قىرعىزستان پرەزيدەنتى سادىر جاپاروۆ ءوزىنىڭ Facebook پاراقشاسىندا ۋكراينانىڭ شىعىسىندا ورىن العان جاعداي جونىندە پىكىر ءبىلدىردى, دەپ حابارلايدى Egemen.kz.
«مەن دونباسس توڭىرەگىندەگى جاعدايدى ۇزدىكسىز باقىلاپ وتىرمىن.
قىرعىز رەسپۋبليكاسى بۇۇ قاۋىپسىزدىك كەڭەسىنىڭ قولداۋىن تاپقان قاقتىعىستى رەتتەۋ جونىندەگى مينسك ۋاعدالاستىعىنىڭ جالعىز قۇجاتىنا ارقاشان سۇيەنگەن.
وكىنىشكە قاراي, قۇجات تالاپتارىنىڭ ورىندالماۋى قازىر بولىپ جاتقان قيىن جاعدايعا اكەلدى.
تۋىنداعان جاعدايدى تەك بەيبىت ديپلوماتيالىق جولمەن شەشىپ, ادام قۇرباندارىن بولدىرماۋ ماقساتىندا كەلىسسوزدەر ۇيىمداستىرۋ قاجەت دەپ ويلايمىن.
سەبەبى ادام ءومىرى - جەر بەتىندەگى ەڭ قۇندى نارسە.
جانجالدى ودان ءارى ۋشىقتىرۋعا جول بەرمەۋ ءۇشىن جاعدايدى رەتتەۋ كەزىندە بارىنشا ساقتىق پەن ۇستامدىلىق تانىتۋعا شاقىرامىن.
مۇمكىن, بۇل رەسەي ازاماتتارىنىڭ كوپشىلىگى تۇراتىن دونباسس اۋماعىنىڭ بەيبىت تۇرعىندارىن قورعاۋ ءۇشىن قاجەتتى شارا بولعان شىعار.
قانداي دا ءبىر مەملەكەتتى مويىنداۋ كەز كەلگەن ەلدىڭ ەگەمەندى قۇقىعى بولىپ تابىلاتىنىن اتاپ وتكىم كەلەدى», دەپ جازدى سادىر جاپاروۆ.