9 اقپاندا ايماق باسشىسى نۇرلان نوعاەۆ اقتاۋدان جالدامالى تۇرعىن ءۇي العان جاڭاوزەن قالاسىنىڭ ءبىر توپ تۇرعىنمەن, سونداي-اق اقتاۋ قالاسىنىڭ كوپ بالالى انالارىمەن كەزدەستى, دەپ حابارلايدى Egemen.kz ماڭعىستاۋ وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
اكىمدىككە كەلگەن ايەلدەر جاڭاوزەن قالاسىنان اقتاۋ قالاسىنا قونىستاندىرۋ باعدارلاماسى بويىنشا 2019-2022 جىلدار ارالىعىندا جالعا بەرىلگەن پاتەرلەرىن جەكەشەلەندىرىپ بەرۋدى تالاپ ەتتى. سونداي-اق, پاتەردى جالعا الۋ جانە كوممۋنالدىق قىزمەتتەر ءۇشىن تولەنەتىن تولەم اقىسىن الىپ تاستاۋ تۋرالى تالاپتارىن ايتتى. ماڭعىستاۋ وبلىسىنىڭ اكىمى نۇرلان نوعاەۆ قولدانىستاعى زاڭناماعا سايكەس جالعا بەرىلەتىن تۇرعىن ءۇي جەكەشەلەندىرۋگە جاتپايتىنىن ءتۇسىندىردى. - اقتاۋ قالاسىندا جالعا بەرگەن پاتەرلەردىڭ جالعا الۋ مەرزىمىنە شەكتەۋ قويىلمايدى. ەگەر كەلىسىم شارتتا تىركەلگەن ادام قايتىس بولعان جاعدايدا, جالعا الۋ كەلىسىم-شارتى قالعان وتباسى مۇشەلەرىنە ۇزارتىلىپ بەرىلەدى. قر قولدانىستاعى «تۇرعىن ءۇي قاتىناستارى تۋرالى» زاڭى بويىنشا, ءسىز تۇراتىن پاتەرلەر كوممۋنالدىق تۇرعىن ءۇي قورىنان ساتىپ الۋ قۇقىعىنسىز بەرىلەدى, جالعا بەرىلەتىن تۇرعىن ءۇي جەكەشەلەندىرۋگە جاتپايدى. كوممۋنالدىق قىزمەتتەرگە قاتىستى-ەگەر ءسىزدىڭ تابىسىڭىز تولەمدى تولىق وتەۋگە مۇمكىن بولماسا, وندا «تۇرعىن ءۇي قاتىناستارى» تۋرالى زاڭعا سايكەس قاجەتتى قۇجاتتار پاكەتىن جيناپ,ءسىز تۇرعىن ءۇي كومەگىن الا الاسىز, - دەدى نۇرلان نوعاەۆ. تۇرعىن ءۇيدى جالداۋ اقىسى تۇرعىن ءۇيدىڭ كۆادراتىنا بايلانىستى 8-دەن 12 مىڭ تەڭگەگە دەيىن وزگەرەدى. كەزدەسۋگە وبلىستىق ءماسليحات دەپۋتاتتارى دا قاتىسىپ, جينالعانداردى كوميسسيا جۇمىسىن جالعاستىرۋعا شاقىردى. ءماسليحاتتىڭ بىرقاتار دەپۋتاتتارى انالار كوتەرگەن ماسەلەلەردى قاراۋ ءۇشىن پارلامەنتكە حات جولدادى. كەزدەسۋ قورىتىندىسى بويىنشا كوميسسيا جۇمىسىن جالعاستىرۋ تۋرالى شەشىم قابىلداندى.