وقىتۋ ورتالىعىنىڭ سەرتيفيكاتتالعان تۇلەكتەرى «buildingSMART» حالىقارالىق تىزىمىنە ەنگىزىلەدى, دەپ حابارلايدى Egemen.kz.
قۇرىلىس سالاسىن تسيفرلاندىرۋ جونىندەگى مىندەتتەر شەڭبەرىندە «قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى» اق 2021 جىلى تۇرعىن ۇيلەر مەن وزگە دە وبەكتىلەردى جوبالاۋ جانە سالۋ كەزىندە ءجيى پايدالانىلاتىن 30 مەملەكەتتىك قۇرىلىس ءنورماتيۆىن تسيفرلاندىردى.
ناتيجەسىندە اۆتوماتتاندىرىلعان رەجيمدە قۇرىلىس وبەكتىلەرىنىڭ تسيفرلىق مودەلدەرىن قۇرىلىس نورمالارى مەن ەرەجەلەرىنىڭ تالاپتارىنا سايكەستىگىن تەكسەرۋگە, سول ارقىلى ادامي فاكتور سالدارىنان جىبەرىلەتىن قاتەلىكتەر تاۋەكەلىن بارىنشا ازايتۋعا مۇمكىندىك بەرەدى.
بۇدان باسقا, ساراپتاما جۇمىسىن ءىشىنارا اۆتوماتتاندىرۋعا جانە وبەكتىلەردى جوبالاۋ, سالۋ جانە پايدالانۋ پروتسەستەرىنىڭ اشىقتىعىن ەلەۋلى تۇردە ارتتىرادى. قۇرىلىس ساپاسى مەن مەرزىمىن قىسقارتۋعا وڭ اسەر ەتەدى.
سونىمەن قاتار ينستيتۋت 2021 جىلى قۇرىلىستاعى ينجەنەر-كونسۋلتانتتاردىڭ ۇلتتىق قاۋىمداستىعىمەن (رف) قازقسعزي بازاسىندا buildingSMART كاسىبي سەرتيفيكاتتاۋ باعدارلاماسى بويىنشا قۇرىلىس سالاسى ماماندارىن دايارلايتىن العاشقى ورتالىق قۇرۋ تۋرالى كەلىسىم جاسادى.
ورتالىق قازاقستاننىڭ ينجەنەر-جوبالاۋشىلارى مەن قۇرىلىسشىلارىنا ەمتيحان تاپسىرىپ, بۇكىل الەمدە تانىلاتىن قۇجاتتار الۋعا, قۇرىلىستاعى اقپاراتتىق مودەلدەۋ تەحنولوگيالارى بويىنشا الەمدىك دەڭگەيدە وقۋعا مۇمكىندىك بەرەدى.
ورتالىقتىڭ سەرتيفيكاتتالعان تۇلەكتەرى buildingSMART International ورتالىقتاندىرىلعان اشىق تىزىمىنە ەنگىزىلەدى.