باتىس قازاقستان وبلىسىندا اۋا رايىنىڭ ناشارلاۋىنا بايلانىستى رەسپۋبليكالىق جول جابىلدى, دەپ حابارلايدى Egemen.kz.
«قازاۆتوجول» جشس بقو فيليالىنىڭ مالىمەتى بويىنشا 3 اقپان كۇنى جەرگىلىكتى ساعات 12.30-دان باستاپ رەسپۋبليكالىق ماڭىزى بار ورال-تاسقالا-رف شەكاراسى (76-104 كم, تاسقالادان رەسەي شەكاراسىنا دەيىن) جولىندا بارلىق كولىك تۇرلەرى ءۇشىن قوزعالىسقا شەكتەۋ قويىلدى.
اتالمىش ارالىقتا كۇشتى جەل سالدارىنان بۇرقاسىن كوتەرىلىپ, جولدىڭ كورىنۋىن قيىنداتىپ تۇر.
«قازگيدرومەت» رمك مالىمەتى بويىنشا بۇدان بۇرىن 3 اقپان كۇنى وبلىستىڭ كەي جەرلەرىندە كوكتايعاق بولىپ, تۇمان ءتۇسىپ, جەلدىڭ كۇشەيەتىنى حابارلانعان بولاتىن.
وسىعان بايلانىستى بقو تج دەپارتامەنتى ەسكەرتۋ جاريالاپ, تۇرعىندارعا اباي بولۋ قاجەتتىگىن جەتكىزدى.