تۇركىستان قالاسىندا ورنالاسقان «ازىرەت سۇلتان» مەملەكەتتىك تاريحي-مادەني قورىق-مۋزەيى جانىنان عۇلاما عالىم قوجا احمەت ءياساۋيدىڭ قىزى گاۋھار انا كەسەنەسىنە كەلۋشىلەرگە ارنالعان ساپار ورتالىعى سالىنىپ جاتىر.
قورىق-مۋزەيدىڭ تاريحي ارحيتەكتۋرالىق قۇندى ەسكەرتكىشتەرىنىڭ ءبىرى سانالاتىن گاۋھار انانىڭ كەسەنەسىنە زيارات ەتۋ ءۇشىن تەك قازاقستان عانا ەمەس وزبەكستان, تۇركيا, قىرعىزستان سىندى كوپتەگەن ەلدەن تۋريستەر كەلەدى.
«ازىرەت سۇلتان» قورىق-مۋزەيىنە قاراستى تاريحي-مادەني ورىننىڭ بىرىنەن سانالاتىن بۇل نىسان – تۇركىستان قالاسىنان وڭتۇستىككە قاراي 4 شاقىرىم جەردە, تۇركىستان-ءشاۋىلدىر تاس جولىنان سولعا قاراي 400-500 مەتر قاشىقتىقتا ورنالاسقان.
جاڭادان سالىنىپ جاتقان ساپار ورتالىعىنىڭ اۋماعى 1,25 گەكتاردى قامتىسا, قۇرىلىس جۇرگىزۋ الاڭى – 683,68 شارشى مەتر, كوگالداندىرۋ شەڭبەرى 8758,27 مەتر. ونىڭ سىرتىندا كەسەنەسىنە كەلۋشىلەر مەن تۋريستەرگە قولايلى بولۋ ءۇشىن ساپار ورتالىعىندا اقپاراتتىق جۇيە, قوناقۇي, اۆتوتۇراق قاراستىرىلىپ, نىساننىڭ اياقتالۋ مەرزىمى التى ايعا جوسپارلانعان كورىنەدى.