جەزقازعانداعى تاريحي-ارحەولوگيالىق مۋزەيدە ءانشى, سازگەر, قازاقستاننىڭ مادەنيەت قايراتكەرى بولات ەسمۇحانوۆتىڭ كەزىندە ءوزى قولدانعان مۋزىكالىق اسپاپ – سينتەزاتور ساقتاۋلى تۇر. اتالعان جادىگەردى مۇراجايعا حالىقارالىق تەاتر سىنشىلارى بىرلەستىگىنىڭ مۇشەسى باحتيار تۇرسىن وتكىزىپتى.
بەلگىلى ءانشى-كومپوزيتور بولات ەسمۇحانوۆتىڭ ەسىمى ونەرسۇيەر قاۋىمعا جاقسى تانىس. دارىن يەسى وتكەن عاسىردىڭ 60-70-ءشى جىلدارى قازاق ەستراداسىندا قۇبىلىس بولعان «قاراكوز» ءانسامبلىنىڭ نەگىزىن قالاۋشىلاردىڭ ءبىرى بولدى.
وسى ۇجىمنىڭ قۇرامىندا ءجۇرىپ, ول تىڭدارمان قاۋىم جىلى قابىلداعان بىرنەشە ءان جازدى. سولاردىڭ قاتارىندا 1963 جىلى دۇنيەگە كەلگەن «ساعىنىش» ءانىن ايتۋعا بولادى. سونىمەن بىرگە ول ءسوزىن تۇمانباي مولداعاليەۆ جازعان «ماحاببات مۇڭى» اتتى ءاننىڭ دە مۋزىكاسىن شىعارعان.
جەزقازعان تاريحي-ارحەولوگيالىق مۋزەيىنىڭ عىلىمي قىزمەتكەرى اقنۇر راحمەتوۆا ءانشى-كومپوزيتوردىڭ ونەردەگى ەكىنشى تىنىسى 1974 جىلى وبلىستا جاڭا قۇرىلعان فيلارمونياعا ءانشى بولىپ جۇمىسقا قابىلدانعاننان كەيىن اشىلعانىن ايتادى.
«وسى فيلورمانيا قۇرامىنداعى «جەزكيىك» ءانسامبلىنىڭ ءانشىسى ءارى گيتاراشىسى بولا ءجۇرىپ, ول سول كەزدەرى حالىق اراسىندا كەڭ تاراعان «اسىلىم», «ساعىنىش» اندەرىن جازدى. بەلگىلى اقىن باكىر تاجىباەۆ جەزقازعان وڭىرىنە شىعارماشىلىق ساپارمەن كەلگەندە, ونەر يەلەرى تىزە قوسىپ, ء«سانىم-اۋ», «جالعىز جاپىراق» اندەرىن شىعارعان», – دەيدى ول.
سونداي-اق ەسمۇحانوۆتار وتباسى ونەرلى شاڭىراق رەتىندە دە تانىمال. ولار جەزقازعان قالاسىندا 1988 جىلى وتكەن «بايقوڭىر داۋىسى» فەستيۆالىنىڭ لاۋرەاتى اتانعان.
قاراعاندى وبلىسى,
جەزقازعان قالاسى