مەملەكەت باسشىسى قحر توراعاسىمەن كەلىسسوز جۇرگىزدى

كەزدەسۋ بارىسىندا ەكى ەلدىڭ كوشباسشىلارى قازاقستان مەن قىتاي اراسىنداعى جان-جاقتى ستراتەگيالىق سەرىكتەستىكتىڭ, سونىڭ ىشىندە ساياسي, ساۋدا-ەكونوميكالىق, كولىك-ترانزيتتىك جانە مادەني-گۋمانيتارلىق سالالاردىڭ اۋقىمدى ماسەلەلەرىن تالقىعا سالدى.

قاسىم-جومارت توقاەۆ قىتاي توراعاسىنا ءىلتيپات ءبىلدىرىپ, قىسقى وليمپيادا ويىندارىنىڭ سالتاناتتى اشىلۋ ءراسىمى جوعارى دەڭگەيدە ۇيىمداستىرىلعانىن اتاپ ءوتتى.

«بەيجىڭدەگى وليمپيادا ويىندارى بۇكىل ادامزات ءۇشىن جاۋاپتى ساتتە ءوتىپ جاتىر. بۇل سپورت سايىستارى جاڭارۋعا ۇندەپ, پاندەميانىڭ سىن-قاتەرلەرىن ەڭسەرۋگە ۇلەس قوسادى. سوندىقتان  ءسىزدىڭ شاقىرۋىڭىزدى زور قۋانىشپەن قابىل الدىم», دەدى مەملەكەت باسشىسى.

پرەزيدەنت جاڭا قازاقستان قۇرۋ جولىندا قاجەتتى كومەك كورسەتۋگە نيەت بىلدىرگەن قىتاي توراعاسىنا ريزاشىلىعىن ءبىلدىردى. 

وعان قوسا, قاسىم-جومارت توقاەۆ سي ءتسزينپيننىڭ ءتيىمدى باسشىلىعىمەن قول جەتكىزگەن قىتاي ەكونوميكاسىنىڭ دامۋ جەتىستىكتەرىنە جوعارى باعا بەردى.

پرەزيدەنت ديپلوماتيالىق قاتىناستار ورناعان 30 جىل ىشىندەگى قازاق-قىتاي قاتىناستارىنىڭ دامۋى تۋرالى ءسوز قوزعاپ, قوس ەلدىڭ بارلىق سالاداعى ستراتەگيالىق سەرىكتەستىكتىڭ بەرىك ىرگەتاسىن قالاعانىنا نازار اۋداردى.

قاسىم-جومارت توقاەۆ قازاق-قىتاي دوستىعىن نىعايتۋ ماقساتىندا تىعىز ىنتىماقتاستىققا ءازىر ەكەنىن اتاپ ءوتىپ, سي ءتسزينپيندى قىركۇيەك ايىندا قازاقستانعا مەملەكەتتىك ساپارمەن كەلۋگە شاقىردى.

كەلىسسوز بارىسىندا ساۋدا-ەكونوميكالىق بايلانىستاردى ارتتىرۋداعى بىرلەسكەن ءىس-قيمىلعا ەرەكشە نازار اۋدارىلدى. پرەزيدەنت پاندەمياعا قاراماستان, ەكىجاقتى تاۋار اينالىمى 2021 جىلدىڭ قورىتىندىسى بويىنشا 15,2 پايىزعا ءوسىپ, 18,2 ميلليارد دوللارعا جەتكەنىن ايتتى. قىتاي مەن ورتالىق ازيانىڭ بەس ەلى اراسىنداعى جالپى ساۋدانىڭ جارتىسى قازاقستانعا تيەسىلى.

سونىمەن قاتار, قاسىم-جومارت توقاەۆ ء«بىر بەلدەۋ - ءبىر جول» باستاماسىن ودان ءارى ىسكە اسىرۋ جونىندەگى باسىم مىندەتتى اتادى. مەملەكەت باسشىسى ەلىمىزدىڭ تسيفرلىق تەحنولوگيالار مەن كولىك جانە لوگيستيكا سالالارىنداعى ىنتىماقتاستىقتى نىعايتۋعا مۇددەلى ەكەنىن جەتكىزدى.

كەلىسسوز بارىسىندا تۋريزم جانە مادەني-گۋمانيتارلىق بايلانىستار سالاسىنداعى ىنتىماقتاستىقتى دامىتۋدىڭ پەرسپەكتيۆاسى, سونداي-اق قازاقستاندا قىتاي مادەني ورتالىعىن اشۋ ماسەلەسى تالقىلاندى.

قحر توراعاسى ء«بىرتۇتاس قىتاي» قاعيداتىنا قولداۋ كورسەتكەن قاسىم-جومارت توقاەۆقا العىس ايتىپ, ستراتەگيالىق ىنتىماقتاستىقتى ودان ءارى جان-جاقتى دامىتۋعا دايىن ەكەنىنە سەنىم ءبىلدىردى.

سي تسزينپين قازاقستان مەن قحر اراسىنداعى بايلانىستاردىڭ الداعى 30 جىلداعى التىن داۋىرىنە وسى كەزدەسۋ جول اشاتىنىن اتاپ ءوتتى.

قحر توراعاسى ء«بىر بەلدەۋ - ءبىر جول» باستاماسى جۇزەگە اسىرىلىپ جاتقان 9 جىل ىشىندەگى وڭ ىنتىماقتاستىقتى اتاپ ءوتتى. سونداي-اق سي تسزينپين اۋىل شارۋاشىلىعى, جاسىل ەنەرگەتيكا, جاساندى ينتەللەكت, قارجى جانە ەلەكتروندى ساۋدا سالالارىنداعى ءوزارا ىقپالداستىقتىڭ كەلەشەگىنە دە ەرەكشە نازار اۋداردى.

قىتاي باسشىسى سي تسزينپين قاسىم-جومارت توقاەۆتىڭ پاراساتتى ءارى كورەگەن باسشىلىعىمەن قازاقستاننىڭ قۋاتتى ءارى وركەندەگەن مەملەكەتكە اينالاتىنىنا سەنىم ءبىلدىردى.

كەزدەسۋ سوڭىندا سي تسزينپين قاسىم-جومارت توقاەۆتىڭ قازاقستانعا شاقىرۋىن قابىل الىپ, الداعى كۇزدە ەلىمىزگە مەملەكەتتىك ساپارمەن كەلۋ جونىندەگى جوسپارىمەن ءبولىستى.