ەنەرگەتيكا ءمينيسترى: جىل سوڭىنا دەيىن قاشاعانداعى جاڭا زاۋىتتىڭ قۇرىلىسى اياقتالادى

ءمينيستردىڭ ايتۋىنشا, 2026 جىلدىڭ قاڭتار-ناۋرىز ايلارىندا مۇناي مەن گاز كوندەنساتىن ءوندىرۋ كولەمى 19,7 ملن توننا بولىپ, وتكەن جىلدىڭ سايكەس كەزەڭىمەن سالىستىرعاندا 80,2% قۇراعان. ال وسى كەزەڭدەگى مۇناي ەكسپورتى 15,3 ملن توننا دەڭگەيىندە قالىپتاسىپ, 2025 جىلدىڭ ۇقساس مەرزىمىمەن سالىستىرعاندا 78,5% بولعان. جالپى, 2026 جىلعا ارنالعان ەكسپورت بولجامى 76 ملن توننا كولەمىندە.

ءىرى كەن ورىندارىنىڭ ءبىرى قاراشىعاناق بويىنشا ءوندىرىستى تۇراقتاندىرۋ شارالارى قولعا الىنعان. اتاپ ايتقاندا, مۇناي ءوندىرۋدى جىلىنا 10-11 ملن توننا دەڭگەيىندە ۇستاپ تۇرۋ ءۇشىن شيكى گازدى كەرى ايدايتىن 6-نشى كومپرەسسوردى ىسكە قوسۋ جۇمىستارى جالعاسىپ وتىر. سونىمەن قاتار ءىرى جەر قويناۋىن پايدالانۋشىلارمەن مۇناي ءوندىرۋ كولەمىن ارتتىرۋ جونىندە كەلىسسوزدەر جۇرگىزىلىپ جاتىر.

گاز سالاسىندا دا ءوسىم بار. جىل باسىنان بەرى ەلىمىزدە 13,6 ملرد تەكشە مەتر گاز ءوندىرىلىپ, بۇل وتكەن جىلدىڭ سايكەس كەزەڭىمەن سالىستىرعاندا 84,9% قۇراعان. ال جىلدىق بولجام 62,7 ملرد تەكشە مەتر دەڭگەيىندە جوسپارلانىپ وتىر.

ءى توقسانداعى ەكونوميكالىق ءوسىمدى وڭدەۋ, قۇرىلىس, كولىك جانە ساۋدا سالالارى قامتاماسىز ەتتى

ءمينيستردىڭ سوزىنشە, سالانىڭ ۇزاق مەرزىمدى دامۋىنا ەرەكشە ءمان بەرىلىپ وتىر.

«گاز سالاسىنىڭ ۇزاق مەرزىمدى رەسۋرستىق بازاسىن نىعايتۋ جانە ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ماقساتىندا مينيسترلىك «سامۇرىق-قازىنا» قورىمەن بىرلەسىپ 2035 جىلعا دەيىن ەلىمىزدە كومىرسۋتەكتەردىڭ جاڭا پەرسپەكتيۆالى كەن ورىندارىن يگەرۋ جوسپارىن جۇزەگە اسىرۋدا, وعان سايكەس وسى جىلدىڭ سوڭىنا دەيىن قاشاعاندا قۋاتى 1 ملرد تەكشە مەتر بولاتىن ءموز قۇرىلىسىن اياقتاۋ جوسپارلانىپ وتىر», دەدى ەرلان اقكەنجەنوۆ.

وسىلايشا, قاشاعان كەن ورنىندا جاڭا گاز وڭدەۋ زاۋىتىنىڭ ىسكە قوسىلۋى ەلدىڭ گاز وڭدەۋ الەۋەتىن ارتتىرىپ, ىشكى نارىقتى تۇراقتى قامتاماسىز ەتۋگە مۇمكىندىك بەرەدى. جالپى, قولعا الىنعان جوبالار قازاقستاننىڭ مۇناي-گاز سالاسىن جاڭا دەڭگەيگە كوتەرۋگە باعىتتالعان.

ولجاس بەكتەنوۆ: الەۋمەتتىك قامسىزداندىرۋدىڭ ادىلەتتى جۇيەسىن قالىپتاستىرۋ قاجەت