بيىلدان باستاپ ىشكى ءتۋريزمدى دامىتۋ ماقساتىندا قازاقستاندا Kids go free (بالالار تەگىن ۇشادى) باعدارلاماسى ىسكە قوسىلدى. ەندى ەلىمىزدىڭ 10 وڭىرىنە ساياحات جاساعىسى كەلگەن ءاربىر قازاقستاندىقتىڭ ەكى جاستان ون ءتورت جاسقا دەيىنگى بالالارى ساپار بارىسىندا تەگىن ۇشادى. باعدارلامانىڭ نەگىزگى ماقساتى – قازاقستاندىقتاردى ەلدىڭ تۋريستىك باعىتتارىندا وتباسىمەن دەمالۋىن ىنتالاندىرۋ. تۋروپەراتورلار قازىردىڭ وزىندە وسى باعدارلاما ارقىلى حالىققا ساپالى ءارى باعاسى قولجەتىمدى تۋريستىك جولدامالار ۇسىنىپ وتىر.
مادەنيەت جانە سپورت مينيسترلىگىنىڭ بولجامى بويىنشا مۇنداي جەڭىلدىك دەمالىستىڭ شىعىنىن 30 پايىزعا دەيىن ازايتۋعا مۇمكىندىك بەرەدى. ال اتالعان ۆەدومستۆونىڭ ۆيتسە-ءمينيسترى ەرجان ەركىنباەۆتىڭ ايتۋىنشا, «كيدس گوۋ فري» تۋرپاكەتىن قازاقستاندا تىركەلگەن رەسمي تۋروپەراتورلاردان ساتىپ الۋعا بولاتىنىن ايتادى.
«اۋە بيلەتتەرى نەگە سۋبسيديالانادى؟ سەبەبى قازاقستاندىقتارعا بالالارىمەن ەلىمىزدىڭ باسقا دا وڭىرلەرىنە ساياحات جاساپ, جاس جەتكىنشەكتەرگە كورىكتى جەرلەرىمىزدى كورسەتۋى ماقساتىندا مەملەكەت تاراپىنان سۋبسيديا بەرىلەدى. ەلىمىزدە كورسە كوز توياتىنداي اسەم جەرلەرىمىز جەتەرلىك. سونىمەن قاتار قازاقستاندا 13 ۇلتتىق ساياباق بار. ەل تۇرعىندارىنىڭ باسىم بولىگى ءوز وڭىرلەرىنەن تىس جەرلەرگە شىعىپ كورمەگەن. ەندى وسى باعدارلامانىڭ يگىلىگىن پايدالانىپ, باسقا دا وڭىرلەرگە ەركىن ساياحات جاساپ, اسەم جەرلەرىمىزدى تاماشالاي الادى», دەدى ەرجان ەركىنباەۆ.
مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ ءبىر ساياحاتقا كەتەتىن شىعىننىڭ بولجامدى ەسەبىن شىعارىپ بەردى.
«ەگەر ءسىز تۋروپەراتوردى تارتپاي, ءوز بەتىڭىزشە ۇشاتىن بولساڭىز, سايكەسىنشە سىزگە بالالار بيلەتىنىڭ قۇنى سۋبسيديالانبايدى. ال تۋروپەراتوردىڭ قىزمەتىنە جۇگىنەتىن بولساڭىز, بۇل جاعدايدا ۆاۋچەردىڭ قۇنى 20-30 پايىزعا ارزان بولادى. مىسالى, ءبىر وتباسى نۇر-سۇلتاننان الاكولگە ءۇش بالاسىمەن ءبىر اپتاعا ساياحات جاسايدى دەلىك. جاتىن ورىن مەن ۇشاق باعاسىن قوسا ەسەپتەگەندە ول وتباسىنىڭ شىعىنى شامامەن 350-400 مىڭ تەڭگە بولۋى مۇمكىن. بۇل سومانىڭ 100 مىڭ تەڭگەسى بالالار ءۇشىن بارىپ-قايتۋ بيلەتتەرىنە كەتەدى. ەندى جوعارىداعى 350 مىڭنان 100 مىڭ تەڭگەنى الساق, بۇل دەمالىستىڭ قۇنى 250 مىڭ تەڭگەنى قۇرايدى. سوندىقتان ءسىز وتاندىق تۋروپەراتوردىڭ ۇيىمداستىرىلعان دەمالىسىن پايدالاناتىن بولساڭىز, جاڭا باعدارلامانىڭ مۇمكىندىگىمەن از قاراجاتقا ساياحاتتاپ كەلەسىز», دەپ سەندىردى داستان رىسپەكوۆ.
قاي باعىتتارعا تەگىن ۇشۋعا بولادى؟
تەگىن اۋە بيلەتتەرى ازىرگە تۋريستىك سالانى دامىتۋدىڭ 2019-2025 جىلدارعا ارنالعان مەملەكەتتىك باعدارلاماسىندا ايقىندالعان باسىم تۋريستىك ايماقتاردىڭ (بتا) توپ-10 باعىتى بويىنشا عانا قولجەتىمدى. ولارعا مىنا ايماقتار كىرەدى: الاكول كولى, الماتى ءوڭىرىنىڭ تاۋ كلاستەرى, ششۋچە-بۋراباي, باياناۋىل يمانتاۋ-شالقار كۋرورتتى ايماقتارى, بالقاش كولى, تۇركىستان وبلىسى, ماڭعىستاۋ جاعاجاي دەمالىس ايماقتارى, نۇر-سۇلتان قالاسىندا MICE-ءتۋريزمدى دامىتۋ (كورپوراتيۆتىك ءىس-شارالاردى ۇيىمداستىرۋ جانە وتكىزۋگە بايلانىستى ىسكەرلىك تۋريزم جانە بايقوڭىر عارىش ايلاعى.
تەگىن بيلەتتەر مەن بالالار سانىنا شەكتەۋ جوق. دەگەنمەن ساپارعا شىعۋ الدىندا مىناداي بىرنەشە جايتتى ەسكەرگەن ءجون. ماسەلەن, Kids go free قوسىلعان تۋريستىك ءونىمدى ساتىپ الا وتىرىپ, بالالار تۋريستىك ورىنداردىڭ اۋماعىندا كەمىندە بەس كۇن جانە ءتورت ءتۇن تۇرۋعا مىندەتتى. ەگەر ءسىز بىردەن بىرنەشە جەرگە بارۋدى جوسپارلاساڭىز, وندا كەم دەگەندە ەكى كۇن جانە ءبىر ءتۇن سول ورىندا بولۋىڭىز كەرەك. تۇرۋ ۋاقىتىنىڭ جالپى سانى بەس كۇننەن جانە ءتورت تۇننەن كەم بولماۋى قاجەت. بۇل جاعدايدا بالالارعا ارنالعان تەگىن اۋە بيلەتتەرى ءبىرىنشى لوكاتسياداعى اۋەجايعا دەيىن جانە سوڭعى لوكاتسياداعى اۋەجايدان ۇسىنىلادى. ياعني ءسىز ءبىر ەمەس بىرنەشە رەت ۇشۋدى كوزدەسەڭىز, ەڭ العاشقى جانە سوڭعى رەيستىڭ بيلەتى عانا تەگىن بولادى. ەكى مەكەنجايدىڭ اراسىنداعى بيلەتتەر مەن كولىك شىعىندارىن ءوز قالتاڭىزدان تولەيسىز.
سوندىقتان ءار جەردە كەمىندە بەس كۇن جانە ءتورت ءتۇن تۇرۋ ارقىلى تۋريستىك قىزمەتتەردى ساتىپ العان ءتيىمدى. وسى شارتتار بويىنشا بالالارعا ارنالعان تەگىن بيلەتتەر بارلىق جەردەگى اۋەجاي اراسىندا ۇسىنىلاتىن بولادى.
باعدارلاما تۋىسقان ارالاۋعا ارنالماعان
بالالارعا ارنالعان تەگىن اۋە بيلەتتەرى Kids go free وپتسياسى قوسىلعان وتاندىق تۋريستىك ونىمدەر اياسىندا عانا قولجەتىمدى بولادى. بۇل رەتتە باعدارلامانىڭ تالاپتارى بويىنشا ءبىر ەرەسەك اداممەن (اتا-انا نەمەسە بالانىڭ زاڭدى وكىلى) ەكى بالادان ارتىق ۇشا المايدى. ياعني ءبىر ەرەسەك ادام ەكى بالامەن ۇشادى. ءۇشىنشى بالا ءۇشىن تاعى ءبىر ەرەسەك بيلەت الۋ كەرەك. باعدارلاما ءبىر بالاسى بار وتباسى ءۇشىن دە, كوپبالالى وتباسىلار ءۇشىن دە قولجەتىمدى.
ءسىز قوناقۇيلەردە, وتەلدەردە, لاگەرلەردە, تۋريستىك بازالاردا, دەمالىس ۇيلەرىندە, پانسيوناتتاردا تۇرا الاسىز. ال تۋىسقاندارعا نەمەسە دوستارعا بارۋ ءۇشىن بيلەت تەگىن بولمايدى.
تۋرپاكەتتەر ىشكى تۋريزم سالاسىنداعى تۋروپەراتورلار مەن تۋراگەنتتەر ارقىلى نەگە بەرىلەدى؟ ويتكەنى تۇراتىن جەردىڭ باعاسى سۇرانىس پەن ۇسىنىس نەگىزىندە جاسالادى. سوندىقتان تۇرۋ شارتتارى, تاماقتانۋ جانە باسقا وپتسيالار تۋريستەردىڭ قالاۋىنا جانە تۋروپەراتور تاڭداعان ورنالاسۋ مۇمكىندىكتەرىنە بايلانىستى.
العاشقى تۋريستىك جولداما ساتىلدى
اتالعان باعدارلاماعا وسى كۇننىڭ وزىندە 10 وتاندىق تۋروپەراتور قوسىلعان. ونىڭ ءبىرى «كيدس گوۋ فري» بويىنشا العاشقى تۋرىن دا ساتىپ ۇلگەرىپتى. بۇل – وسكەمەن قالاسىنىڭ «ارتۋر» تۋركومپانياسى. كومپانيانىڭ ديرەكتورى ايجان ومارباەۆا وسى العاشقى تۋردىڭ ناۋرىز ايىنا جوسپارلانعانىن ايتادى. تۋعان اپكەسى سەنىمحات نەگىزىندە باۋىرىمەن ناۋرىز مەيرامىن تويلاۋ ماقساتىندا بەس كۇنگە تۇركىستانعا ساياحاتتايدى. تۋردىڭ قۇرامىنا ۇشۋ, تۇرۋ, مىندەتتى پۋنكتتەر, سونداي-اق كۇنىنە ءۇش رەت تاماقتانۋ, ترانسفەر, ەكسكۋرسيالىق باعدارلاما جانە گيد كىرەدى.
«باعدارلاما جوسپارلانعان كولەمدە جۇمىس ىستەيدى دەپ ۇمىتتەنەمىن, ويتكەنى ءبىز ونى كۇتىپ, ونى ازىرلەۋگە قاتىستىق. بۇل باعدارلاما بويىنشا سۇرانىس بار, قوڭىراۋلار وتە كوپ. الاكولگە جازعا وتىنىمدەر بار», دەدى ول.
باعدارلاماعا قوسىلعان SkyWay تۋروپەراتورىنىڭ ديرەكتورى اسەم قوزىباعاروۆا ناۋرىز ايىندا دەمالعىسى كەلەتىندەردىڭ قاتارى كوپ ەكەنىن ايتتى. ء«بىز الماتى مەن الماتى وبلىسىنىڭ, تۇركىستاننىڭ كورىكتى جەرلەرىنە, سونداي-اق جازدا كاسپي تەڭىزىنىڭ جاعاسىندا جاعاجاي دەمالىسىن ۇسىنامىز. مەنىڭ ويىمشا, Kids Go Free باعدارلاماسى جالپى ىشكى ءتۋريزمدى دامىتۋ ءۇشىن جانە وتباسىلاردىڭ تۋريستىك پاكەتتەرگە دەگەن سۇرانىسىن ارتتىرۋ ءۇشىن جاقسى. بۇل پروتسەستە ءبىز بارلىق قاتىسۋشىعا جۇمىس ىستەۋگە ىڭعايلى بولۋ, كەدەرگىلەردى ازايتۋ جانە ت.ب. ەرەجەلەردى جەتىلدىرە الامىز», دەيدى ءا.قوزىباعاروۆا.
ال Limon Travel تۋروپەراتورىنىڭ ديرەكتورى الماس مارات ۇلىنىڭ پىكىرىنشە, Kids Go Free باعدارلاماسى ءتۋرونىمنىڭ جالپى چەگىن تومەندەتەدى. تيىسىنشە, تۋروپەراتورعا تۋرلاردى ساتۋ وڭايىراق بولادى.
«باعدارلامانىڭ شارتتارىن ءبىز ءوزىمىز, تۋروپەراتورلار تالقىلاۋ بارىسىندا وزگەرتتىك. مىسالى, باستاپقىدا تۋريست 4 ءتۇن, 5 كۇن تۇراتىن تۋر ساتىپ الۋى كەرەك دەپ جوسپارلانعان بولاتىن. ءبىز ءبىر تۇنگە دەيىن قىسقارتۋعا قول جەتكىزدىك. سۇرانىسقا كەلەتىن بولساق, كوپتەگەن ادام بۇل جاي عانا قازاقستان بويىنشا بالالارعا ارنالعان تەگىن اۋە بيلەتى دەپ ويلادى. بىراق ءبىز كليەنتتەرگە اۋە بيلەتىن عانا ەمەس, تۋريستىك ءونىمدى دە, مىندەتتى تۇردە تۇرۋ, باسقا دا قىزمەتتەردى ساتىپ الۋ كەرەكتىگىن تۇسىندىرەمىز», دەدى ول.
تۋركومپانيالاردىڭ ايتۋىنشا, قازىرگى تاڭدا اتالعان باعدارلاما بويىنشا جازعى ماۋسىمعا, اسىرەسە الاكولگە سۇرانىس كوپ تۇسۋدە. سونداي-اق باتىس ايماعىنان جوعارى سۇرانىس ءتۇسىپ جاتىر ەكەن. باتىس ءوڭىرىنىڭ الماتى, تۇركىستان سياقتى تۋريستىك ايماقتاردان الىس ورنالاسقانىن ەسكەرسەك, دەمالىس كەزىندە ەكى-ءۇش كۇن تەمىرجولمەن جۇرگەنشە, ماقساتتى باعىتىنا ءبىر-ەكى ساعاتتىڭ ىشىندە جەتۋ ىڭعايلى ەكەنى ايقىن. بۇل رەتتە بالالار اۋە بيلەتتەرى تەگىن بولعان جاعدايدا, «كيدس گوۋ فري» باعدارلاماسى بويىنشا تۋرلارعا سۇرانىس تەك جوعارىلاي تۇسەدى دەپ جوسپارلاۋدا تۋريستىك نارىق وكىلدەرى.
Kazakh Tourism ۇلتتىق كومپانيا وكىلدەرىنىڭ ايتۋىنشا, مۇنداي باعدارلامانىڭ مەملەكەت دەڭگەيىندە قولدانىلۋى – الەمدىك تاجىريبەدە بولماعان جاعداي. زاڭ كۇشىنە ەنگەن شارا مەرزىمسىز قابىلدانعان. وسى جىلعا بيۋدجەتتە باعدارلامامەن كەم دەگەندە 20 مىڭ بالانى قامتۋ كوزدەلسە, سۇرانىس ارتقان جاعدايدا, قوسالقى قاراجات تارتىلاتىنى ەسكەرىلگەن. ەكى جىل بويى پاندەميادان زارداپ شەككەن تۋريزم سالاسىنا ەندىگى كەزدە جاڭادان دەم بەرىلدى دەسە بولادى. «كيدس گوۋ فري» ارقىلى, ەل ىشىندە ساياحاتتايمىن دەيتىن جانۇياعا 30%-عا دەيىن ۇنەمدەۋ مۇمكىن بولىپ وتىر.