اقتاۋدا جوعارى وقۋ ورنى جوقتىڭ قاسى. اسىرەسە دارىگەر ماماندىعىن مەڭگەرگىسى كەلگەندەر اقتوبە, الماتى, نۇر-سۇلتان قالالارىنا قاراي باعىت تۇزەيدى. ءبىر جاعى وسى سەبەپتەن دە بولار, ماڭعىستاۋدا دارىگەر جەتىسپەۋشىلىگى جىلدار بويى وزەكتى قالپىندا قالىپ كەلەدى. قازىر ماڭعىستاۋ وبلىسى دارىگەرلەردىڭ تاپشىلىعى جوعارى وڭىرلەر قاتارىنا كىرەدى.
2021 جىلعى ءتورتىنشى توقساننىڭ قورىتىندىسى بويىنشا ەڭ تومەنگى ەسەپپەن مەملەكەتتىك مەديتسينالىق ۇيىمداردا 228 ماماننىڭ جەتىسپەۋشىلىگى بايقالدى. ولار – جالپى, دارىگەرلىك پراكتيكا, ەرەسەكتەر مەن بالالار انەستەزيولوگى, رەانيماتولوگ, تەراپەۆت, اكۋشەر, ەرەسەكتەر مەن بالالار گينەكولوگى, پەدياتر, ونكولوگ, وتورينولارينگولوگ, وفتالمولوگ, پسيحياتر, نەوناتولوگ, رەنتگەنولوگ, توموگراف, ۋزي دارىگەرى جانە باسقالار.
ءوڭىر باسشىلىعى وسى ولقىلىقتىڭ ورنىن تولتىرۋ ءۇشىن, سونداي-اق وبلىستىڭ الەۋەتىن كوتەرۋ, كادر تاپشىلىعىن ازايتۋ ماقساتىندا اقتاۋ قالاسىنان م.وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ اقتاۋ قالاسىنداعى فيليالىن اشۋعا قول جەتكىزدى.
– قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2020 جىلعى 1 قىركۇيەكتەگى قازاقستان حالقىنا جولداۋىنىڭ نەگىزگى باعىتتارىنىڭ ءبىرى – دەنساۋلىق ساقتاۋ جۇيەسىن دامىتۋ, اتاپ ايتقاندا, ساپالى جانە قولجەتىمدى مەديتسينالىق كومەك بەرۋ. وسى ماقساتتا م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ فيليالى ماڭعىستاۋ وڭىرىندە اشىلعالى وتىر. بۇل ايماقتا دارىگەرلەر دايارلاپ شىعاراتىن ۇلكەن ءبىلىم شاڭىراعى بولماق. ەلىمىزدىڭ مەديتسينا ۋنيۆەرسيتەتتەرىندە باكالاۆر, ينتەرناتۋرا, رەزيدەنتۋرا جانە ماگيستراتۋرادا وقىپ جاتقان ستۋدەنتتەر ەندى ماڭعىستاۋدا ءبىلىم الۋىنا مۇمكىندىك تۋىپ وتىر. وسىعان وراي وبلىس اكىمدىگى تاراپىنان قوسىمشا گرانتتار ءبولىنىپ, ستۋدەنتتەر ءبىلىم الۋدا. م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتى فيليالىنىڭ اشىلۋى رەزيدەنتتەرگە وقۋ مەن تاجىريبەنى قاتار ۇشتاستىرۋعا مول مۇمكىندىك بەرەدى. اتالعان ءبىلىم شاڭىراعى انتىنا ادال دارىگەرلەر دايارلاپ شىعاراتىن ۇلكەن ءبىلىم ورداسى بولاتىنىنا سەنەمىز, – دەدى فيليالدىڭ اشىلۋ سالتاناتىندا وبلىس اكىمىنىڭ ورىنباسارى گ.قالمۇراتوۆا.
رەسپۋبليكالىق كورسەتكىشپەن سالىستىرساق, وبلىستا دارىگەرلىك كادرلارمەن قامتاماسىز ەتۋ 10 مىڭ تۇرعىنعا شاققاندا 17,1%-دى قۇرايدى. بۇگىندە جەرگىلىكتى بيۋدجەت ەسەبىنەن ەلىمىزدىڭ مەديتسينالىق جوعارى وقۋ ورنىندا ينتەرناتۋرا مەن رەزيدەنتۋرادا 82 ستۋدەنت ءبىلىم الۋدا. 2018 جىلى 11 رەزيدەنت, 2019 جىلى 39 رەزيدەنت, 5 ينتەرن, 2020 جىلى 9 رەزيدەنت, 4 ينتەرن, 2021 جىلى 11 رەزيدەنت, 3 ينتەرن تەگىن وقۋعا تۇسكەن. سونداي-اق 2023-2025 جىلى جەرگىلىكتى بيۋدجەت ەسەبىنەن رەزيدەنتۋرا ماماندارىن دايارلاۋ ءۇشىن 2023 جىلى 36 گرانت, 2024 جىلى 50 گرانت, 2025 جىلى 72 گرانت ءبولىنۋ جوسپارلانىپ وتىر.
م.وسپانوۆ اتىنداعى مەديتسينالىق ۋنيۆەرسيتەتتە ءبىلىم العان تۇلەكتەر ءوڭىردىڭ مەديتسينا سالاسىندا از ەمەس. مىسالى, ماڭعىستاۋ وبلىستىق اۋرۋحاناسىندا 11 رەزيدەنت, وبلىستىق بالالار اۋرۋحاناسىندا 1 رەزيدەنت, مۇنايلى ورتالىق اۋداندىق اۋرۋحاناسىندا 1 رەزيدەنت, اقتاۋ قالالىق №2 ەمحاناسىندا 20 ينتەرن, 60 دارىگەر, جاڭاوزەن قالالىق №2 ەمحاناسىندا 12 ينتەرن, 19 دارىگەر, سەنىم مەديتسينالىق ەمحاناسىندا 30 دارىگەر, جاڭاوزەن قالالىق كوپبەيىندى اۋرۋحاناسىندا 32 دارىگەر, جاڭاوزەن قالالىق №1 ەمحاناسىندا 19 دارىگەر, جاڭاوزەن قالالىق №3 ەمحاناسىندا 24 دارىگەر, وبلىستىق ونكولوگيالىق ديسپانسەردە 13 دارىگەر, وبلىستىق جەدەل جانە شۇعىل مەديتسينالىق جاردەمدە 7 دارىگەر, «نەيرون وزەن» ەمحاناسىندا 3 دارىگەر, وبلىستىق فتيزيوپۋلمونولوگيالىق ورتالىقتا 7 دارىگەر, قاراقيا ورتالىق اۋداندىق اۋرۋحاناسىندا 33 دارىگەر جۇمىس ىستەيدى. ماڭعىستاۋلىق ستۋدەنتتەر ءۇشىن قولايلى بولعان بۇل جاڭالىق ناتيجەسىندە, 65 جىلدىق تاريحى بار مەديتسينالىق ۋنيۆەرسيتەتتىڭ پروفەسسور وقىتۋشىلارى ەندى ماڭعىستاۋ وڭىرىنە كەلىپ قىزمەت ەتەتىن بولادى. اقتاۋ قالاسىنداعى «مەيىربيكە» مەديتسينا كوللەدجىنىڭ جانىنان اشىلاتىن فيليالدا وقۋ جۇيەسى اقىلى جانە بيۋدجەتتىك باعىتتا جۇزەگە اسىرىلادى. اقتوبە قالاسىنداعى م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە 766 ستۋدەنت ءبىلىم الىپ جۇرسە, ولاردىڭ اراسىندا ماڭعىستاۋلىق بولاشاق دارىگەرلەر دە از ەمەس.
فيليالدىڭ اشىلۋ سالتاناتىندا ۋنيۆەرسيتەتتىڭ ديرەكتورلار كەڭەسىنىڭ توراعاسى, مەديتسينا عىلىمدارىنىڭ دوكتورى, پروفەسسور, مەديتسينا عىلىمدارى اكادەمياسىنىڭ اكادەميگى ج.دوسقاليەۆ, اتالعان ۋنيۆەرسيتەت رەكتورىنىڭ مىندەتىن اتقارۋشى, مەديتسينا عىلىمدارىنىڭ دوكتورى, پروفەسسور ە.يسماگۋلوۆا, دەنساۋلىق سالاسىنىڭ ارداگەرى, «مەيىربيكە» كوللەدجىنىڭ ديرەكتورى ءا.ساعىمباەۆ, ماڭعىستاۋ وبلىستىق پەريناتالدىق ورتالىعىنىڭ اكۋشەر-گينەكولوگ حيرۋرگى نۇرلان جاكيەۆ ءسوز الىپ, ءوڭىر مەديتسيناسى مەن ءبىلىم سالاسىنداعى جاڭالىققا قولداۋ بىلدىرگەن ءوڭىر باسشىلىعىنا ريزاشىلىقتارىن ءبىلدىرىپ, فيليال جۇمىسىنا ساتتىلىك تىلەدى.
ماڭعىستاۋ وبلىسى