پايدالانۋعا بەرىلگەنىنە جىل اينالا قويماعان وسكەمەندەگى جەكپە-جەك سارايى بۇگىندە ءتۇرلى حالىقارالىق, رەسپۋبليكالىق سپورت دودالارىنىڭ ورتالىعىنا اينالىپ كەلەدى. بۇل تۋرالى Egemen.kz ءتىلشىسى حابارلادى.
جۋىردا عانا ەرتىستىڭ سول جاعالاۋىنىڭ كوركىنە كورىك قوسىپ, جارقىراپ تۇرعان جەكپە-جەك سارايىندا ەركىن كۇرەستەن ەل بىرىنشىلىگى ءوتتى. 1997-98 جىلى تۋعان ءجاسوسپىرىم ۇلدار مەن قىزدار اراسىنداعى قازاقستان چەمپيوناتىن تاماشالاعان شىعىسقازاقستاندىق جانكۇيەلەردىڭ داۋىسىنان سارايدىڭ كەڭ زالىندا قۇلاق تۇنادى. سوڭعى جىلدارى وبلىس اۋماعىندا بوي كوتەرىپ جاتقان سپورتتىق نىسانداردىڭ كوبەيۋىمەن بىرگە سپورتقا ىنتىزار قاۋىم دا ارتىپ كەلە جاتقانىنىڭ كۋاسى بولدىق.
ەلىمىزدىڭ بارلىق وبلىسىنان جانە استانا, الماتى قالالارىنان ءدۇبىرلى سىنعا 362 سپورتشى قاتىستى. سونداي-اق شىعىس وڭىرىنەن اتالعان جارىستا 36 سپورتشىنىڭ باق سىناۋى وبلىستىڭ سپورتتاعى الەۋەتى نىعايىپ كەلە جاتقانىن بايقاتتى.
سپورت جانە دەنە شىنىقتىرۋ ىستەرى اگەنتتىگى مەن شىعىس قازاقستان وبلىسى اكىمدىگى بىرىگىپ ۇيىمداستىرعان ەل چەمپيوناتىنا ءار ايماقتاردىڭ سپورت سالاسىن وركەندەتۋگە ۇلەس قوسىپ جۇرگەن حالىقارالىق دارەجەدەگى سپورت شەبەرلەرى, مەملەكەتتىك جانە اعا جاتتىقتىرۋشىلار مەن ەلىمىزگە بەلگىلى سپورت ارداگەرلەرى قاتىستى.
دۋمان اناش.
وسكەمەن.
دەرەككوز: Egemen.kz.
فوتو: Egemen.kz.