11-12 ءساۋىر كۇندەرى ەلىمىزدىڭ ەكى وڭىرىندە قازاقى تازىنىڭ تۇقىمدىق بايقاۋلارى ءوتتى. بايقاۋ الماتى وبلىسى جامبىل اۋدانىنداعى ۇزىناعاش اۋىلىندا جانە جەتىسۋ وبلىسى پانفيلوۆ اۋدانىنداعى جاركەنت قالاسىندا ۇيىمداستىرىلدى, دەپ جازادى Egemen.kz.
ۇزىناعاشتاعى تۇقىمدىق بايقاۋعا 53 قازاقى تازى تىركەلدى. ساراپتاما قورىتىندىسى بويىنشا 9 يت «وتە جاقسى», 1 يت «جاقسى» دەگەن جوعارى باعا الدى. جاركەنتتە دە تۇقىمدىق بايقاۋعا 53 قازاقى تازى تىركەلدى. باعالاۋ قورىتىندىسى بويىنشا 14 يت «وتە جاقسى», 6 يت «جاقسى» دەگەن باعا الدى. ساراپتامالىق باعالاۋ قورىتىندىسى بويىنشا جالپى 30 يتكە تۇقىمىن راستايتىن تەگى تۋرالى كۋالىك بەرىلەدى.
قازاقستاندا يەسىز جانۋارلاردى تەگىن ۆاكتسيناتسيالاۋ توقتاتىلادى
تۇقىمدىق بايقاۋلار بارىسىندا قازاقستان كينولوگتار وداعىنىڭ ساراپشىلارى يتتەردىڭ رەسمي تۇقىم ستاندارتىنا سايكەستىگىن باعالاپ, ولاردىڭ تۇقىمدىلىعىن راستادى جانە ەسەپكە قويۋ ءۇشىن قاجەتتى قۇجاتتاردى راسىمدەدى. قاتىسۋشىلار بەلسەندى تۇردە سۇراق قويىپ, ءوز يتتەرىنىڭ ەكستەرەر ەرەكشەلىكتەرىنە قىزىعۋشىلىق تانىتتى, ولاردىڭ قازاقى تازى ستاندارتىنا قانشالىقتى سايكەس كەلەتىنىن ناقتىلادى. ساراپشىلار ستاندارت تالاپتارىن ىقىلاسپەن ءتۇسىندىرىپ, قاجەتتى مالىمەتتەرمەن ءبولىستى. سوندىقتان بۇل كوپشىلىك ءۇشىن جاي عانا باعالاۋ ەمەس, پايدالى تاجىريبەلىك كەڭەس الۋ مۇمكىندىگى دە بولدى.
جانۋارلاردى قاۋىپتى اۋرۋلارعا قارسى ۆاكتسيناتسيالاۋ باستالدى
سونداي-اق قاتىسۋشىلار ءبىر-بىرىمەن ەركىن اڭگىمەلەسىپ, تازىنى كۇتىپ-باعۋ جانە ءوسىرۋ تاجىريبەسىمەن ءبولىستى, ءوز يتتەرىنىڭ مىنەزى مەن جۇمىس قاسيەتتەرى تۋرالى اڭگىمەلەدى. سونىڭ ارقاسىندا بۇل ەكى تۇقىمدىق بايقاۋ جاي عانا زووتەحنيكالىق ءىس-شارا ەمەس, ۇلتتىق تۇقىمعا قۇرمەتپەن قارايتىن جانە ونى كەلەر ۇرپاققا ساقتاپ قالۋدى كوزدەيتىن ادامداردىڭ جاندى باسقوسۋىنا اينالدى.