ەۋروپانىڭ 14 جاسقا دەيىنگى جاسوسپىرىمدەر اراسىندا وتكەن تەننيس ويىنىندا زاڭعار نۇرلان ۇلى پاريجدە Tim Essone ءتۋرنيرىنىڭ فينالىنا شىقتى, دەپ حابارلايدى Egemen.kz.
قازاقستان تەننيس فەدەراتسياسىنىڭ مالىمەتىنشە, بۇل ايتۋلى جارىستا كەزىندە رودجەر فەدەرەر, رافاەل نادال, گاەل مونفيس سياقتى مىقتىلار جەڭىمپاز اتانعان ەدى.
دودا بارىسىندا زاڭعار اۋەلى اۋستريالىق ماكسيميلليان حەيدەلمايەردى 7:6 (7:4), 6:3 ەسەبىمەن جەڭدى. سوسىن فرانتسيانىڭ جاسوسپىرىمدەر اراسىندا ءبىرىنشى راكەتكاسى لەني كۋتۋرەنى 7:5, 6:7 (5:7), 6:4 ەسەبىمەن ۇتتى.
شيرەك فينالدا نۇرلان ۇلى رەسەيدىڭ جارىق جۇلدىزى ساۆا رىبكينگە بىردە-ءبىر ۇپاي بەرمەي 6:0, 6:0 ەسەبىمەن تازا جەڭىسكە جەتتى. ال جارتىلاي فينالدا ليۆاندىق دانيەل جادتى 6:1, 6:2 ەسەبىمەن ۇتتى.
بۇگىن زاڭعار نۇرلان ۇلى فينالدا (ەلوردا ۋاقىتىمەن ساعات 20.00-دە باستالادى) تاعى ءبىر فرانتسيالىق تيمەو ترۋفەلليمەن باس جۇلدەنى ساراپقا سالادى.