مالايزيانىڭ الور-سەتار قالاسىندا وتكەن «اگونگ كۋبوگى» جولىنداعى جارىستا قازاقستاننىڭ تاجىريبەلىك ۇلتتىق قۇراما كومانداسى التى التىن مەدال جەڭىپ الدى. بۇل تۋرالى قازاقستان بوكس فەدەراتسياسى حابارلادى.
جارىستا ءوز سالماقتارىندا ادىلبەك ءادىلجان (56 كگ), باعدات ۋايداەۆ (60 كگ), ماۋلەن وسكەنبەك (64 كگ), ايتجان شلەەۆ (69 كگ), نۇرزادا سابىروۆ (75 كگ) پەن تۇرسىنباي قۇلاحمەت (81 كگ) كۋبوك يەگەرى اتاندى. ال ماۋلەن وسكەنبەك جارىستىڭ ەڭ ۇزدىك بوكسشىسى اتاعىنا يە بولدى. جالپى, وعان 8 ەلدەن 58 بوكسشى قاتىستى.
بۇل – تاجىريبەلىك قۇراما كوماندانىڭ حالىقارالىق شارشى الاڭداعى العاشقى جەڭىسى. قازىر ونىڭ قۇرامىنا بولاشاعىنان ءۇمىت كۇتتىرەتىن 22 سپورتشى ەنىپ وتىر. كوماندانىڭ ءوزى قاڭتار ايىندا قۇرىلعانىن بىلەسىزدەر.
داستان كەنجالين.
دەرەككوز:www.ktb.kz.
فوتو: www.ktb.kz.