قىلمىستىق كودەكستىڭ 174-بابى «الەۋمەتتiك, ۇلتتىق, رۋلىق, ناسiلدiك, تەكتىك-توپتىق نەمەسە دiني الاۋىزدىقتى قوزدىرۋ» بويىنشا ءىستى بولىپ, سىرتتاي سوتتى بولعان بەلگىلى وپپوزيتسيونەر ەرمەك نارىمباەۆتىڭ قولىنا كىسەن سالىندى. الماتى قالاسىنىڭ پروكۋراتۋراسى بەرگەن مالىمەتكە سەنسەك, ول كيەۆتەن ۇشىپ كەلگەن ساتىندە الماتى حالىقارالىق اۋەجايىندا قولعا تۇسكەن. قازىرگى تاڭدا سوت ۇكىمىن ورىنداۋ ماقساتىندا ەرمەك نارىمباەۆ تەرگەۋ يزولياتورىنا قاماۋعا الىندى.
ەستەرىڭىزدە بولسا سەرىكجان مامبەتالين مەن ەرمەك نارىمباەۆ 2015 جىلدىڭ 12 قازانىندا ۇستالعان بولاتىن. ولاردىڭ ۇستىنەن ءىس قوزعاۋعا الەۋمەتتىك جەلىلەردە ۇلتتىق ار-نامىستى جانە قادىر-قاسيەتتى, ۇلتتىق ار-نامىستى قورلاۋ بەلگىلەرى بار اقپاراتتى تاراتۋى تۇرتكى بولعان ەدى. سول كەزدە پروكۋرور سانكتسياسى بويىنشا ولاردىڭ تۇرعىلىقتى جەرلەرىنە ءتىنتۋ جۇرگىزۋ بارىسىندا زاتتاي دالەلدەمەلەر الىندى.
بۇعان دەيىن دە ە.نارىمباەۆ الەۋمەتتىك جەلىلەر ارقىلى ءوزىنىڭ قازاقستانعا كەلەتىنىن, بىراق ەلگە جەتكەن بەتتە-اق اۋەجايدا ۇستالاتىنىن مالىمدەگەن بولاتىن.
وپپوزيتسيونەردىڭ قاماۋعا الىنۋى جونىندە پىكىر بىلدىرگەن بەلگىلى زاڭگەر, ۇلتتىق قوعامدىق سەنىم كەڭەسىنىڭ مۇشەسى مارات ءباشىموۆ ونىمەن جەكە تانىستىعى جوقتىعىن, وپپوزيتسيونەردىڭ سىرتتاي سوتتالعانى تۋرالى اقپاراتتى ينتەرنەتتەن وقىپ بىلگەنىن جەتكىزدى.
«ۇكىم بويىنشا وعان تۇرعىلىقتى مەكەنجايىنان تىسقارى شىعۋعا تىيىم سالىنعان ەكەن. ال ول 2016 جىلدىڭ شىلدەسىندە قازاقستاننان قاشىپ شىققان. كەيىن اپپەلياتسيا ۇكىمدى وزگەرتىپ, جالپى رەجىمدەگى كولونيادا ءۇش جىل باس بوستاندىعىنان ايىرعان. ياعني, تاعايىندالعان جازا وتەلمەگەن. ال بۇل اقپارات شەكاراشىلاردىڭ بازاسىندا تۇر دەگەن ءسوز. وسى سەبەپتى دە ونى ۇستاعان. ءارى قاراي نە بولاتىنىن مەن بىلمەيمىن. مۇنداي جاعدايدا پروتسەسسۋالدىق نورمالاردى جەتىك بىلەتىن, قىلمىستىق قۇقىق بويىنشا ماماندانعان ادۆوكات كەرەك ەكەنىن عانا بىلەمىن», دەپ جازدى مارات ءباشىموۆ الەۋمەتتىك جەلىدەگى پاراقشاسىندا.
ەستەرىڭىزگە سالا كەتەيىك, ەرمەك نارىمباەۆ 2016 جىلدىڭ شىلدەسىندە قازاقستاننان قاشىپ كەتكەن. سودان بەرى ۋكراينادا تۇرىپ كەلگەن. سول جىلى ول قازاقستانداعى تەرروريزم مەن ەكسترەميزمدى قارجىلاندىرۋعا قاتىسى بار ۇيىمدار مەن تۇلعالاردىڭ تىزىمىنە ەنىپ, بۇل ءتىزىم ەلىمىزدەگى قارجى مينيسترلىگىنىڭ سايتىندا جاريالانعان بولاتىن.