قىزىلوردا وبلىسىنىڭ جالاعاش اۋدانىنا قاراستى جاڭاتالاپ اۋىلىندا ءاز ناۋرىز مەرەكەسىنە ەڭ ۇلكەن 7 شەلپەك ءپىسىرىلدى. بۇل تۋرالى «قازاقستان» تەلەارناسى حابارلادى.
سىر ءوڭىرىنىڭ جۇرتشىلىعى ۇلىستىڭ ۇلى كۇنى – ناۋرىز مەرەكەسىن تويلاۋعا ارنالعان ءىس-شارالاردى باستادى. ءان مەن كۇيدەن كەندە ەمەس كيەلى ايماقتا جاراپازانشىلار جاڭا جىل مەرەكەسىنە شاقىرىپ, ءبىر-بىرىنە جىلى لەبىزىن ارنادى. وسىنداي ءساتتىڭ بىرىندە جاڭاتالاپ اۋىلى تۇرعىندارى اراسىندا كۇلشە مەن ناۋرىز كوجە پىسىرۋدەن جارىس وتكىزىلدى. باتانى مۇدىرمەي ايتقاندار دا بولدى.
جالاعاش اۋدانى ىشكى ساياسات ءبولىمىنىڭ باسشىسى ابزال قانباەۆ مالىمدەگەندەي, جۇرتشىلىق ديامەترى 1 مەتر بولاتىن شەلپەكتەن ءدام تاتىپتى. ال ءارتۇرلى سايىس بويىنشا سىنعا تۇسكەن وزاتتارعا باعالى سىيلىقتار تابىس ەتىلدى.
ءاز ناۋرىز-جىل باستاۋى. اتام قازاق وسى مەرزىمدە ۇرپاعى ءۇشىن ىرىمداپ تال وتىرعىزعان. ءۇي اۋلاسىن تازا ۇستاپ, ەگىن سالعان. وسىناۋ تىرلىك ءار جىل سايىن جالعاسىپ جاتىر...
ءامىرحان الماعانبەتوۆ.
دەرەككوز: «قازاقستان» تەلەارناسى.
فوتو: «قازاقستان» تەلەارناسى