سەيسەنبى كۇنى كەشكە گۆينەيا-بيساۋداعى ۇكىمەت سارايىنا ۇيىمداستىرىلعان شابۋىل كەزىندە كەم دەگەندە التى ادام قايتىس بولعان, دەپ حابارلايدى Egemen.kz ريا نوۆوستيگە سىلتەمە جاساپ.
اۆتومات جانە گراناتومەتتەرمەن قارۋلانعان ءبىر توپ ادام 1-اقپان كۇنى ەل استاناسى بيساۋداعى ۇكىمەت ۇيىنە شابۋىل ۇيىمداستىرعان. ءدال سول ساتتە عيماراتتا مەملەكەت كوشباسشىلارىنىڭ قاتىسۋىمەن مينيسترلەر كەڭەسىنىڭ وتىرىسى ءوتىپ جاتقان.
«مەملەكەتتىك توڭكەرىس جاساۋ ارەكەتى كەزىندە گۆينەيا-بيساۋداعى ۇكىمەت سارايىندا بولعان اتىس سالدارىنان التى ادام قايتىس بولدى», دەلىنگەن حابارلامادا.
بۇعان دەيىن گۆينەيا-بيساۋ پرەزيدەنتى ومار سيسسوكو ەمبالو ەل استاناسى بيساۋدا اتىس بەس ساعاتقا سوزىلعانىن, ناتيجەسىندە كوپتەگەن ادامدار اجال قۇشقانىن مالىمدەگەن ەدى. ايتكەنمەن ول قايتىس بولعانداردىڭ سانى تۋرالى ناقتى مالىمەتتەر كەلتىرگەن جوق. مەملەكەت باسشىسى ءوزىنىڭ پرەزيدەنت سارايىندا ەكەنىن, ال قالاداعى جاعداي باقىلاۋعا الىنعانىن اتاپ ءوتتى.