وتكەن سەنبى كۇنى ەلىمىزدە كوپتەن بەرى كۇتكەن فۋتبول ماۋسىمى باستالدى. وسى كۇنى قازاقستان پرەمەر ليگاسىنىڭ ءبىرىنشى تۋرى التى قالادا ءوتتى. بۇل تۋرالى قازاقستان فۋتبول فەدەراتسياسى حابارلادى.
العاشقى تۋردىڭ العاشقى ماتچى زاتابول قالاسىندا قوستانايدىڭ «توبىل» جانە سەمەيدىڭ «سپارتاك» كوماندالارىنىڭ اراسىندا ءوتتى. وسى ماتچتا بيىلعى ماۋسىمنىڭ العاشقى گولىن سەمەيلىكتەر ساپىندا ماكسيم ازوۆسكي سوقتى. دەگەنمەن, قوناقتار ويىن سوڭىنا دەيىن ەسەپتى ساقتاي المادى. بۇل كەزدەسۋدە ەسەپ 2:1 بولىپ قوستانايلىقتاردىڭ پايداسىنا شەشىلدى. وندا اناتولي بوگدانوۆ پەن وگنەن كراسيچ ءبىر-ءبىر دوپتىڭ اۆتورى اتاندى.
وسى تۋرداعى ەڭ قىزىقتى ويىن قىزىلوردانىڭ «قايسار» مەن شىمكەنتتىڭ «ورداباسى» كلۋبتارىنىڭ اراسىندا ءوتتى. وڭتۇستىكتىڭ «دەربيى» بولعان ويىندا الاڭ يەلەرى 1:0 ەسەبىمەن جەڭىسكە جەتتى. كەزدەسۋدە جالعىز گولدى 23 مينۋتتا پەنالتيدەن ساۆيچ سوقتى. ال «استانا» مەن «جەتىسۋ» كوماندالارىنىڭ اراسىندا وتكەن ماتچتا الاڭ يەلەرى مۇنداي مۇمكىندىكتى پايدالانا المادى. وندا كەزدەسۋدىڭ 50 مينۋتىندا «استانانىڭ» ويىنشىسى سيسەرو 11 مەترلىك ايىپ دوبىن سوعا الماعان سوڭ ەسەپ اشىلماي, 0:0 بولىپ اياقتالدى. ءبىرىنشى تۋردىڭ باسقا ماتچتارىندا مىناداي ەسەپ تىركەلدى. «ەرتىس» ءوز الاڭىندا «شاحتەردى» 1:0 ەسەبىمەن جەڭدى. «اتىراۋ» سىرت الاڭدا «قايراتتى» 1:0, «اقتوبە» تارازدا جەرگىلىكتى كوماندانى 2:0 ەسەبىمەن ۇتتى.
ەندى كەلەسى تۋردا «قايسار» - «تاراز», «ورداباسى» - «استانا», «اتىراۋ» - «توبىل», «جەتىسۋ» - «قايرات», «سپارتاك» - «ەرتىس», «شاحتەر» - «اقتوبە» كوماندالارى كەزدەسەدى.
داستان كەنجالين.
دەرەككوز: http://.www.kff.kz.
فوتو: http://.www.kff.kz.