مەملەكەت باسشىسى ىشكى ىستەر ءمينيسترى مارات احمەتجانوۆتى قابىلدادى, دەپ حابارلايدى Egemen.kz اقورداعا سىلتەمە جاساپ.
قاسىم-جومارت توقاەۆقا ەلىمىزدەگى كريمينوگەندىك احۋال, سونداي-اق قاڭتار وقيعاسى كەزىندە جاسالعان قىلمىستاردى تەرگەۋ ءىسى, كىنالىلەردى انىقتاۋ جانە جاۋاپكەرشىلىككە تارتۋ بويىنشا جۇرگىزىلىپ جاتقان جۇمىستار جونىندە باياندالدى.
پرەزيدەنتكە ۇسىنىلعان مالىمەتكە سايكەس قازىرگى ۋاقىتتا 2 988 قىلمىستىق ءىس قارالۋدا, 188 ءىس بويىنشا ايىپتالۋ اكتىسى شىققان, ونىڭ 166-سى سوتقا جىبەرىلگەن. سونىمەن قاتار تونالعان قارۋدى زاڭسىز اينالىمنان قايتارىپ الۋ بويىنشا جۇمىس جۇرگىزىلۋدە.
مەملەكەت باسشىسىنا ىشكى ىستەر ورگاندارىنىڭ قىزمەتىن جەتىلدىرۋ بويىنشا جۇزەگە اسىرىلىپ جاتقان شارالار تۋرالى اقپارات بەرىلدى. سونىڭ ىشىندە پوليتسيا جۇمىسىن باعالاۋ جۇيەسىن قايتا قاراۋ, بيۋروكراتيانى جويۋ, سوتقا دەيىنگى ءىس جۇرگىزۋ پروتسەسىن وڭتايلاندىرۋ, سونداي-اق زاڭدىلىقتى قامتاماسىز ەتۋ جانە ازاماتتاردىڭ قۇقىقتارىن قورعاۋدى كۇشەيتۋ شارالارى تۋرالى ايتىلدى.
مارات احمەتجانوۆ سىبايلاس جەمقورلىققا قارسى ساياساتتى ىسكە اسىرۋداعى جاڭا تاسىلدەر, ماماندارمەن جۇمىس ىستەۋدىڭ تيىمدىلىگىن ارتتىرۋ, تسيفرلاندىرۋ ەسەبىنەن مەريتوكراتيا قاعيداتتارىن جانە پروتسەسستەردىڭ اشىقتىعىن قامتاماسىز ەتۋ جونىندە باياندادى.سونىمەن قاتار مەملەكەت باسشىسىنا قىلمىستىق-اتقارۋ جۇيەسىن جاڭعىرتۋ, قۇقىقتىق ءتارتىپتى جانە سوتتالعاندار وتىراتىن ءجايدى جاقسارتۋ جانە ولاردى قايتا الەۋمەتتەندىرۋ جونىندە اقپارات بەرىلدى.كەزدەسۋ قورىتىندىسى بويىنشا پرەزيدەنت مينيسترگە ەلىمىزدەگى قۇقىقتىق ءتارتىپتىڭ دەڭگەيىن ودان ءارى ارتتىرۋ, ىشكى ىستەر ورگاندارىنىڭ قىزمەتىن سەرۆيستىك مودەلگە وتكىزۋ بويىنشا بىرقاتار تاپسىرما بەردى.