەۆا جانە باسقا دا بەدەلدى عالىمدار بار. ال پراكتيكالىق ساباقتار توپوگرافياداعى پيفاگور تەورەماسىنا, جەر سىلكىنىستەرىن ءتۇسىنۋ ءۇشىن ماتەماتيكالىق مودەلدەۋدى پايدالانۋعا, عارىش ماتەريالدارىن جاساۋعا جانە حيميا, بيولوگيا, فيزيكا, ماتەماتيكا مەن ينفورماتيكا سالاسىنداعى باسقا دا جوبالارعا ارنالدى. تۇركىستان قالاسىندا وتكەن باستى ءىس-شارادا «نازارباەۆ زياتكەرلىك مەكتەپتەرى» دببۇ قىزمەتكەرلەرى ازىرلەگەن وقۋ جانە تسيفرلى رەسۋرستار جارمەڭكەسىنە وقۋلىقتار, وقۋ-ادىستەمەلىك كەشەندەر, جيناقتار, وقۋشىلاردىڭ وقۋ جەتىستىكتەرىن باعالاۋعا ارنالعان نۇسقاۋلىقتار قويىلدى. اتالعان ۇيىمنىڭ باسقارما ءتورايىمى كۇلاش ءشامشيدينوۆا مەن تۇركىستان وبلىسى اكىمىنىڭ ورىنباسارى ساكەن قالقامانوۆ دارىندى وقۋشىلاردىڭ عىلىمي جوبالارىن كوردى. مىسالى, «جۇيەلىك-ادىستەمەلىك كەشەن» ونلاين پلاتفورماسى, 3D فورماتىنداعى NIS LAB ۆيرتۋالدى زەرتحاناسى, NIS MEET POINT اشىق ونلاين الاڭى كورسەتىلدى. سونداي-اق وقۋشىلار «مەن سياقتى جاسا» تاقىرىبىنداعى STEAM جوبالارىن تانىستىردى. ولاردىڭ باسىم بولىگى مەديتسينا سالاسىنا جاساندى ينتەللەكتى ەنگىزۋگە ارنالعان. مىسالى, تاراز قالاسىنداعى NIS-تە ازىرلەنگەن COVID-19 كلينيكالىق سيمپتومداردى باقىلاۋ جۇيەسى جامبىل وبلىسىنداعى ەڭ ۇزدىك ستارتاپ اتالىپ, رەسپۋبليكالىق عىلىمي جوبالار بايقاۋىندا ەكىنشى ورىندى جەڭىپ الدى. بۇل جوبا تاراز قالالىق كوپسالالى اۋرۋحاناسىنا قولدانىسقا بەرىلگەن. «قۇرىلعىنىڭ نەگىزگى تيىمدىلىگى – اراقاشىقتىقتى ساقتاي وتىرىپ, دارىگەرلەرگە تەمپەراتۋرانى, ساتۋراتسيا مەن جۇرەك سوعۋ جيىلىگىن انىقتاۋعا كومەكتەسەدى. مىسالى, قازىر مەنىڭ تەمپەراتۋرام 36-نى كورسەتىپ تۇر. جۇرەك سوعۋ 44 جانە سوتۋراتسيام – 94. دەنى ساۋ ادامداردا ساتۋراتسيا 93-تەن كەم بولماۋ كەرەك. ودان از بولسا وندا ول ادامنىڭ دەنساۋلىعىندا كىنارات بار دەگەن ءسوز», دەيدى تاراز قالاسىنداعى نازارباەۆ زياتكەرلىك مەكتەبىنىڭ وقۋشىسى كاميللا ماشانلو.
سونىمەن قاتار قاتىسۋشىلار قولدانىستان شىققان «ەكىنشى ءومىر» تەحنيكاسىن پايدالاناتىن ەكولوگيالىق زەرتتەۋلەرىن قورعادى. ك.ءشامشيدينوۆا ناۋرىز كەزدەسۋلەرىنىڭ ەڭ نەگىزگى مىندەتى – بالالاردىڭ ءار ءپان بويىنشا العان ءبىلىمىن پراكتيكادا ىسكە اسىرۋ ەكەنىن ايتادى. «ونىڭ سىرتىندا ءبىز وسى وبلىستاعى مەكتەپ مۇعالىمدەرىن وقىتىپ جاتىرمىز. بىزدەن ۇيرەنگەن دۇنيەسىن ەرتەڭ بارىپ اۋىلعا, وزدەرىنىڭ ارىپتەستەرىنە ۇيرەتسىن», دەيدى ك.ءشامشيدينوۆا.
تۇركىستانداعى ءىس-شارا بارىسىندا وقۋ دروندارى ۇشىرىلىپ, «التىن ساقا» جانە «ەڭ سەيسموتوزىمدى عيمارات» كوماندالىق ويىندارى, جاس ونەرتاپقىشتار قۇراستىرعان اۆتوكولىكتەر جارىسى ۇيىمداستىرىلدى. سونداي-اق وقۋشىلار ناۋرىز كەزدەسۋلەرىنىڭ مادەني باعدارلاماسى اياسىندا قوجا احمەت ياساۋي كەسەنەسى, ارىستان باب, وتىرار توبە, « ۇلى دالا مۇراجايى» جانە كەرۋەن سارايىندا بولدى.
تۇركىستان وبلىسى