بۇگىندە دۇنيە ءجۇزىنىڭ بىرقاتار ەلدەرىن, سونىڭ ىشىندە ءبىزدىڭ دە ەلىمىزدى جاۋلاعان سىبايلاس جەمقورلىق الەمدىك قاۋىمداستىقتىڭ باس اۋىرتار ماسەلەسىنە اينالىپ وتىرعانى جاسىرىن ەمەس. جەمقورلىق ەلدىڭ قاۋىپسىزدىگىنە قاۋىپ ءتوندىرىپ, ەكونوميكالىق جانە الەۋمەتتىك رەفورمالاردى جۇرگىزۋگە كەدەرگى كەلتىرىپ, مەملەكەتتىڭ حالىقارالىق بەدەلىنە ۇلكەن نۇقسان تيگىزۋدە. سوندىقتان دا قازىرگى كەزدە سىبايلاس جەمقورلىققا قارسى كۇرەس اكىمشىلىك, زاڭدىلىق, اقپاراتتىق سەكىلدى كەشەندى باعىتقا نەگىزدەلۋگە ءتيىس. ءويتكەنى, جەمقورلىقپەن كۇرەستەگى جەتىستىك, تەك بارلىق مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە قوعام مەن كوپشىلىكتىڭ ارالاسۋى ارقاسىندا عانا ءتيىمدى بولماق. بۇل ورايدا مەملەكەت باسشىسى نۇرسۇلتان نازارباەۆ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا قازاقستاندا ەكونوميكالىق دامۋ جانە ىنتىماقتاستىق ۇيىمىنىڭ بىرقاتار قاعيدالارى مەن قالىپتارىن ەنگىزۋدى العا قويعانى بەلگىلى. مىنە, وسىعان بايلانىستى قارجى پوليتسياسىنىڭ اكادەمياسى «قازاقستانداعى سىبايلاس جەمقورلىققا قارسى كۇرەس جانە حالىقارالىق (شۆەد) تاجىريبە» اتتى حالىقارالىق عىلىمي-پراكتيكالىق كونفەرەنتسيا وتكىزدى.
كونفەرەنتسيا جۇمىسىنا ەىقۇ استانا قالاسىنداعى ورتالىعىنىڭ باسشىسى ناتاليا زارۋدنيا, شۆەتسيانىڭ سىبايلاس جەمقورلىققا قارسى ينستيتۋتىنىڭ باسشىسى, ستوكگولم ۋنيۆەرسيتەتىنىڭ قۇقىق پروفەسسورى كلاەس ساندگرەن جانە پرەزيدەنت اكىمشىلىگىنىڭ, پرەمەر-مينيستر كەڭسەسىنىڭ, قاۋىپسىزدىك كەڭەسىنىڭ, قۇقىق قورعاۋ جانە كۇشتىك قۇرىلىم ورگاندارىنىڭ, ۆەدومستۆولىق وقۋ ورىندارىنىڭ, جوو-لار رەكتورلارى, ۇكىمەتتىك ەمەس ۇيىمداردىڭ وكىلدەرى قاتىستى.
كونفەرەنتسيادا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ءبىرىنشى ورىنباسارى ا. لۋكين ءسوز الىپ, جەمقورلىققا قارسى ءتيىمدى كۇرەستى ۇيىمداستىرا ءبىلۋ ماسەلەسى قازاقستان رەسپۋبليكاسىنىڭ سىبايلاس جەمقورلىققا قارسى كۇرەستەگى بىردەن-ءبىر باسىم باعىتى بولىپ تابىلادى دەدى. ءبۇگىنگى تاڭدا ەلىمىزدە بۇعان قارسى كۇرەستىڭ 2011-2015 جىلدارعا ارنالعان سالالىق باعدارلاماسى جۇزەگە اسىرىلۋدا. وندا ۇلتتىق زاڭنامانى جەتىلدىرۋگە, جەمقورلىق كورىنىستەرىن تومەندەتۋگە, «كولەڭكەلى» ەكونوميكا كولەمىن تەجەۋگە باستى نازار اۋدارىلعان. وسى سالالىق باعدارلاما جانە سىبايلاس جەمقورلىققا قارسى كۇرەس جونىندەگى حالىقارالىق ۇيىمنىڭ ۇسىنىستارى شەڭبەرىندە قازاقستان رەسپۋبليكاسىنىڭ زاڭنامالارىن جانداندىرۋ باعىتىندا بىرقاتار جۇمىستار قولعا الىنىپ جاتىر. سونىڭ ءبىرى رەتىندە جەمقورلىق قۇقىق بۇزۋشىلىق اياسىندا «جەمقورلىققا قارسى كۇرەس تۋرالى», قىلمىستىق جانە اكىمشىلىك قۇقىق بۇزۋشىلىق كودەكستەرىنىڭ جاڭا نۇسقالارى سەكىلدى قازاقستان رەسپۋبليكاسىنىڭ جاڭا زاڭ جوبالارى جۇزەگە اسىرىلۋدا.
كونفەرەنتسيادا سىبايلاس جەمقورلىق ەلىمىزدەگى جوعارى ءبىلىم بەرۋ جۇيەسىن تۇتاس جايلاپ بارا جاتقاندىعى ايتىلدى. سوندىقتان, ەگەر وندا جۇرگىزىلىپ جاتقان رەفورمالاردا جەمقورلىقتىڭ ءتۇپ تامىرىن قيۋ سەكىلدى ناقتى شارالار قولعا الىنباسا, ەشقانداي ناتيجە بەرمەيتىندىگى دە باسا ايتىلدى. ارينە اتقارىلىپ جاتقان جۇمىستار بارشىلىق. الايدا, قولعا الىنىپ جاتقان سول قاتاڭ شارالارعا قاراماستان جەمقورلىق ساپاسىز ءبىلىم بەرۋدىڭ وزەگىنە اينالىپ تۇرعانىن جاسىرۋ مۇمكىن ەمەس كورىنەدى.
سونداي-اق, كونفەرەنتسيادا «سىبايلاس جەمقورلىقپەن كۇرەستەگى جالپى تاجىريبە», «ۇيىم جۇمىستارىنىڭ تيىمدىلىگىن ارتتىرۋ مەن ۇيىم قۇرىلىمىن دامىتۋ», «شۆەتسيا سىبايلاس جەمقورلىققا قارسى كۇرەس ينستيتۋتىنىڭ ءتاجىريبەسى», «سىبايلاس جەمقورلىققا قارسى كۇرەس: قازاقستان رەسپۋبليكاسىنىڭ ءتاجىريبەسى», «جوو-داعى سىبايلاس جەمقورلىققا قارسى كۇرەس», «قازاقستان رەسپۋبليكاسىنداعى جوو-دا سىبايلاس جەمقورلىققا قارسى كۇرەس ءجونىندەگى ۇيلەستىرۋ كەڭەسىن قۇرۋ تۋرالى» جانە ت.ب. تاقىرىپتار تالقىعا سالىندى. وسى تالقىلاۋ بارىسىنا ساي ءتيىستى ۇسىنىمدار قابىلداندى.
الەكساندر تاسبولاتوۆ,
«ەگەمەن قازاقستان».