ماڭعىستاۋ وبلىسىنداعى بىرنەشە اۋىلعا قۇم استىندا قالۋ قاۋپى ءتونىپ تۇر. بۇل تۋرالى «24 kz» حابارلادى.
جەر استىنداعى سۋ كوزدەرى سارقىلىپ, وسىمدىك جامىلعىسى جويىلىپ كەتكەن سوڭ سەنەك, ۇشتاعان جانە تۇششىقۇدىق اۋىلدارىنا قاراي قۇم كوشە باستاپتى. ال ەلىمىز عالىمدارى مۇنىڭ الدىن الۋ ءۇشىن ءشول دالاعا بىرقاتار ءتوزىمدى وسىمدىكتەردى ەگەۋگە ۇسىنىس جاساعان.
جالپى, اتالعان وڭىرگە قاراستى ۇشتاعان اۋىلىنىڭ ماڭى ساحارانىڭ شولىنە ۇقسايدى. ءدال وسى جەردە بىرنەشە جىل بۇرىن ءبۇتىن ءبىر اۋىل تۇرعان-دى. ۇيلەرى قۇم استىندا قالعاندىقتان جۇزدەگەن تۇرعىن باسقا جەرگە قونىس اۋداردى. قۇم كوشكىنىنەن قونىس اۋدارۋ تىعىرىقتان شىعۋدىڭ جولى ەمەس.سوندىقتان جەرگىلىكتى بيلىك ونىڭ الدىن الۋ ماقساتىمەن التى جىل بۇرىن «جاسىل الەم» مەكەمەسىن قۇردى. سونىڭ نەگىزىندە قامىستاردان جاساندى بوگەتتەر جاسالىپ, شولگە ءتوزىمدى بىرقاتار وسىمدىكتەر ەگىلدى. ماسەلەن, قوڭىر كومىردەن الىنعان تىڭايتقىشتى جانتاق, جۇزگەن جانە سەكسەۋىل سىندى وسىمدىكتەردىڭ وسۋىنە پايدالانۋدا. عالىمدار بۇل تىڭايتقىشتىڭ وتە ءتيىمدى ەكەنىن ايتادى.بۇل تۋراسىندا رەسپۋبليكالىق حيميا عىلىمدارى ينستيتۋتىنىڭ قىزمەتكەرى اينۇر شاكىروۆا بىلاي دەيدى: «ءبىزدىڭ پرەپاراتتىڭ ەڭ جاقسى جاعى – وسىمدىكتەردىڭ تامىرلانۋىنا جاقسى اسەر ەتەدى. ال وسىمدىك نەعۇرلىم تامىرلانعان سايىن ءوزىنىڭ ءوسىپ-ونۋىنە, اۋا رايىنىڭ قولايسىز جاعدايىنا ءتوزىمدى بولىپ كەلەدى».
قازىر قۇمنان قورعانۋ جۇمىستارىنا اۋىلداعى ۇلكەن-كىشى اتسالىسۋدا. كەيبىرى كوشەتتەر وتىرعىزىپ جاتىر. جالپى, وسى وڭىردەگى قۇم كوشكىنىن توقتاتۋ ءۇشىن ءالى دە 200 شارشى شاقىرىم جەر قالپىنا كەلتىرىلۋى ءتيىس.
ءامىرحان الماعانبەتوۆ.
دەرەككوز: «24 kz».
فوتو: Egemen.kz.