قازاقستاندىق ءۇش ۆاينەر قارجى پيراميداسىن قۇردى جانە ونى باسقاردى دەگەن كۇدىكپەن ۇستالدى. تەرگەۋگە الىنعاندار – كوپتىڭ كوزايىمىنا اينالىپ ۇلگەرگەن ۆاينەر مەيىرجان تورەباەۆ, اكتەرلەر مەيىرحان شەرنيازوۆ پەن ازيمجان سايدباەۆ.
الماتى قالالىق سوتىنىڭ مالىمەتىنشە, بەلگىلى ۆاينەرلەر قىلمىستىق كودەكستىڭ 217-بابى «قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ» بويىنشا ايىپتالعان. ناقتىلاپ ايتقاندا, وسى باپتىڭ 3-بولىگىنىڭ 2-تارماعىنا سايكەس قىلمىستىق ىسكە كۇدىكتى رەتىندە ۇستالعان. ال بۇل زاڭ نورماسىندا «اسا ءىرى مولشەردە اقشا نەمەسە وزگە م ۇلىكتى تارتا وتىرىپ» قىلمىس جاساۋ تۋرالى ايتىلادى. ەگەر 3-تارماقتا كوزدەلگەن جاعدايلار ءوز دالەلىن تاپسا, الەۋمەتتىك جەلى «جۇلدىزدارىنىڭ» بار دۇنيە-مۇلكى تاركىلەنىپ, وزدەرى جەتى جىلعا دەيىن باس بوستاندىقتارىنان ايىرىلۋلارى ابدەن مۇمكىن. ءبىر ايتا كەتەرلىگى, كودەكستە «قارجىلىق پيراميدانى قۇرۋعا دەم بەرۋشىلىك نەمەسە وعان نەمەسە ونىڭ قۇرىلىمدىق بولىمشەسىنە باسشىلىق ەتۋ تۋرالى ءوز ەركىمەن مالىمدەگەن, سونداي-اق ونىڭ قىزمەتىن اشۋعا نەمەسە جولىن كەسۋگە بەلسەندى تۇردە ىقپال ەتكەن, قارجىلىق پيراميدانى ۇيىمداستىرۋشىدان باسقا ادام, ەگەر ونىڭ ارەكەتتەرىندە وزگە قىلمىس قۇرامى بولماسا, قىلمىستىق جاۋاپتىلىقتان بوساتىلاتىندىعى» جونىندە دە ەسكەرتىلەدى.
الماتىنىڭ تەرگەۋ سوتى ءۇش كۇدىكتىگە قاتىستى بۇلتارتپاۋ شاراسىن سانكتسيالاعان. قازىرگى تاڭدا م.تورەباەۆ پەن م.شەرنيازوۆ 1000 ايلىق ەسەپتىك كورسەتكىش, ياعني 3 063 000 تەڭگە كەپىلمەن بوساتىلسا, ا.سايدباەۆتى پوليتسيانىڭ ءالى تابا الماعانى عانا بەلگىلى. الايدا سوڭعىسى سوت سانكتسياسىمەن سىرتتاي ەكى اي مەرزىمگە قاماۋعا الىندى. تەرگەۋ مالىمەتتەرىنە قاراعاندا, ۆاينەرلەر Mudarabah Capital كومپانياسىنىڭ جارناماسىن جاساعان جانە ونى باسقارادى دەگەن كۇدىككە ءىلىنىپ وتىر. ەستەرىڭىزدە بولسا, وتكەن جىلدىڭ قازان ايىنان باستاپ وسى كومپانيانىڭ بىرنەشە لاۋازىمدى ادامى, سونىڭ ىشىندە باس ديرەكتور رۋسلان بۇرقانوۆ قاماۋعا الىنعان بولاتىن. تەرگەۋ كومپانيا مەملەكەتتىك ساتىپ الۋعا قاتىسۋ ءۇشىن قارجى پيراميداسىنىڭ قاعيداتى بويىنشا ازاماتتار مەن فيرمالاردىڭ قاراجاتىن تارتىپ وتىرعان دەپ سانايدى.
2019 جىلدىڭ اقپان ايىنان باستاپ 2021 جىلدىڭ قاڭتارىنا دەيىن Mudarabah Capital پەن Astex كومپانيالارىنىڭ باسشىلارى زاڭدى جانە جەكە تۇلعالارمەن مەملەكەتتىك ساتىپ الۋعا قاتىسۋ ءۇشىن قاجەتتى قارجى تارتۋعا قاتىستى شارتتار جاساسقان. بۇل قۇجات بويىنشا فيرمالار اي سايىن ءار سالىمشىعا سالىم سوماسىنىڭ 20 پايىزىن تولەپ وتىرۋعا ءتيىس بولعان. وسى ۋاقىت ارالىعىندا 160-تان استام سالىمشى Mudarabah capital ارقىلى Astex-كە 2 ملرد تەڭگەدەن استام قارجى قۇيعان. ال كومپانيالاردىڭ جارناماسىن ەلگە تانىمال ۆاينەرلەر مەن اكتەرلەر, سونىڭ ىشىندە مەيىرجان تورەباەۆ پەن مەيىرحان شەرنيازوۆ جاساعان بولاتىن. جارنامادا «جۇلدىزدار» كومپانيا تەندەرلەردەگى اقشانى «اينالدىرۋ» ارقىلى اي سايىن جوعارى پايىزدا قارجى تابۋدى كوزدەيتىنىن ايتىپ, كوپشىلىكتى قىزىقتىرعان ەدى. ۆاينەرلەردىڭ جارناماسىنا سەنىپ, قوماقتى اقشالارىنان ايىرىلىپ قالعانىن كەش تۇسىنگەن سالىمشىلار اقىر سوڭى ارىزدارىن ارقالاپ پوليتسياعا جۇگىنگەن.
ءىىم تەرگەۋ دەپارتامەنتىنىڭ باسشىسى سانجار ءادىلوۆتىڭ حابارلاۋىنشا, بۇگىندە ەلىمىزدە قارجى پيراميدالارى قۇرباندارىنىڭ سانى 30 مىڭنان اسىپ كەتكەن. وسىنشاما حالىق 54 ملرد تەڭگەدەن استام قارجىسىنان ايىرىلىپ قالعان. ءبىر عانا مەيىرجان تورەباەۆتىڭ Instagram پاراقشاسىنا 4 ميلليونعا جۋىق ادامنىڭ جازىلعانىن ەسكەرسەك, ادەتتە تەز بايۋ مەن وڭاي ولجاعا كەنەلۋدى جارنامالايتىن «جۇلدىزداردىڭ» ءالى قانشا جاندى جارعا جىعارىن شامالاي بەرۋگە بولادى.